Lɔga Kùjjukkanɛa Yesus Na Kènno Kìlaktɛ
19
1 Na koo Bhilatos ɔgɛ Yesus na aynɛ zugo na dhagayɛ.
2 Na bholi takuyto kɔmkɔm birinne huna garchua komoruyny na oytɛsɛ Yesus sabba.
Na ibhta rumbe rɛghghɛ bu gaw dhandali na bhuruytɛsɛ.
3 Na koo hoya gɔra nɛnɛ ja ja ga bo bhɔsɔrrɛa na senɛsɛnɛa,
“Komoruya Ayhudhiye!
Tɔlɔ diram na alliyɛy zugo shɛɛ!”
Na nyuggɛa horra “Bhu!
Bhu!”
4 Na Bhilatos bhonu bhɔ sɛgɛn na sɛɛsɛ zugo,
“Anye keni kòbhoniseogung ngahirra ke ngaya keni taktɛ nɔng hunde lɔkte gɛrsi bɔɔ ɛddɛ :nɛa na kàttiyɛ ngani kɔ̀jɔɛsɛo dhulde.”
5 Na hunaa Yesus bhonsana na bo lɔmmana garchua ku birino hɛtta ko na komorumo na malukkono ruma bo rɛghghɛa gaw dhandalaye,
nɔng Bhilatos sɛɛsɛ zuga Ayhudhi,
“Gɔnyigiyɛ ni,
hiri a nganda!”
6 Na yɔk gɔldangɛa bibiyo doraa Tumu barara ko zuga bhɛkkɛa doraa Tumu hunaa orrɛa Yesuse,
yokto lɔgɔ goore na se,
“Ilaga!
Ilaga so!”
Na nɔng Bhilatos sɛɛsɛ,
“Hunde hinnoye aytɛ na ilagayɛ.
Anye nɔng ngahirra lɔkte gɛrsi bɔɔ ɛddɛ :nɛa na kattiɛ ngani kɔ̀jɔɛsɛo dhul.”
7 Na yɔk yaktɛsɛ na seyɛsɛ,
“Agge damiya nayo ihe.
Na nɔng damiya nayo ngahirra maya rɛsɔ ke ngaya ojjɛ rɛa nɛnɛ ke Eriya Tumuye.”
8 Na hunaa Bhilatos shikko ngalɔktaye,
tɛngɛru bho goore.
9 Na wagu doraa nɛnɛ komorumo na ghinu Yesus na sɛɛsɛ,
“Ngangaye,
inye kuni ori?”
Na nɔng Yesus dhuyu go dhɛɛ.a
10 Na sɛɛsɛ :Bhilatosi,
“Na lɔgɔ ngayakkaganynyo?
Anye hunde kɔlɔmi buyna kɔkkanɛinyi oo kilakkɛinyiye,
imagiyɔ?”
11 Na nɔng Yesus yagɛsɛ na sɛɛsɛ,
“Hunde Tumu buyna kènno alliyɛany anye ngaajjinyi,
anda mɛa inye ngaallinɛnɛanyo.
Na nɔng inde bɔɔ ibhbhanany anye na ajjinɛnɛany bhɛa nunuye,
nɔng aynde jorroniny inye na me lɔga bo gɛrsa dhandalaye.”
12 Na Bhilatos hunaa shikko ngalɔktaye,
tɛhɛnu bhɛa senno kɔgayɛy Yesus.
Na yɔk gulsachina Ayhudhi bhololo dirr na yokto lɔgɔ goore na seyɛsɛ Bhilatos,
“Hunde ɔkkan ngahirraye,
inye dhaa dehunya komoruya Rome ngaaniyo.
Nɔng hirre se,
‘Kani komoruye,’
ngangaye anna marnɛna ko komoruya Rome.”
13 Na Bhilatos hunaa shikko ngalɔktaye,
obhoniseo Yesus bho na nɔng ogu alleya kègedhdhɛa lɔgɔ iho bhɛa kèe “Bɛ Chabbali” na tɛa bay.
Yɔk ngasarra kèe “Bɛ Chabbaliye,”
tuga Hibiru keli,
“Gawata.”
14 Na ngakaldonu bho bere anna kali kɛngɔ na anna unga messɛa :zugu ahaa senno kusigi Gibiriya Basika.
Na Bhilatos koo sɛɛsɛ zuga Ayhudhi,
“Komoruya nu a nganda.”
15 Na yɔk yoktɛsɛ Bhilatos lɔgɔ goore na seyɛsɛ,
“Ɔgɛ ilaga!
Ɔgɛ ilaga!
Ilaga so!”
