Lɔga Kujugɛa Lɔga Gɛrsa
13
1 Na kala gina zugo yoktɛsɛ Yesus lɔga kɔdhɛa ꞉Bhilatosi zuga Gelila udulɛsɛnɛa ꞉Tumu go.
2 Na Yesus sɛɛsɛ,
"Na mɛya hunde ngazukta dha kɔ̀gɔdhɔ na ɛlɛhɛno ko zuga Gelila genaye,
heo mesɛ lɔga gɛrsa dhoyogi?
3 Ngayo.
Hunde lɔga gɛrsa ngaujukoye,
ko igge garso nganga.
4 Na ko yɔk ngazuktonu ku tɔmmɔn ko isey nyom doraa ku bɛ Solomɔye hunde ɛlɛhɛno ko zuga Yurusalemi genaye,
heo mesɛ lɔga gɛrsa?
5 Ngayo.
Hunde lɔga gɛrsa ngaujukoye,
ko igge garso nganga.”
6 Na ɛlɛhɛnɛsɛ lɔk gena na sɛɛsɛ,
"Dha bere bhogoni kona kùduk gua kùdugɛa woyn.
Na hunde ɛnaa guny kun na se kudhuya kawarɛ na kuse,
kawarɛ ninggɛ.
7 Na nɔng sɛɛsɛ hira bhɛkka gu,
'Anye mɛya ngakɛta oynya sizzi kawarɛ ngani kudhunga na karo.
Na keni kègedhɛsɛ ba na kagartɔ.
Bhil ba hɔlɔng hung.'
8 Na hira bhɛkka sɛɛsɛ,
'Komorue,
ga ngaoyoya ngakedhani.
Ga kulal na kɛrɛsɛ zig.
9 Kako ngaoyoya ale kawarɛ dhunganayɔ.
Na hunde ngani ngadhunganawoye,
kedhayɔ.'"
Lɔga Tɛriya Wo Ghumghumɔ Na Kìbaysiwo Kala Ayawsuny
10 Na nɔng Kala Ayawsuny madhu zugo doraa kàmadhɛa zugo lɔga Tumu konnɔ.
11 Na nɔng dha bere lɔ tɛrite bhuguy anyakuwan ꞉mɛnɛngiyɔ na oynya tɔmmɔn ko isey wo ghumghumɔ na bhee shilɛ dim na woɛ ninggɛ.
12 Na hunaa oro ꞉Yesusiye,
eliu na sɛɛsɛ,
"Ngatɛrita nganda,
ngailagayta nunde wa gara na bau.”
13 Na tadhɛ siyɔ na bhuguy madhiya na tɛu dim na nɔng eterisanu Tumu.
14 Na hunaa ibayseo hiri Kala Ayawsunyde,
wologu ꞉gulsaa doraa kàmadhɛa zugo lɔga Tumu na sɛɛsɛ zugo,
"Unga mesɛa ꞉zugu zinggo ku illɛy ɛlɛ.
Na hoya ngaunggonu na kìbaysionggo.
Kala ayawsuny ngahonyo.”
15 Na sɛɛsɛ ꞉Yesusi,
"Ngazukta ngagiya tabhiy nigite na hinisi toye gɛrɛse,
mɛya igge bhɛa nu inde ɔkana olea nɛnɛ wo harteya nɛnɛ na ajɛ ma Kala Ayawsuny ninggɛ?
16 Nɔng ashaya Awurami a nganda dha bere chibhana ꞉Setanɔ kingi na mɛya oynya te tɔmmɔn ko iseyte wo.
Ye,
na Kala Ayawsuny ngakibaysiwo?"
17 Na hunaa yokkono ngalɔktaye,
mirɔgaa gɛnyɛ usɛ ꞉liya na yɔk zugo ga mɛra tɛhɛnɛ ngalɔkta bu chal me ꞉nɛaye.
chalde.
Lɔga Bhogoni Kawariny Ko Ga Bhogumuny
18 Na ghinu ꞉Yesusi na sɛɛsɛ,
"Tumu hunde lɔ zugoye,
heo ko ɔng?
Wo kɛ̀lɛhɛnɛsɛ ɔng?
19 Heo ko bhogoni bhɛa ku kawari toyne.
Na hunde kùdukte,
kɔ na chil ke bu na kɔdhɛ ꞉shɔau doriyo tundɔ na bhakɛyɔ.
20 Na ghinu sɛgɛn na sɛɛsɛ,
"Bhɛa Tumu lɔmɛa zugo kɛ̀lɛhɛnɛsɛ ɔng?
21 Heo ko bhoguma ibhanɛa ꞉tɛrrou na ojɛsɛnɛa gichiya toye na loya lotay na ke mirgari chicho muchuga.”
Lɔga Ganggua Ngochua
22 Na hunaa yokkono ngalɔkta na tewa ushaye,
bhɛlu ori toye na madhɛsɛ zugo gɔrɔ gɔrɔ na ogo Yurusalemɔ.
23 Na hir kona bana na ghinu na sɛɛsɛ,
"Ngangaye,
ale basɛ zukte muchugi?"
Na nɔng sɛɛsɛ,
24 "Dhadhaktɛy ngawaranda ngochuye.
Yɔk zugo ga mɛra hinɛyɔ na bhee dhoyɛ ninggɛ.
25 Na ɛnaa dori ale hunde nyuk warande,
igge elio bhɔ na senno,
'Komorue,
wo ogi waran!'
Na nɔng imagung na senagung,
'Anno ge honyo oriwa?'
26 Na igge senɛsɛno Komoru,
'Ke kano zuga bere madhi ꞉inyo ɔra nayo na kùmulnɛna kari.'
27 Na nɔng se,
'Anye ke kimagunggɔ.
Anno kuhuyakte honyo tan inong?
Ago!
Ngaya nande ngaɛlo!'
28 Ige mɛya ale oro Awuram ko Yaykob ko Isak ko zuga bere yogɛsɛnɛa zugo lɔga Tumu sabbɔ hunde ɛl ko Tumu kariye,
na nɔng igge kɔ̀tɔkung bhoye,
rimo nigiya na ruoyɔ.
29 Na ale zugo mukkinya ba bhoyu na itinyanɛnɛ bhɛa komoruya nɛ lɔma yɔk Tumu na amɛ tila kari.
30 Na ga bere wurtune ngakaldonu jimɛ sabbɔ.
Na ga bere sabɔne ɛl wurtɔ.”
Lɔga Munyusɛa ꞉Yesusi Lɔga Yurusalemi
31 Na zuga Bhɛrɛsi gena ago na ibbaya Yesus na seyɛsɛ,
"Inye mɛya se kɔgɔdhiny ꞉Herediwosi.
Na bana jara!"
32 Na nɔng sɛɛsɛ zuga ibachɛa,
"Ago na yoktɛsɛ ngadoraonu na seyɛsɛ 'Nɔng ngakalda ko rogonɔ se ngani ibaysi zugo na obhonisiono mɛnɛnga.
Na sani ungo ramman na na anɛa sizzi lɔga gɛnyɛ bhugɛsɛndɔ.'
33 Nɔng anye mɛya ko rogonɔ kowo ganggu chɔɔ Yerusalem ke ngaya hira yogɛsɛna zugo lɔga Tumu bhokonnɔ ngakɔgɔdhɛwoye.
Yɔk rɛsɛ Yurusalemɔ sɔng.