Lɔga Madhɛy ꞉Yesusi Na Senno Kaleɛy Ko Tumu
11
1 Na kale kona Yesus aleɛ ko Tumu bhokonnɔ.
Na hunaa tewa ushaye,
zuga bɛrrana kona seu,
"Komoru,
ko inye madhagiy bhɛa kalenɛnɛo ko Tumu damiya bere madhɛsɛna ꞉Yohanisi zuga gɛnyɛ.”
2 Na nɔng sɛɛsɛ,
"Hunde senno aleɛ ko Tumuye,
se ɛnɛnggio,
"Babaa nayo na ihi tumɔ,
sara gunyu kɛnginyana barara.
Wo na tɔlɔmiyɔ.
3 Ngakalda ayiy amissɛa mɛyane.
4 Hunde lɔ zukte ɛdɛ lɔga gayo na kujuko lɔgɔye,
ko inye ge kɛdɛo ꞉aggeuye ujuk na kagaratɔ.
Ngaɔdagiy lɔga gɛrsa.”
5-6 Na sɛɛsɛ,
"Mɛya bhɛa nu kona hunde kadak ꞉bɛkayɔ na nɔng kasa bɛkaya nɛnɛ sɛgɛn bar kɛngɔ na kesɛɛsɛ,
'Bɛkaya nanu kona wa kowa rɛna na ahite kajɛy gara.
Na ga kàtabariseny tilɛnde ku sizzi na ale kàyinydɔ.'
7 Na nɔng katamar na kese,
'Ngamarigionyi!
Anye wa kɔnyɔgɛu na agge ko erro kutunggo ɛrchagiye.
Na bhee kabansanɛ na kajɛinyi ninggɛ.'
8 Na nɔng a bɛkaya nɛnɛchi.
Na koo hunde ngaajɛ,
ale bansana na ajɛ ke ngaya tanɛye.
9 Anye kesenagung ɛnɛnggio,
ogolo Tumu.
Ali lɔkte ogoloye ajunggɔ.
Lamitɔ.
Ali lɔkte lamoye jɔanoyɔ.
Elitɔ na koogunggɔ.
10 Yɔk ge ogolɛye kumulɔng kajɛyɔ.
Ko yɔk ge lamiɛye jɔanɛyɔ.
Ko ga eliya tutugɔ kòosɛndɔ.”
11 Mɛya bhɛa nu hunde kɔtɔlɔ inde ku shɔgɔnu na kogolo ꞉errou lotay,
anda inde ajɛ bɛye a nɛng?o Wo anda hunde ogolungɛ urgusite,
ajɛo kono?
12 Wo anda hunde ogolungɛ bhurrayte,
ajɛo kiyɔ?
13 Na hunde a nganda igge anno kuhuyaga na erroa gu lɔmo shɛɛye,
anda Babaa na iho tumɔ Kuloya nɛnɛ ngaajɛwo zukte ogolɛye ɛnɛng?"
Lɔga Komoru Yesusi Ko Ga Belzabuli
14 Na kale kona Yesus obhoniseo mɛnɛngiya dunggamo hir konnɔ rɛhɔ toye.
Na hiri kaka ɔktɛ na mɛziu na zugo iwachiyɛ.
15 Na zug gena yɔk se,
"Ay,
mɛnɛnga obhonisiono barartina komoruya mɛnɛnguny Belzabuli.”
16 Na yɔk gen ilobo Yesus na seyɛsɛ,
"Ga dhɔlagiy ahite barari kona tumɔ na kartoyɔ.”
17 Na Yesus tagu lɔga ɛsɛdhdhɛa na sɛɛsɛ,
"Manggise kɛngɔ ngashiginɛwoye ngaimnɛwo.
Chɔɔ zuga doraa dhɔnɛna hunde ngashiginɛwoye,
kenɛ kɛngɔ.
18 Na mɛya igge senaganyo mɛnɛnga kobhonision barartina Belzabuli ɛnɛng?
Setan hunde manggisiya nɛnɛ shɛɛ ngaimoye,
ngakenɛwo kɛngɔ?
19 Na anye hunde senaganyu mɛnɛnga kobhonision barartina Belzabuliye,
na igge zuga gu obhonisionɛ barartina nini?
Ige ale ujukanungɛ zuga kɔbhungɛa.