Na nɔng ghinu na sɛɛsɛ,
“Komoruya nu kìlaga dha?”
Na yɔk gɔldangɛa bibiyo doraa Tumu barara yaktɛsɛ na seyɛsɛ,
“Agge komoruya nayo a komoruya Rome sɔng,
Kona ninggɛ dhul.”
16 Na hunaa tewa ngangaye,
Bhilatos ibha Yesus na aynɛ yɔk na kilagatɔ.
Lɔga Kìlagɛa Yesus
Na koo bholi ibhta Yesus na aytɛ chɔɔ
17 dhumbe kèe “Gigeya Sabba.”
Na nɔng tɛa kɛya kènno kìlaktɛ na irrɔgu ngadhumbonu na koo dagu dhum tundɔ.
Yɔk ngasarra kèe,
“Gigeya Sabbaye,”
tuga Hibiru keli “Golgota.” b
18 Na yɔk koo ibhta Yesus ko zukte ku ramman na ilaga ngadhumbonu kari.
Na nɔng Yesus tɛa kɛrghɛnɔ,
na hir kona ilaga siyɔ kangitɛn,
kona ilaga siyɔ sɛtɛn.
19 Na Bhilatos yogɛsɛ zugo lɔgɔ na kibhta gali kona na kɔtɔgɔndɛsɛ lɔkte sennɛ,
“Nganda a Komoruya Ayhudhi Bere Chillana Naziretɔ Kènno Yesus,”
na karaktɛsɛ kɛya kìlagɛa Yesus sabba.
Na yɔk koo ago na mesigi nganga.
20 Na zuga Ayhudhi ga bo mɛra toyi ngalɔktonu ɛl kɛya kìlagɛa Yesuse ke ngaya bere nɔng kìlagɛ ɔr dheyyɔ jaa na lɔgɔ kɔ̀gɔdhdhɛ tuga Hibiru ko tuga Latinuny ko naa Girikiye.
21 Na yɔk gɔldangɛa bibiyo doraa Tumu barara koo tamara lɔgaa kàragɛsɛna kɛya kìlagɛa Yesus sabba na seyɛsɛ Bhilatos,
“Ngalɔkta sennɛ,
‘Nganda a Komoruya Ayhudhiye,’
shɛɛ ngayo.
Na mɛa yogɛsɛ zugo lɔgɔ na kɔtɔgɔndɛsɛ lɔkte sennɛ,
‘Ngahirra se “Anye Kani Komoruya Ayhudhi.”’”
22 Na nɔng Bhilatos yagɛsɛ na sɛɛsɛ,
“Anye lɔgaa koyogɛsɛni zugo na kɔtɔgɔdhɔyɛ,
wa tɔgɔnda.
Na any kete ngagenu hung.”
23 Na hunaa bholi ilakta Yesus na tewa ushaye,
gee ku wush ibhta ruminyaa gɛnyɛ na ngɛrta gaminya wush na aytɛ ke gɛ.
Na nɔng ruma nɛnɛ bo rammaya dhɔyɔ na ngani ngahɛyɛo.
Nɔng ngarumbonu bere anna na bo rammaya kàrakkana ke dhɔnɛ lɛtɛtɛm na hunde kòdokkono ngogiyeye kɔa na dokko ba jagarre.
24 Na koo mɛzzi kɛngɔ na se,
“Ga ngakɛrrɛy!
Hoya kèmesigi damiya kɛ̀bɛrnɛnɛa na kɔgɛ :konnɔ ke talɛ.”
Yɔk bhee bere messɛ ngangaye,
a ngaya se kurruknyɛsɛ :lɔga bere kɔ̀gɔdhdhɛsɛna dadabinyaa Lɔga Tumuye.
Yɔk ngalɔktonu sennɛ,
“Yɔk wa ngɛrta ruminyaa ganyu gaminyaye
na messa damiya bɛrranɛa hira kɔyɛa ruma nanu.”
Lɔkte bere messɛ :bholisɔye a ngagiya.
25 Na yɔk zuga bere chillɛa bhɛa kɛya kìlagɛa Yesus jaa,
bere anna Yesus jɔnɛ ko jɔnɛ ngɔnɛ ko Ngamariyama ku tɛriya Kolobha ko Ngamariyama bere hudhukkinyana Magadhalagiye.
26 Na Yesus hunaa orro jɔnɛ ko hira kɔbhbha nɔng ibhɛsɛna :nɛa hini hunde chillɛ kari jaa jaaye,
eliu jɔnɛ na sɛɛsɛ,
“Mattigoy,
eriya nunu a ngandonu.”
27 Na sɛɛsɛ ngahirronu kɔbh nɔngge,
“Mattigoya nunu a ngandonu.”
