Lɔga Ibayuny Ko Ga Wologuny
12
1 Na hunaa zugo muktiya na toyi rɛgiyoye,
ikinydɛ kɛngɔ na Yesus yogɛsɛ zuga bɛrrana ꞉nɛa lɔgɔ na sɛɛsɛ,
"Zuga Bhɛrɛsi a zukte tabhiyɛ nigiyayɔ na hinisi toye a gɛrsi na heo bhogum.
Na ngabhogumba nɛye igge bhɛgɛ rɛhiya gu.
2 Nɔng ahite kùluguny na kìmagi ninggɛ.
Koo hunde magɛ ba,
ale uhanɛ na kìshik chi.
3 Yɔk lɔga mɛziwo mugurɔ rogonɔ bhelekinyɛnɛ bhee hɔli na kìshik kaleyɔ.
Ko hunde mɛzi lɔk gena hɛhɛ dari ghohigiye toye,
ale hɛ na kìshik bhuranɔ.
4 Zuga ganyuye,
ngaɛngɛrso ngagiya umujusɛungɛ ayugɛna gu na wurtɔ lɔkte mesonɛ ninggɛye.
5 Na ga kɔ̀dhɔlagung inde keni tɛngɛrɛte.
Tɛngɛrɛ na hunde kɛ̀rɛsaye ku komoru ujukagiy bhɛa chɔllauny.
Tɛngɛrɛ nɔng sɔng.
6 Chɔɔ dhumgolunya hayna kàtalanɛ tamuninya ramman sɔng.
Na bhɛa Tumu dhɔnɛ ngaletɛnyawo.
Kàga rang.
7 Chɔɔ chɔra gu sabichinuny ɛl toyiyɔ na nɔng gayɔ.
Na ngamɛa bho ngaɛngɛrso.
Ige ko dhumgolunyaa mɛra ngahɛtowo.”
8 Na seu,
"Inde liya ngaamɛwo na kɔbhɛsɛn zugo lɔga ganyuye kɔ anye Hiri Hoynɛ lɔga gɛnyɛ kɔɔbɛsɛn zuga eko ꞉Tumu.
9 Nɔng inde ɛmɛsɛany zugo na imaganyde kɔ anye bhɛa zuga eko ꞉Tumu kɛmɛsiyɔ.
10 Ge dhɔmanyɛ anye Hiri Hoynɛye yɔk lɔga gɛ kujuktɔ.
Yɔk hunde dhɔmɔ Kuloya Tumuye,
lɔga gɛ ngakujuko dhul.
11 Na hunde hɛyɛungɛ ꞉zugu doraa kàmadhɛa zugo lɔga Tumu ko doraa ɛlɛa ꞉komortɛnu ko ꞉gulsachinu na ghinongɛye,
ngase,
'Ali koyokkono dha ge ke gìyɔng?
' na shurtɛ.
12 Ali lɔkte senno yoktoye dhiganagung Kuloya Tumu.”
Dalemoa Hira Lɔma Aha
13 Na hir kona bana zuke toye na sɛɛsɛ,
"Komorue,
ga yogɛsɛ gɔchɔnga nanu na kɛngɛragany aha gen na kɛsɛrɛyo kari.”
14 Na sɛɛsɛ ꞉Yesusi,
"Ngangaye inde bere ibhanany anye na se kegen lɔga guye a nɛng?"
15 Na sɛɛsɛ zugo kumulɔng,
"Bhɛgɛ rɛhiya gu!
Ngajajagisɛno aha na chirkano.
Basey aha mɛrtinɔ ngaiho.”
16 Na ɛlɛhɛnɛsɛ lɔk gena na sɛɛsɛ,
"Bere lɔma hirre aha mɛri na gua nɛnɛ liwa egisɛ gore.
17 Na ɛsɛdhu lɔgɔ hinisɔ na seu,
'Ngamɛa dha hunde doraa kojɛy liwa ninggɛ ngangaye,
ale liwa koji ori?
18 Ye,
gani!
Kòboli ngabalanggichinda na kɔ̀gɔn ke bibi na kɔshɔdhɛsɛ ngalewaya ko aha bhoy.