20 Na hunde anye mɛnɛnga kobhonision barartina Tumuye,
igge tagatɔ.
Kolea senno kɔtɔlɔmɛung ꞉Tumu tɛ ja.
21 Hirre ɔnɛ na chib bɛra na bhɛk ahaa gɛnyɛ shɛɛye ahaa gɛnyɛ ngaɛdɛnɛwo.
22 Na hunde ɔdhinyogi kona chibhana bɛra na kunde,
ngagana bɛraa gɛnyɛ yɛbha na kɔɛ ko ahaa gɛnyɛ kumulɔng na ajɛ zuga gɛnyɛ.
23 Ge kɔ anye kari ngakɛloye a mirɔga ganyu.
Ge kɔ anye kari ngakiwonɛnoye odɛnɛ mɛdɛrni ganggu na garsɛyɔ.
24 Mɛnɛngi hunde bhonsana hiriyɔ rɛhɔ toyeye,
tolinɛ na lami bhɛa senno kabhak korugiye bhɛa ma ningginɛna.
Na hunde bhee bhagi ngani ngaoroye,
se,
'Ga kawak yaga bere nanu.'
25 Na hunde wokonoye,
or dori hunde dha bere kìdiri na te na bo challaye.
26 Na koo dhigannana mɛnɛnga ko nɔng ngahɛtawo ɔnnɛna ge ku isabay na tunukɛ hiri na bhakkɛ kari.
Na ngahirra bhɛa bere sabɔne anggo.”
27 Na hunde Yesus ngani yokkono ngalɔktaye,
tɛri kona bana zuke kɛrghɛnɔ na seu,
"Junua bere lɔminyi kɛngɔ na ahuyi dha bere tuhu ꞉Tumu kɛr.”
28 Na sɛɛsɛ ꞉Yesusi,
"Ee,
a challi.
Zukte tuh ꞉Tumuye yɔk agge shikɛ lɔga Tumu na bhɛkɛye.”
Lɔga Kɔ̀dhɔlɛsɛna Yonas
29 Na zugo yɔk hunaa ngani mukinyanaye,
nɔng sɛɛsɛ ga ku sabba,
"Ngatenyda a gɛrsi.
Se kɔ̀dhɔlɛsɛ ahite barari kona na kargitɔ.
Na nɔng anye lɔk gena ngakɔdhɔlɛsɛno.
Kɔdhɔlɛsɛn lɔga bere kɔ̀dhɔlɛsɛna Yonas sɔng.
30 Damiya bere Yonas kɔ̀dhɔlɛsɛna zuga Nenewe na orɛa,
kɔ anye Hiri Hoynɛ kani nganga bhɛa ngatenyda.
31 Na kala senno kegedhɛ ꞉Tumu lɔgɔ,
tɛriya ku komoruya ba karanɛ kènno Azeb bansana na shilɛ zuga ngatenyda ke ngaya bansanɛ surr ba utureyɔ na se kishigɛ bhɛa gayɛa Solomoni bhoye.
Na nɔng mɛya nako Solomon ngahɛtawo ngaya ihe.
32 Ko yɔk zuga Nenewe ale ɛl ko ngatenyda kari na bansanɛ na shilɛ zuga ngatenyda ke ngaya yɔk shigɛ madhaa madhɛa ꞉Yonasi na ujugɛa lɔga gɛrsaye.
Na nɔng mɛya nako Yonas ngahɛtawo ngaya ihe.
Lɔga Goa Terinyo Rɛ
33 Inde ibhana goa keterinyo na uluguny bhɛa kɔra,
ninggɛ.
Maya koy bhee dharnɛ na hunde zugo tunukonɛye,
keterinydɔ.
34 Goa terinyenyi rɛa nunu a kawariyɔ.
Hunde kawarɛ aniny challiye,
rɛa nunu a hɔli.
Hunde kawarɛ aniny chagiye,
rɛa nunu a mugur kumulɔng.
35 Na goa lɔmi rɛa nunu bhɛktɔ.
Ngakidhiyɛ.
36 Ngamɛa hunde gunyi rɛa nunu na bhee ku mugur ninggɛye,
ngangaye dha rɛa nunu walat shɛɛ na anna bo bhadha.