Na ngakaldonu ngahirronu kɔbh nɔngge,
dhiganu mama Yesusi doraa nɛnɛ.
Lɔga Rɛsɛa :Yesusi
28 Na Yesus hunaa tagga hunde lɔga bere ajjɛa :Babaa nɛnɛ mɛa dhaa urruknyɛsɛ kumulɔng na te ushaye,
seu,
“Dhagany :huny.”
Nɔng bhee bere senɛ ngangaye,
a ngaya se kubhugnyɛsɛ :lɔga bere kɔ̀gɔdhdhɛsɛna dadabinyaa Lɔga Tumuye.
29 Na bere ngonu lɔmma jua lɔmma gimaya woyna mirgara.
Na zuga bere ɛlla jaa ngonu ibhta rum na chaluyoy woynaa mirgara na ittono bhirɛye dha kùbuchchono kɛte kèe hissob na dhɔnggɛsɛ Yesus tugɔ.
30 Na nɔng hunaa torroye,
seu,
“Mɛa wa urruknyɛsɛa.”
Na bhiiga ngo na ere.c
31 Nɔng ngakaldonu bere anna unga messɛa :zugu ahaa senno kusigi gibiriyɔ ke ngaya se keteɛ Kala Ayawsuny dhɔngngɛa gibiriya Basika bo gooreye.
Na gulsachina Ayhudhi koo ago na ghini Bhilatos na kaynɛ zuga gɛnyɛ lɔgɔ na kibhiigi ngazuktonu kìlakte gigaa jagarruny na kergi na kobhonisiyo ngakɛndonu kìlagɛye.
Yɔk bhee bere ghinɛ ngangaye a ngaya se Kala Ayawsuny zugo ngakasaniyɛ kɛnɛ ilagɔ ngonuye.
32 Na bholi koo hoya na bhiiktɛsɛ zugaa kìlakka ko Yesus bhalloga bhiy bhiy.
33 Na hunaa hɛa gɔra Yesusiye,
argi hunde dhaa nɔng ereye na dhɔyɔyɛ.
34 Na nɔng bholisi kona ibha bɛr na tɔgɔdhu Yesus kullubhbheni na nyawa ko ma hoya “Buhh!”d
35 Nɔng hira bere orrono ngalɔkta kawarre annaa bere kɔbhagungɔ dib na dhugunogungɔ hunde ngalɔkta a dhereye.
Na chɔɔ ngalɔkta bere dhugunnonoye hunde agga ku dhereye nɔng gayɔ.
Na kɔbhbhagung igge na ko igge yɛbhɛtɔ.
36 Yɔk ngalɔkta bhee anɛ ngangaye,
a ngaya dha bere se kurruknyɛsɛ :lɔga bere kɔ̀gɔdhdhɛsɛna dadabinyaa Lɔga Tumuye.
Yɔk ngalɔktonu gena sennɛ,
“Chɔɔ gigaa gɛnyɛ dhɔnɛ ale ngabhiiginɛo dhul.”
37 Na gena sennɛ,
“Yɔk zugo ale orrɛ hira bɔɔ kɔdhdhɛa :yɔkku bɛrrɔ.”
Lɔga Kòjjɛa Yesus
38 Na hunaa tewa ngangaye,
hira kènno Yoseb bere irrittinyana Armatiyagiye ko nɔng bere iho ngonu.
Nɔng a hira kɔbhbha Yesus na yɛbhbha lɔga gɛnyɛ dari ke bhɛa ɛngɛrsɛa gulsachina Ayhudhi.
Na koo ghinu Bhilatos na kaynɛ hirie na koytɔ.
Na hunaa kìgomɛsɛnaye,
ibha na ɔgɛ.
39 Na ɛa :hira kènno Nikodhimos bɔɔ sabbɔ boɛsɛna Yesus barɔ na ghinno lɔgɔ.
Nɔng Nikodhimos bere kunɛa zibua bo ɔngɔnaa hur hur uchuguranɛna ko galiya hɛtta ko bokkoy.
Nɔng ngazibuonu hunde kɛ̀lɛhɛn dhidhingginde heo a kilonya 34.
40 Na yɔk ibhta Yesus na chɛbɛ ruminyaa ku salala hɛtta ko bharasi.
Na huna bere chibbɛa,
bere ibhbhanɛa ngazibuonu bu ɔngɔna hur hurrte na chibɛsɛnɛa ruminyaa kìchibɛa nɔng toye.
Nɔng ngadamita kìchibɛ Yesuse,
a damiya zuga Ayhudhi chibɛa zuga rɛssɛa.