19 Na hunaa koja ahaa ganyu na tewa ushaye,
kesɛɛsɛu rɛa nanu,
'Ngarɛya,
mɛya ahaa ami oynyaa mɛra na ngagarsɛyao te ngagiyani!
Mɛya hɔngani!
Usɛni!
Irɛni!
Shumun na bo hini hɔlani!
' Kesɛɛsɛu nganga.'
20 Na nɔng sɛɛsɛ ꞉Tumu,
'Ngadalnyogita nganda,
ngabara rɛsiyɔ na ale ngaahaya mukan mɛrte sɛrɛ noni?'
21 Na nɔng inde chirbhisi aha sɔng na mar lɔga Tumuye bhɛa Tumu a bhoyogi na ganggua nɛnɛ a ngandani.”
Lɔga Kèno Ngakushurnɛnɛ
22 Na Yesus sɛɛsɛ zuga bɛrrana,
"Ahaa kama ko ruminyaa kamaluko ngashurnɛno.
23 Basey ko amissɛa kama ngahɛto.
Rɛ ko ruminyaa kamaluko ngahɛto.
24 Ga gɔnyigi raka!
Yɔk ngakɔhinɛwo.
Suni ngasuninɛwo.
Bhalanggichinde gɛ ninggɛ.
Na yɔk irogi ꞉Tumu.
Na igge ko shɔa tumony ngahɛto,
joronoyɔ.
25 Mɛya bhɛa nu inde shurnɛ na se,
'Keni kete rammay' na rammay r ihe wo ninggɛ?
26 Nɔng a nganda chɔɔ ahia bhaseno ngaɔanoye na shurnɛno chɔɔ ore?
27 Ga gɔnyigi ngatirayya hunde shilɛ ɛnɛngge.
Ngamɛsinɛ na ruminyaa gɛ chigɛsɛnɛwo rɛhi.
Nɔng chɔɔ Solomon hunaa bere anna komoru na ahaa gɛnyɛ anna mɛri,
ngani rɛ kughulsiyo ruminyaye challi nganga.
28 Ige shɛɛ Tumu ngayɛbhowo.
Nɔng hunde a nganda orochi ɛdhɛysi chɔɔ lanyaa ale dhɔrɔgɔsɛa na ama goye wo,
anda igge goore ngaɛdhɛysiongo ɛnɛng?
29 Na ngamɛa ngase,
'Dha ale ahite kamo ko maa kamato koro ori?
' na idha ba na shurtɛ.
30 Ngadamita a lɔga zuga Tumu ngayɛbhɛyayo.
Ige nɔng,
ahaa hino ꞉igeu,
Babaa nu iho tumɔ gayɔ.
31 Na ga sabbɔ lami lɔga hino ꞉Komoruya nu Tumu na ahaye ganɛnoye kumulɔng kaung ꞉nɛa.
32 Ngamɛninyaya chi dhikilongge bho ngaɛngɛrso.
Babaa nu se kaung komorumo.
Wa igomoa.
33 Mɛya ngaahaya lɔmo bayte taldɛy kumulɔng na ngɛrtɛsɛ bhoyoga na chɛkta kɔbɔrtɔchina ngamujusɛawo na oytɛ ahaa gu tumɔ bhɛa dugu ngaamɛawo ko ogorchaga ngaogorɛawo.
34 Bhɛa ɛlɛa ahaa gu hinisiya gu gaɛyɔ.
Lɔga Kèno Kɛ̀tɛldɛ Kɔk Na Kèreyey
35 Na chɛbtɛ na tɛldi kɔk.
Go ngadhito.
Terinyi ke hɔli
36 huna zuga reyɛa komoruya nɛ bhɛa ihɛa wolologiye.
Na hunde wokono na eleoye,
osɛnɛa dori ke tiri.
37-38 Ga shigitɔ!
Yɔk ge hunde komoruya nɛ wokono bar kɛngɔ na asana tunoye a tuhinɛ.
Na ko nɔng komoruya nɛ chibinɛ na i kɔk na abhanyisiyɔ.
39 Ga kàung ngagiya!
Kolea kunɛa ꞉ogorchagiyɔ ngakagayo.
Hunde ɛnaa dori katak,
anda bhɛk shɛɛ na ogorchagi ngabhɔko dori.
40 Na igge chɛbtɛ na tɛldi kɔk.
Ali Hiri Hoynɛ dhulana dari kolea igge imagɛo.'"
