Lɔga Zuga Ku 12 Keko Na Kamadha Zugo
9
1 Na Yesus eliu zuga gɛnyɛ bɛrrana ku tɔmmɔn ko ramman na kaynɛ gulsamo ko barartina mogɛa mɛnɛnga ko mutan.
2 Na egu na kamatɛsɛ zugo bhee lɔmɛ ꞉Tumuye na kibaysi zuga ilagasɛa.
3 Na sɛɛsɛ,
"Hunde heo bhokonnɔye,
aha gen ngalogono.
Bhirɛ,
kama,
tila,
birinya,
ngalogono dhul.
Nɔng rum logono dhɔnɛ sɔng.
4 Na hunde heo ɔr konnɔye,
tɛldi doraa hira lamanungu sabbɔ sɔng.
Bhokonnɔ ngahɛo ko bhee bhonsanɛo na hɛyɛo ɔr konnɔ.
5 Na hunde heo ɔr konnɔ na zuga ɔrony ngalamanungoye,
igge banda na tibarta terriya dokonog ngaɔrronu na seyɛsɛ,
'Agge wa kìbaytungo na tewa usha' na igge ago.”
6 Na banda na ago na matɛsɛ zugo kamannaa challa ori toye gɔrɔ gɔrɔ na ibaysi zuga ilagasɛa.
7-8 Nɔng ngakaldonu zuga orɛa lɔga messo ꞉Yesusi gen senɛ,
"Yohanisa churo zugo dha bare bana rɛsɛyɔ.
Gena senɛ,
"Eliyas dha bare ko na kargiyɛ.”
Gena senɛ,
"Zuga bere yogɛsɛnɛa zugo lɔga Tumu sabbɔ kona dha bare bana.”
Na komoruya Gelila kènno Herediwos hunaa shikko ngalɔktaye,
tɛldɛsɛ lɔku gɛrɛng.
9 Na seu,
"Yohanis huna bere sabba kegedhau ꞉anyo na erra.
Na ngalɔkta kishigiye hony ori?
Ga na kartɔni.”
Lɔga Ɛbɛa ꞉Yesusi Zuga Ku 5000
10 Na zuga bɛrrana ꞉Yesusi wakta na yoktɛsɛ lɔga mesɛa.
Na banda na dhi ko Yesus ɔra kènno Betesayda dheyyɔ na kɛtɛldi bhichang.
11 Na zugo shigi gɔra ihɛa ꞉Yesusi na kɔbɔyɛ.
Na nɔng lama na madhɛsɛ bhɛa yɔk lɔmɛa ꞉Tumu na ibaysiu ga ilagasɛa.
12 Na bho te jhayn na zuga gɛnyɛ ku tɔmmɔn ko ramman hoya na seyɛsɛ Yesus,
"Komorue,
sɛɛsɛ zugo na kago ngaoriya na kalamio ahaa amɛa ko hana ungusɛa.
Ngaya a dus.
13 Na nɔng sɛɛsɛ,
"Amisɛ ayɛ ꞉igeu hung so.”
Na yɔk se,
"Agge kɔlɔmo ngatilɛnda ku haynaye ko ngaurgusa ku rammande sɔng.
Maya ngazukta amissɛ kàtalɛsɛndɔ.”
14 Zuga maya sɔng a zugo hirkonɛa tɔmmɔn ko ramman ko zugo tɔmmɔn (5,000).
Yɔk tɛrro ko erro ngani kòtoyito.
Na Yesus sɛɛsɛ,
"Zugo kedhigi na kɛtɛldi bhiy bhiy ke zugo ramman ko tɔmmɔn,
zugo ramman ko tɔmmɔn.”
15 Na kendɛsɛ zugo ba.
16 Na Yesus iwa amissɛa gina na dhɔngɛsɛ Tumu kawarɛ na eterisanu.
Na koo ngɛrɛsɛ zuga bɛrrana na yɔk ngɛrtɛsɛ zugo.
17 Na usigi na cha.
Na uruta dhi junya tɔmmɔn ko ramman.
Betiros Kɔbha Bhɛa Yesus Anɛa Komoruya Ibaysi Zugo
18 Na Yesus kale kona aleɛ ko Tumu bhichang na zuga bɛrrana ꞉nɛa hoya.
Na ghinu na sɛɛsɛ,
"Ngangaye zugo senɛ kani nɛ?"
19 Na yɔk seyɛsɛ,
"Zugo senɛ ani Yohanisa churo zugo.
Gena senɛ ani Eliyas.
Gena senɛ zuga bere kinginye yogɛsɛnɛa zugo lɔga Tumu kona dha bana.”
20 "Na igge senno kani nɛ?"
