Lɔga Zuga Ku 72 Keko
10
1 Na wurtɔ Yesus bɛra zukte ku zugo sizzi ko tɔmmɔn ko ramman h na ngɛru ramman ramman na egu oriya senno kɔgɛ ꞉nɛa sabbɔ.
2 Na sɛɛsɛ,
"Liwa a mɛri na zuga suninɛna a muchugi.
Na ngamɛa ogolo ɛnaa guny na kɔtɔrɛong zuga suninɛna gena.
3 Agoni!
Kɔtɔkagung yoya toye tɔlɔng huna mɛdɛrɛniunyi.
4 Kamayi ko kɔbɔrtɔchin ngalogono.
Chaha yɔk logono ga jagaruny sɔng.
Gena ngalogono.
Na hunde dho gangguye,
ko zugo kale ngadhako.
5 Na hunde tunuko dori konaye,
seyɛsɛ,
'Chaldin any ke ngadoriya.'
6 Na hunde ngadoronu lɔ hirre hini challiye,
chaldin lɔ ꞉nɛa.
Hunde ninggɛye,
chaldina nu wokogung eygo.
7 Na usigi amissɛte ajungɛ ꞉yɔkuye na tɛldi ngonu.
Hira messo zinggo kàgadhiyɔ.
Na doriyo genne ngahɛo.
8 Hunde dokko ɔr kon na zugo hinongɛye,
amissɛte ajungɛye usigi hung.
9 Na zuga ilagasɛa ogoldɛsɛ Tumu na kabatɔ.
Na seyɛsɛ,
'Kolea senno kaleɛung ꞉Tumu wa tewa ja.'
10 Na hunde zugo ngahinongɛwoye,
banda ago bariyɔ na seyɛsɛ,
11 'Agge nɔng tamartiy na nɔng bhɛa igge lɔmɛungu ꞉Tumu tagatɔ.
Agge nɔng terriya bare kodokono ngaɔrra kitibarɛsɛno ngaya na kɛhɛoyɔ.'
12 Nɔj ale kalde Tumu se kegen lɔga zugonyde,
ngaɔrra bhɛa Sodomi joronoyɔ.
13 Ala,
zuga Betesayda ko Korazin,
ahaa barara bere kèmeso bhɛa nu hunde bere kèmese Tirosɔ ko Sidonagiye,
anda bere yɔk kata lɔga bere ɛdɛa gɛrsa na daga bur na malugu ruminya duhu kɔra na ujugu lɔga gɛrsa na tɛldi bhee hɔli.
14 Na ale kalde Tumu se kegen lɔga zugonyde,
igge bhɛa Tirosi ko Sidona joronoyɔ.
15 Ige zuga Kibiromi dhɔngo rɛhi na senno ale ɛllo ko Tumu?
Nɔng tumɔ ngahɛoyo.
Heo bhɛa chɔllauny.
16 Ge shikongɛ igeye ngangaye,
kɔ anye shikonyɛyɔ.
Ge marung igeye ngangaye,
kɔ anye maranyɛyɔ.
Ga anye ngashikonyayo ngangaye,
na ekononyi anye chɔɔ ngashikɛwochi.”
17 Na zuga ku zugo sizzi ko tɔmmɔn ko ramman ago gɔra bare kègeya na wakta ga bo hinisi hɔla na seyɛsɛ Yesus,
"Komoru,
agge wa kobhonisiyo mɛnɛnga sara gunyu na bhonda.”
18 Na sɛɛsɛ ꞉Yesusi,
"Anye wa kara Setan hunde ngɔana tumɔ huna tumua bhadhaye.
19 Na ahite dhɔnɛ idiranung igge ninggɛ dhul.
Barartina mogɛo kono ko kiyɔ ko mirogi lɔmoyɔ.
Anna kaungo.
20 Ige ngadɛlo ngaya mogɛo mɛnɛngaye.
Dɛlɛ bhɛa jɔanɛo baseyk tumɔ.”
21 Na hunde ngani yokkono lɔgɔye,
Yesus owo ꞉Kuloya Tumu hini na eterisanu Tumu na bo hini hɔla na seu,
"Babaa nanu,
Komoruya tumony ko bany,
ngaya ulugunyɛ zuga gayɛa bho lɔgɔ na dhɔlɛsɛn erroa chicho lɔgɔye,
keyeliny gore.
Baba,
ngaya mɛya mesɛ ngangaye,
a ngaya hinisa nunu anɛ hɔliye.”