41 Na Betiros ghinu na sɛɛsɛ,
"Komorue,
ngangaye ngalɔkta ɛlɛhɛnagiy agge sɔng wo ɛlɛhɛnagiy kumulɔng?"
42 Na sɛɛsɛ ꞉Yesusi,
"Mɛya bhɛa nu bariyte bas andas ibhana ꞉komoruyɔ na abhanyisi barinyaa gɛnyɛ shɛɛye a noni?"
43 Ngabarita bas me lɔga bare madhɛsɛna ꞉komoruyɔ na hunde komoru iyikinyaye ɛl shɛɛye,
a tuhinɛ.
44 Ga shigitɔ!
Nɔng ngabarita kɔ̀dhɔyɛsɛn aha kumulɔng na bhɛk ꞉nɛa ke gulsa.
45 Na nɔng ngabarita hunde seu,
'Komoruya nanu ale shaw ngakuno' na iwa amissɛ na usɛ hung na iru geso na dhuttiu na tiranyɛ barinyaa gɛnyɛye,t
46 komoruya ngabarita dhulana dari na ati goore na idhoy ko zuga Tumu ngayɛbhɛawo ke dhɔnɛ.
47 Nɔng bariyte ga lɔga hino ꞉komoruyɔ na irande dhak ꞉komoruyɔ gore.
48 Na nɔng inde lɔga komoruny hologun shɛɛ ngani katago na me gɛrɛngge kàrakana bhee chinyi.
Nɔng na gaa bhɛa nɛnɛ kère lɔkte mɛri.
Hira kajɛa lɔga mɛra nɔng bhɛa nɛnɛ kère lɔkte mɛri.
Lɔga Ba Chaldin Ngahonyɛawo, Honynyɛ Kedha
49 Na Yesus seu,
"Anye huna kuguni,
keni kɔshɔgɛ ba go bay.
Na mɛya hunde kàragayi ba go na ku mɛya hinisa nanu anany hɔli.
50 Anye mɛya lɔ churate keni kùchurɛytɔ.
Na ko bhee urugɛsɛni ngani kushurnɛn gore.
51 Ige senno hunde kuguni ba ngayaye,
kugunɛ zany.
Anye kugunɛ kedha.
Zany ngakugunɛo.
52 Mɛyane mɛyaneye lɔ zukte ku hayna dore dhɔnɛ na marnɛ kɛngɔ.
Na ngagiya ku sizite marɛ ngagiya ku rammande.
Ngagiya ku rammande marɛ ngagiya ku sizite.
53 Eriya maya ko shɔgɔnɛ marnɛyɔ.
Na ngaha ko jɔnɛ marnɛyɔ.
Nyak ko kɔa nɛnɛ marnɛyɔ.
Kenɛnɛ lɔga ganyu na ngashiginɛwo.”
Lɔga Marakɛa ꞉Zugu Bɛrguɛna Ko Ga Kedhɛa Lɔgɔ
54 Na sɛɛsɛ zugo,
"Nɔng ngamɛa hunde oro idho dhɔnginya gɔra ngɔyɛa susɔye,
igge senno,
'Guyɔ se karaktɔ' na a shɛɛ.
55 Na hunde oro ngɔyɔ hunde dhɔnginya ba karanɛye,
senno,
'Ba se ke su' na a shɛɛ.
56 Na mɛya ngazukta tabhiy nigite na hinisi toye gɛrɛ na marako ba ko Tumuye mɛya ngani ngamarakowo ngabɛrguyaye tɔlɔ ɔng?
57 Na lɔga ku dhere ngani ngangɛro eygo hungge,
te ɛnɛng?
58 Mɛya hunde shilɛyiny balagaraya nunu na kɔɛiny bhɛa kèdhɛa ꞉gulsachinu lɔgɔ na ngani ɛllo gɔrɔye,
kedhigi ko balagaraya nunu lɔgɔ.
Hunde ngakedhoye,
ibhaniny na ajaginy gulsachin na gulsachin ajaginyɛ bholi na bholi hɛyɛinyɛ doraa chibinuny na chibhenyɛyɔ.
59 Na ko bhee gadhiɛ birinya rang ngaɔkaninyɛwo.”