Na sɛɛsɛ Betirosi,
"Inye ke ani Hira Bɛraninyi ꞉Tumu ku Komoru Ibaysi Zugo.”
21 Na madhu na sɛɛsɛ,
"Ye,
na ngayoktɛsɛ hir konani wo!
22 Ali Hiri Hoynɛ kìtiranyɛany gore.
Na chɔɔ maranyɛ ꞉roraa zuga Isirayeli ko ꞉gɔldangɛaa doraa Tumu bibiyo ko ꞉zuga madhɛsɛnɛa zugo damiya Tumu.
Na kɔ̀gɔdhany na kɛrɛsiyɔ.
Na kasani ungo sizzi bolkugiye na ibanisionony ꞉Tumu.
23 Nɔng inde hinony anyeye any kɛnga rɛ na kinyim lɔga ganyu kale kale na kɔɔbhanydɔ.
24 Inde hin rɛa nɛnɛ na mar lɔga ganyuye,
ujuk rɛ.
Nɔng inde se kere lɔga ganyuye,
jɔana baseya ku dhul ngagarsao.
25 Hiri hunde kumuga aha kumulɔng na baseya ku dhul ngajɔana na kere,
bhee ku hologunde a inong?
26 Hirre shik lɔga ganyu na amɛ ꞉liyaye,
ale kɔ anye Hiri Hoynɛ kala kugunɛy na kɔlɔmanɛy dirama nanu ko na babaa nanu ko na zuga eko ꞉Tumu hɔla kɔ anye amɛany liya.
27 Ga shigitɔ!
Bhɛa ngazukta shilɛye ale gen ngarɛsɛwo ko bhee Tumu lɔmɛ ba na orɛ.”
Lɔga Bhɔdhinɛnɛa Ɛya ꞉Yesusi.
28 Na hunaa yokkono ngalɔkta na tewa ushaye,
saniu ungo isey.
Na iwa Betiros ko Yohanis ko Yaykob na dhiganu kutulɔ tundɔ na kaleɛ ko Tumu.
29 Na hunaa alenɛna ko Tumu ngangaye,
mumo bhɔdhɛ na ruminyaa maluko bhadha huna Tumu.
30-31 Na Muse ko Eliyas hoya ga bo lɔma dirama Tumu na assa Yesus.
Na yoktɛsɛ Yesus lɔga bere lamiwo ꞉Tumu kenno kurugɛsɛ Yurusalemɔ na kere ꞉nɛa.
32 Yɔk zuga gɛnyɛ ungusɛ gɛk na ngani kargito.
Na hunaa bansanɛaye,
argi dirama Yesusi ko zuga ku ramman hunde shilɛ kariye.
33 Na hunaa Muse ko Eliyas wokɛaye,
Betiros sɛɛsɛ Yesus,
"Nɔng ngaya kɛlɛo ngayaye,
a challi komoru.
Na hunde karakto gahachinde ku sizzi na kona ke nunu kona ke Eliyasi kona ke Muse,
a challi.
Na nɔng dha Betiros ngalɔkta yokkonoye ngagayo.
34 Na hunde chinyi ngani yokkono lɔgɔye,
yɔk chɛbu ꞉idhɔ kutulɔ tundɔ na tɛngɛrɛ bho.
35 Na idhogiye toye shigi lɔkte senɛ,
"Erite Nan kɛbɛran ꞉anyoye a nganda.
Shigi nɔng!"
36 Na hunaa mɛzi tewa ushaye,
argi Yesus hunde dha dhɔyɛ bhichangge.
Na zuga orɛa ngalɔktonu ngani ngayogɛsɛnɛwo zugo lɔgɔ.
Lɔga Ibaysiya ꞉Yesusi Eriya Mariɛa ꞉Mɛnɛngu
37 Na hunaa bhorroyɔ bhonsanɛa kutulɔye,
Yesus itinyandɛ ko zuga bo mɛra.
38 Na eliu ꞉hir konnɔ zuke toye na sɛɛsɛ,
"Komorue,
keni ibayseogony ngaerita nande.
Dorigiye a dhɔnɛ sɔng.
39 Banɛsɛ ꞉mɛnɛngi konnɔ.
Na kalde senanaye,
ar wuy na dodoginɛ na dhagɛ rɛ ba na kalawuri tugɔ se 'buu!
'.
Na hunde chɔllau na te ushaye,
ilaga na hin rɛsɛ ke ngaya bansɛn ꞉mɛnɛngiyɔ kali kaliye.
40 Na hunaa kajɛsɛni zuga bɛrani na kibaysite,
ngani ngaɔanɛwo.”
41 Na sɛɛsɛ,
"Ngangaye,
anye ale kinyimong na kɛl kari chɔɔ ore ngatenyda bhanggalung na yɛbha ninggɛnung na Tumu ngayɛbhoye?