22 Na gɔnyu zugo na sɛɛsɛ,
"Lɔgɔ kumulɔng ajany ꞉Babaa nanu.
Na hirre gaany eriya nɛnɛ ninggɛ.
Gaany ꞉nɛa sɔng.
Na ge gaɛ Babaa nanuye kani anye eriya nɛnɛ sɔng ko zukte kɔdhɔlɛsɛn ꞉anyoye.”
23 Na Yesus ikiya na yagu zuga bɛrrana dheyyɔ na dagɛsɛ go na sɛɛsɛ,
"Ge orɛ ngalɔkta oro ꞉igeuye mumiya gɛ a challi.
24 Yɔk zuga bere yogɛsɛnɛa zugo lɔga Tumu sabbɔ ko komortɛna bere mɛra sabɔne bere reyɛa ngalɔkta oro ꞉igeuye na kargitɔ.
Na ngani kargito.
Chɔɔ ngalɔkta mɛya shikko ꞉igeuye bere senno kishigitɔ na bhee shigɛ gara.”
Lɔga Hira Ku Samariya Hini Challa
25 Na kali kona hira gaa damiya Tumu kona bana na kilob Yesus na sɛɛsɛ,
"Komorue,
ngangaye,
hunde mɛya keni kɔjɔa baseya ku dhulde wo,
maya kemesi ɔng?"
26 Na Yesus ghinu na sɛɛsɛ,
"Damiya bere ajɛa ꞉Tumu Muse hunde toyiye,
se ɛnɛng?"
27 "Ke nɔng se Komoruya nunu Tumu teyel surr hinisɔ toye ko kɛngɔ ko kuloyɔ kari na mɛdhayɔ.
Na zuga bhako kari teyel huna rɛa nunu.”
28 Na sɛɛsɛ ꞉Yesusi,
"Ee,
a dhere ngalɔkta yokonde.
Na ok na me nganga na jɔa baseya iho dhul.”
29 Na hiri bhɔdhu rɛa nɛnɛ ke hɔli na ghinu Yesus sɛgɛn na sɛɛsɛ,
"Ngangaye,
zukte kabhakko kari ke kèteyelde a nɛng ko nɛ?"
30 Na sɛɛsɛ ꞉Yesusi,
"Se bere hir kona chidhinya Yurusalemɔ na se kok Yarɛkogiye.
Na hunaa kɔwaye,
ibhigi ꞉chimtanyau gɔrɔ na mayto aha.
Na dhaga na dhɔyɔ inde rɛsi.
31 Na gɔldanga Tumu kona chidhiya ganggua gina.
Na hunaa dokkono hiriye,
kɛnga dhey na ogu.
32 Na hira Lewil kona chidhiya ganggua gina na daga hiri na dhau bhɔ sɛgɛn.
33 Na hira Samariya kona hunaa chidhinyana ngagangguonuye,
daga hiri na towonyɛsɛ.
34 Na koo dhɔnga na tonyu molo woyna kùchudhana.
Na iwa mala girarinym na uhudhɛ na chɛbu.
Na tɛu harteya nɛnɛ na ɔgɛ chɔɔ doraa ungusɛa ꞉kɔmɔnu na ɛbiu.
35 Na bhorre iwa birinyan na aynɛ hira dori na sɛɛsɛ,
"Ɛbiogony ngahirra ngaya dirr.
Na ale hunde kowokonde,
kagadhieny sɛgɛn.
36 Na mɛya anda bhɛa ngazukta ku sizite,
inde anda yel ngahirra dhakɛ ꞉chimtanyau huna hira bhakkɛa kariye a nɛng?"
37 Na seu,
"A nganda chirbhisiye.”
"Ee,
ogoni na ko inye me nganga!"
Lɔga Ihɛy ꞉Yesusi Doraa Marta Ko Mariyami
38 Na Yesus ko zuga bɛrrana ago.
Na hunde hɛye,
daga ɔr kona na lama tɛrite ke Marta.
39 Na nɔng dha ngatɛrita lɔ ngonɛye ke Mariyam na i bay na chirar lɔga madhɛsɛna ꞉Yesusi shɛɛ.
40 Na Marta shuru ꞉zinggou na koo sɛɛsɛ Yesus,
"Komoru,
ngangaye inye ngaoronyo hunde shuronyɛ ꞉zinggou bhichang na nɔng Mariyam i bayte?
Yogɛsɛ na kɛyany zinggoye.”