Lɔga Onyɛa :Yesusi Zuga Kɔbhbhɛa Nɔng Jagarɛ
13
1 Na huna bere unga Gibiriya Basika dhɔynɛna dhɔnɛɔ,
nɔng Yesus bere ɛlla ko zuga kɔbhbhɛa nɔng kari.
Na dha bere nɔng gayɔ hunde kolea senno kɔdhɔyɛ ngabaya na kɔgɛ bhɛa Babaa nɛnɛ i jaaye.
Na a bhee bere ibhɛsɛn zuga gɛnyɛ kɔbhbhɛa nɔng bhakkɛa ba hini na yelɛ gooreye.a
2 Na koo jhaynɔ Yesus ko zuga kɔbhbhɛa nɔng hunaa kàbhanyiseo amissɛɔye,
nɔng eriya Simona Askorotu kènno Yihudha bere ɛlla kari.
Nɔng a hira dha bɔɔ tabhbha :Moldoyɔ na ale kɔgɔdhɛsɛ Yesus mirɔga.
3 Na Yesus nɔng hunde a hira ajjɛa :Babaa nɛnɛ buyna lɔkkuny kumulɔng na kunno bhɛa Babaa nɛnɛ na ale wokko sɛgɛnde,
dha bere gayɔ.
4 Na koo bana bhɛa amɛa amissɛ na bhuruya ruma nɛnɛ bhone na ojju bay na dhuma ruma hɛtta ko hɔttay kɛngge dhɔnɛ na chɛbu kurɔ.
5 Na ibha kɛkte heo jɛrdhɛk na ɛrɛsɛ ma na tonyɛ zuga kɔbhbhɛa nɔng jagarɛ dhɔ̀nɛ dhɔ̀nɛ̀ na huga rumaa chibbo kurɔ.
6 Na Yesus hunaa kunno gɔra Simon Betirosiye,
nɔng sɛɛsɛ,
“Komorue,
ngangaye seni tony jagara ganyu chi dha?”
7 Na nɔng sɛɛsɛ,
“Inye mɛa ngalɔkta kemesi :anynyoye imagiyɔ.
Na nɔng ale halɛ ungusɛsɛn na gayɔ.”
8 Na Betiros nɔng yagɛsɛ na sɛɛsɛ,
“Aa!
Aa!
Inye jagara ganyu ngaonyiyo dhul!”
Na nɔng Yesus sɛɛsɛ,
“Hunde jagara gunyu ngakonyiyoye,
agge kègennɛyɔ.”
9 Na Simon Betiros sɛɛsɛ,
“Komorue,
hunde a ngangaye,
jagarɛ sɔng ngaonyonyi.
Tonyony chɔɔ sɛnɔ na churony ko sabbagiye kari!”
10 Na nɔng yagɛsɛ na sɛɛsɛ,
“Hira dhaa tonyɛa,
nɔng rɛa nɛnɛ a hɔli na maya ony jagarɛ sɔng.
Nɔng igge anno hɔli,
na nɔng kumulɔng hɔli ngaannoo.”
11 Nɔng Yesus dha bere ngaya senɛ,
“Igge kumulɔng hɔli ngaannooye,”
se ke ngaya gaɛ hira ale kɔdhdhɛsɛna nɔng mirɔgaye.
12 Na hunaa tonya jagara gɛ na tewa ushaye,
bana na malugu ruma nɛnɛ na ogo na tɛa bay bhɛaa ihɛa.
Na ghinu na sɛɛsɛ,
“Na ngalɔkta kemessogungge wa hologun takto chi,
dha?
13 Igge mɛa anno ngagiya eleonyu,
‘Komoru’ ko ‘Hira Madhdhiye.’
Nɔng a dhere chi,
kani Komoru ko Hira Kamadhdhungu.
14 Na nɔng mɛa hunde a nganda anye kani Komoruya nu ko Hira Kamadhdhungu na konynyung jagara guye,
ko igge maya onynɛno jagarɛ kɛngɔ.
15 Anye nɔng wa kɛlɛhɛnagungɔ lɔgɔ,
na mɛa ngadamita wa kemesɛ :anynyoye,
ko igge maya messo nganga.
16 A challi,
ga shigitɔ!
Bhɛa gaymayuny,
bu komoruya nɛnɛ.
Na ko nɔng bhɛa hira kèkko,
bu hira eginɛna.
17 Nɔng mɛa igge wa takto ngalɔkta.
Na hunde ko igge messo nganga na urrugɛsɛnoye,
anno tuhinɛ.
Lɔga Yokkonɛa :Yesusi Lɔga Ale Kɔ̀gɔdhdhɛsɛna Mirɔga
18 “Yɔk ngalɔkta koyokkonde,
ga gu kumulɔng ngayo.
Yɔk zuga bere kɛbɛrrani :anynyo kaggayɔ.
Na yɔk lɔga bere kɔ̀gɔdhdhɛsɛna dadab sennɛa,
‘Hira kumullo tila kari wagagany na te mirogiya nanu’ maya urruknyɛsɛnɛyɔ.