Ga kuyɛy eri.”
42 Na eri hunaa ngani woono gangguye,
shɔyɛsɛ ꞉mɛnɛngiyɔ ba na dadakɛ.
Na mɛnɛngi tɔgu ꞉Yesusi na eri bau na aynɛ shɔgɔnɛ.
43 Na zugo bhoy argi barartina Tumu ko buyn na iwachiyɛ.
Na hunde bu zugo ngani iwachinɛye,
nɔng Yesus sɛɛsɛ zuga bɛrrana,
44 "Ngalɔkta koyokogungge tɔlɔmɔ shɛɛ.
Anye Hiri Hoynɛ ale ajanyɛ ꞉zugu mirɔga.”
45 Na yɔk dha lɔga kòyogɛsɛna shɛɛ ngani kishigito.
Na liyayi ꞉Tumu lɔgɔ na ngani ngagaɛwo.
Na bhɛa senno kighindɛ tɛngɛrɛyɛ.
Ke Bu Noy?
46 Na zuga kɛ̀bɛrana ɛkɛnyandɛ kɛngɔ na se,
"Ngangaye,
bhɛa na bu noni?"
47 Na nɔng aru lɔga lɔmɛa kɛngiya gɛ toye.
Na iwa eri kona na koo shili ko nɔng
48 na sɛɛsɛ,
"Ge hinɛ ngaerita yɛbhanyde,
kɔ anye hinonyɛyɔ.
Ge yɛbhanyɛ anyeye,
chɔɔ babaa nanu bere ekononyi ko yɔk hinɛyɔ.
Ngamɛa bhɛa nu inde chinyi hunde iheye,
aynde buye.”
49 Na sɛɛsɛ ꞉Yohanisi,
"Komorue,
wa karto hir kona hunde obhonisiono mɛnɛnga sara gunyuye.
Na kataganydɛo ke ngaya hira na ngaanɛwoye.”
50 Na sɛɛsɛ ꞉Yesusi,
"Ge ngamarungɛye a zuga gu.
Ngakanyɛo!"
Lɔga Yesus Marɛa Zuga Samariya
51 Na Yesus kolea senno kɔgɛ tumɔ te ja na shɔɛsɛ hini bɛ na kok Yurusalemɔ.
52 Na egu zugo sabbɔ na ago Samariyagiye ɔr konnɔ toye na kemesigi ba shɛɛ.
53 Na yɔk zugo argi bhɛa senno kɔgɛ ꞉nɛa Yurusalemɔ na ngani ngalamanɛwo.
54 Na zuga bɛrrana kènno Yaykob ko Yohanis argi lɔgɔ na ghini Yesus na seyɛsɛ,
"Komoru,
kɔ̀mbɛo lɔga bere hɛta ko ga Eliyasi na kutugurtowo go tumɔ na kuhuga ngazukta mɛya?"
55 Na hunaa dhoɛa gangguye,
budhɛ na wologu na sɛɛsɛ,
"Anno ge honyo ori wa?
Hiri Hoynɛ hunde bere kekononyde,
ngake kìbaysiwo zugo na kabatɔ?
Bere ke kùhuga zugo?"
56 Na ago ɔr konnɔ.
Lɔga Dokonɛa Zuga Kɔbhɛa Nɔng
57 Na ganggugiye uturbanu ꞉hir konnɔ na sɛɛsɛ Yesus,
"Komoru,
keni kidhi ko inye kari gɔre kɔye.”
58 Na sɛɛsɛ,
"Chɔɔ dɔrachina bolkɛna ungusɛa ɛlɛ ko shɔa tumony.
Na nɔng anye Hiri Hoynɛ bhɛa kichɔrɛsɛni chɔɔ sabba ninggɛ.”
59 Na eleo hir kona sɛgɛn na sɛɛsɛ,
"Kɔ̀banydɔ!"
Na hira gina sɛɛsɛ,
"Komoru,
ga igomogony na kɛjɛm sabbɔ na kòy babaa nanu na kɔmɔyany,
na kidhi kari.”
60 "Zuga lɔga Tumu ngashikɛawo ko zuga rɛsa a dhɔnɛ,
na any koytɛ kɛngɔ!
Nɔng inye ok na madhɛsɛ zugo bhɛa yɔk lɔmɛa ꞉Tumu.”
61 Na hir kona ko nɔng bana na sɛɛsɛ,
"Nɔng dheyana kidhiyo.
Na ga kòk na kìyagɛsɛ zuga ganyu na kawaga na kagotɔ.”
62 Na sɛɛsɛ ꞉Yesusi,
"Hirre ibhana mera lɛga na lɛginɛ na kawarɛ gunyɛ wuruye ale Tumu nɔng ngalɔmo.”