Lɔga Ibaynɛnɛa ꞉Yesusi Ku Illɛy
37 Na hunaa yokkono lɔgɔ na tewa ushaye,
eliu Bhɛrɛs konnɔ na kusigi tila kari doraa nɛnɛ.
Na koo tunugu dori na tɛlda bay.
38 Na Bhɛrɛs aru Yesus hunde sɛno ngaonyo na am tila nganga hungge.
Na rɔgu rugum.
39 Na sɛɛsɛ ꞉Yesusi,
"Zuga Bhɛrɛsi igge onyo bagay ko kɛdɛm bhuguy na nɔng kengiya gu ngani lɔmo kuhuyamo ko lɛsiyamo.
40 Alala ngadunggɛnda ngagiya,
ngangaye komoruya bere ghendo rɛ bhɛa bhone bere senno rɛ bhɛa toyne ngani ketegenyo?
41 Ibhta ngaahaya esheo baganyaye ko kɛdɛmaye na ayɛ bhoyoga na igge kotonyung ꞉Tumu na te hɔli.
42 Alala,
ngazukta Bhɛrɛsiye,
iwo rɛhi!
Ige dhumano chɔɔ ghimamunyaa chicho chicho ko aha gen na toyiyɔ.
Na hunde a tɔmmɔnde,
dhɔnɛ ajɛo Tumu.
Na hunde a zugo haynaye,
tɔmmɔn ajɛo Tumu sɛgɛn.
Na nɔng lɔga zugony shɛɛ ngakedhowo ko Tumu ngahinowo.
Maya ngalɔkta ɛlɛhɛno ke dhɔnɛ kari.
43 Ngazukta Bhɛrɛsiye,
iwo rɛhi shɛɛ!
Hunde heo doraa kàmadhɛa zugo lɔga Tumuye,
bɛro alleyiya ɛlɛa zuga bibiyo sɔng.
Na chɔɔ hunde heo gawgiyeye,
dhɔngo rɛhi na zugo kisaung igge huna zuga bibiyo.
44 Ige hɛto ko igingeya dha bere kɔ̀bhɔgɛa hiri na ngakoro na dokkɛa ꞉zugu tundɔ.
Na igge iwo rɛhi!"
45 Na hira gaa damiya Tumu ku nani kona bana na sɛɛsɛ,
"Ngangaye,
Komorue ke hunde yokon ngalɔktaye,
hɛ ko wolokiy agge sɛgɛn.”
46 Na sɛɛsɛ ꞉Yesusi,
"Ngazukta gao damiya Tumu ku nanaye,
iwo rɛhi!
Ige dhɔngɛsɛno zugo lɔga bo dhandala ngaɔanɛawo na chɔɔ igge halagiya chinyo ngaidirano na ɛyanowo.
47 Nɔng igge messo igingoa zuga bere yogɛsɛnɛa zugo lɔga Tumu ke challi na nɔng lɔga gɛ ngabhɛkowop.
Yɔk ngazukta bere ngakɔdhɛawo kokonginyaa gu rɛ?
48 Na hunde messo ngangaye,
dha hino lɔga bere mesɛa kokonginyaa gu kɔdhɛa zugo.
Na igge hɛto ko zuga tɔro yɔk.
49 Anna bere Tumuq senno,
'Anye kibhan zuga yogɛsɛnɛa zugo lɔga ganyu ko zuga kèko na kegiyɔ.
Na yɔk gena ibhanɛ na nisɛyɔ.
Gena marɛ na chukɛyɔ.'
50-51 Ngamɛa ngatenyda lɔmɛ gigeya nyawaa bere kɔ̀dhanɛa bhɛa zuga yogɛsɛnɛa zugo lɔga ganyu.
Nɔng dogɛ nyawaa Abeli ihineya bere kɛ̀bhɛlanɛa ba ko ga hira bere kɔ̀gɔdha doraa Tumu ngawgiye kɛrghɛnɔ kènno Zakariyas ko ngamɛa,
gadhiɛ ꞉yɔkku.
52 Zuga gao damiya Tumu,
iwo rɛhi!
Mayishono zugo bhɛa senno kataktɛ Tumu na hɛyɛo ꞉igeu.
Nɔng igge rɛhiya gu Tumu ngahinowo na kanyɛwo zugo kɛ ɔng?"