19 “Nɔng mɛa bhee koyokkogɛung ngalɔkta sabbɔ hunde ngani kurruknyɛsɛoye,
a ngaya hunde ale urruknyɛsɛnɛye,
keni yɛbhtɛanyu hunde kani nɔngge.
20 A challi,
ga shigitɔ!
Inde lammana hira kegi :anynyoye ko nɔng ngangaye lammanany anye.
Na ko nɔng inde lammanany anyeye,
ngangaye lammana hira bere ekkononyi.”
21 Na Yesus hunaa sewa nganga na tewa ushaye,
munyuu goore na dhugunɛsɛ lɔgɔ dib na sɛɛsɛ,
“Ga shigitɔ!
Bhɛa nu,
kona ale kɔdhdhagany mirɔga.”
22 Na yɔk zuga kɔbhbhɛa nɔng rɛgɛ :lɔkku na gɔnydɛ kɛngɔ ke ngaya imagɛ hirre ale kɔdhdhɛsɛn nɔng mirɔgaye.
23 Yɔk bhɛa zuga kɔbhbhɛa nɔng,
hira bere ibhɛsɛna :Yesusi hini goore bere ɛlla ko nɔng jaa jaa.
24 Na Simon Betiros tɔgɔdhu ngahirronu terterɔ na sɛɛsɛ,
“Ga ghin ngalɔkta yokkonoye,
dha yokkono lɔga gigi?”
25 Na nɔng ngiriu ngo gɔrre Yesusiye,
na ghinu na sɛɛsɛ,
“Komorue,
ngangaye inde se kɔgɔdhaginy mirɔgaye a nɛng?”
26 Na Yesus yagɛsɛ na sɛɛsɛ,
“Hirre ginaye a inde kajjɛ ngatilaya kɔgɔdhdhanɛ chunoy kɛdhɛmɔye.”
Na koo ibha tilaa lɔmma siyɔ na tɔgɔdhay chunoy na aynɛ eriya Simona Askorotu kèe Yihudha.b
27 Na Yihudha hunaa ngani kàjjɛa tila ngangaye,
tunnugu :Moldoyɔ nga hung.
Na sɛɛsɛ :Yesusi,
“Lɔkte seni messe,
me shaw!”
28 Na yɔk bhɛa zuga aminɛna ko nɔng kari,
inde bere ga hologuna ngalɔkta kòyogɛsɛn Yihudhaye ninggɛ.
29 Nɔng Yihudha bere anna hira ibhbho kammaya ojjɛa birinyaa gɛ.
Na yɔk gena se kako Yesus yogɛsɛn ngalɔkta na katala amissɛa ale ammɛa kala gibiriyny oo kɛa zuga ku bhoyoga aha genne.
30 Na Yihudha hunaa ussa ngatilaonu na tewa ushaye,
bana na ogo.
Nɔng ngakoleonu bho bere anna kɔrrɔ.
Lɔga Yokkonɛa :Yesusi Bhɛa Ale Imagɛa :Betirosi
31 Na hunaa Yihudha kɔaye,
Yesus nɔng seu,
“Mɛa Hiri Hoynɛ wa tɔlɔma diram na ko nɔng Tumu tɔlɔma diram ke ngaya Hiri Hoynɛ bhugɛsɛn lɔga hinnono :Tumuye.
32 Na hunde Tumu a nganda wa tɔlɔma diram ngangaye,
ko nɔng ale dhɔlɛsɛn zugo dirama Eriya Nɛnɛ.
Na kolea senno kɔdhɔngɛ Eriya Nɛnɛ mɛa te ja.
33 “Na mɛa erroa ganyuye,
anye bhee kɛlɛ ko igge dirr ninggɛ.
Nɔng igge ale lameonyuyɔ.
Na damiya bere kesenɛsɛni gulsachina Ayhudhi,
mɛa ko igge kesennagung ɛnɛnggeo,
‘Gɔrre ale kɔgɔɛ :anynyoye,
bhee hɛyɛo :iggeu,
ninggɛ.’
34 Na mɛa kajjung lɔga bere sabbɔ ngani shiktao.
Na ngalɔktonu a ɛnɛnggeo,
ibhtɛ hinisi!
Na ngadamita kibhbhagɛung :anynyo hiniye,
ko igge maya ibhinɛno hinisi.
35 Na hunde ibhinɛno hinisi ngangaye,
zugo kumulɔng ale gaungɛ hunde anno zuga kɔbhbhanyu anyeye.”
36 Na Simon Betiros ghinu Yesus na sɛɛsɛ,
“Komorue,
ngangaye seni ok ori?”
Na nɔng Yesus yagɛsɛ na sɛɛsɛ,
“Mɛa gɔrre kɔgɔɛye,
bhee kɔbhbhɛanyi ninggɛ.
Na nɔng ale halɛ kɔbhbhany chi.”