Lɔga Ihɛy ꞉Yesusi Doraa Bhɛrɛsi Konnuny
14
1 Na kale kona Kala Ayawsɛa ꞉zugu nɔng ogu doraa gulsaa Bhɛrɛsi konnuny na kus tila kaleyɔ.
Na zugo tɔyɛsɛ nɔng damite me ꞉nɛaye.
2 Na hunde kɔye,
daga hirre rɛ kuusu sabbɔ.
3 Na Yesus ghinu zuga gayɛa damiya Tumu ko zuga Bhɛrɛsi na sɛɛsɛ,
"Damiya Tumu se zuga ilagasɛa Kala Ayawsuny kìbaysiyɔ wo ngakibaysiwo?"
4 Na yɔk dhitɛ.
Na nɔng iwa hira ilagasa na ibaysiu na itonu ogu.
5 Na sɛɛsɛ zugo,
"Ngamɛa bhɛa nu kona hunde eriya nɛnɛ wo olea nɛnɛ kɔngɔyɛsɛ bolku Kala Ayawsuny,
anda inde ngahɔranawoye a nɛng?"
6 Na yɔk zugo rɛgɛ ꞉lɔku na bhee yokonɛ garu.
7 Na aru zugo hunde bu bɛrɛsɛnɛ rɛhi alleyiya ɛlɛa zuga bibiyoye,
na ɛlɛhɛnɛsɛ lɔgɔ
8 na sɛɛsɛ,
"Hunde lagunyogung hira durio wololo bharra na hɛoye,
ngashamɛsɛno alleyiya kenno kɛtɛldɛ zuga bibiyo rɛhi.
Kako hirre bu ko inye ngahɛto bare kàlagunyɛsɛn bharra kundɔ.
9 Na ale ibanisioniny hira bare ajungu bharra kari na sennaginy,
'Ngaya ɔdɛsɛ ngahirra.
' na ajiny liya na kɔ na ihon bɛ konnɔ.
10 Na nɔng hunde lagunyoginy ꞉hiriyɔ bharra na elieny na kɔye,
bhɛa ihɛy ngatushani ꞉ɛna.
Tɛ bay na kɛbɛraginy ɛnaa wololo na zugo kumulɔng kɛtɛhɛndinydɔ.
11 Zuga dhɔngɛa rɛhi dokinyayɔ.
Ga rɛhi ngadhɔngɛawo ghɛyanɛyɔ.”
12 Na nɔng sɛɛsɛ hira elisɛna tila,
"Hunde seni abhanyisi zugoye,
zuga ale chachaginyɛa amissɛ ngaabhanyisi,
gɔwnggu ko bɛkanyaa gunyu ko bhɛnɛn ko zuga bhako kari lɔma aha.
13 Abhanyisi bhoyoga ko anyakuwanda ko zuga kawarɛ chaga ko zuga sɛno ko jagarɛ ku dunggulunya
14 na kutusenydɔ.
Yɔk ahite ajinyɛ ninggɛ.
Ali inye bhukoginy ꞉Tumu kolea bansanɛa zuga hinisi challa rɛsɛyɔ.”
Lɔga Abhanyisɛa Bo
15 Na zuga aminɛna ko Yesus kona shigu ngalɔkta yokkono ꞉nɛaye na seu,
"Inde ale kɔ na aminɛ ko Tumu tumɔ bhee dhɔnɛye a tuhinɛ.”
16 Na sɛɛsɛ ꞉Yesusi,
"Hir kona eli zuga bo mɛra na kusigi tila.
17 Na agɛsɛ tilɛn ba.
Na hunaa tewa ushaye,
egu bariya nɛnɛ na komo zugo na kesɛɛsɛ,
'Tilɛn wa kakta na tewa usha!
Na hoya usɛ!'
18 Na zugo makta lɔga rɛhiya gɛ.
Na konav seu,
'Anye bare ngani katalani ba bhokonnɔ na keni kɔgɔnydɔ.
Na bhee kɔgɔɛ ninggɛ.'
19 Na ko nɔng kona maga lɔgɔ sɛgɛn na seu,
'Anye bare ngani katalani olinyaa kɔhany tɔmmɔn na ngani keni kìlobɛ kɔha.
Na bhee kɔgɔɛ ninggɛ.'
20 Kona seu,
'Anye ngani kɔlɔmi mɛrtay na bhee kɔgɔɛ ninggɛ.'
21 Na hira kèko waga na yogɛsɛ komoru.
Na komoru dɛɛbu na sɛɛsɛ bariy,
'Bana ok ɔrɔ mɛyarɛ na muga zuga kawarɛ chaga ko ga ku anyakuwanda ko bhoyoga ganggoyew na dhigana na amissɛ kusigi ꞉yɔkku.'
22 Na hira kèko waga na sɛɛsɛ,
'Komoru,
wa zugo kidhiganau na tewa muchugi na alley gen tɛlda gele.'
23 Na sɛɛsɛ ꞉komoruyɔ sɛgɛn,
'Ok ganggoa honynyɛa ꞉zugu ori dheyyɔ na muga zukte oriye na dhigana na alleyiya ɛla gele kɛtɛhɛtɛytɔ.
24 Yɔk ngazuktonu keli na marɛye chɔɔ dhɔnɛ tilaa nanu ngaamo.'"
Lɔga Chɔllaa Dokonɛa Zuga Kɔbhɛa Yesus
25 Na kale kon nɔng dhi ko zuga bo mɛra na budhɛ na gɔnyu wuru na sɛɛsɛ,
26 "Hunde lɔ inde se keme lɔga ganyu na kɔɔbhanyde,
sɛ kɔdhɔ jɔnɛ ko shɔgɔnɛ ko erroa gɛnyɛ ko tɛriya nɛnɛ ko gɔynggɛ ko ngonigɛ na kɛnga rɛa nɛnɛ na kɔɔbhanydɔ.
Inde nganga ngamesoye ngakɛbɛran na kidhiyo.
27 Na inde chɔllaa nanu nganyim na kɔbhananyoye ngakɛbɛran na kidhiyo kari.
28 Mɛya inde se kɔgɔn doraa ku bɛ na ga sabbɔ ngani kɛlɛhɛno na keseyo,
'Dha ale ngadoriya dheshana birinyaye ku isɔngge' a nɛng?
29 Anda hunde kɔgɔn nganga hung na ga sabbɔ ngaɛlɛhɛni na dori kɔdhɔyɛ,
ale ngashigɛwo ꞉zugu
30 na senɛo,
'Ngahirra bɔrɔ chigiono dori na ngani ngadheshanawo?'
31 Dha hunde komoru kona kɔtɔlɔ bholise ku shiyinya tɔmmɔn na kabanɛsɛ komoruya lɔma shiyinya ku hirkon kaman,
anda sabbɔ ngaɛsɛdho?
32 Na hunde guny na ngaɔanawoye,
ngaibhanawo gɔldangɛa na egɛsɛno na kedhewo lɔgɔ shaw hunde miromo ngani i rɛnaye?
33 Ngamɛa bhɛa nu kona hunde ngaahaya ku ngangaye kumulɔng ngani kɔdhɔtoye,
bhee mesɛ lɔga ganyu ninggɛ.
34 Chɔyi nɔng a choy.
Na hunde bhɛa mirgarɛa kagar na ke shamamagi,
bhee kiyagɛsɛn mirgartin na mirgaraye a ɛnɛng?
35 Ahite kemesɛ ninggɛ na kùjuk dusɔ.
Na inde lɔ nyabite sɛ kishiktɔ.”