Lɔga Ilalɛa :Yesusi Zuga Kɔbhbhɛa Nɔng
14
1 Na Yesus koo sɛɛsɛ zuga kɔbhbhɛa nɔng,
“Ngaajjɛo hinisi ke gɛrsi na shurnɛno,
yɛbhɛ Tumu na ko anye yɛbhtanyuyɔ!
2 Doraa Babaa nanu hana kàbhakka a mɛri.
Yɔk ngalɔkta hunde dhere ngaani,
anda bere koyogogungɔ.
Na mɛa anye ale kijimi sabbɔ na kojjogung hana bhakko kɔk.
3 Na hunde kokka na kojja hana bhakko kɔk na te ushaye,
ale kɔmɔttanung na kɔgɔyɛung na kàbhak bhee kihɛ :anynyoye kari.
4 Nɔng gangguye kɔ bhee kɔgɔɛ :anynyoye,
igge gaoyɔ.”
Lɔga Yesus Anɛa Ganggua Kɛ̀hɛyɛa Bhɛa Babaa Nɛnɛ
5 Na ghinu :Tomasi na sɛɛsɛ,
“Komorue,
agge gɔrre kɔɛye,
kimaggoyɔ.
Na gangguye dhoye,
ale kaggao ɛnɛng?”
6 Na nɔng Yesus yagɛsɛ na sɛɛsɛ,
“Ganggu ko lɔga ku dhere ko bassey kani :anynyo.
Na hirre se kok gɔra ihɛa :Babaa nanuye,
maya dhoony anye.
Ganggu kona ninggɛ dhul.a
7 Nɔng hunde taktanyu anye dhere,
anda ko nɔng Baba nanu bɔɔ takto.
Na mɛa wa arto na takto.
Na chɔɔ ale ngani gaoyɔ.”
8 Na nɔng Bhilibhos ghinu na sɛɛsɛ,
“Komorue,
dhɔlagiy Baba nunu na ba keghedhdhɛ!”
9 Na Yesus yagɛsɛ na sɛɛsɛ,
“Yee!
Bhilibhos,
kèe bere kɛllana ko igge kari kingi na ko mɛa toye imagganydɔ?
Nɔng inde orrony anyeye,
ngangaye aru :Baba nanu.
Na mɛa inye sennagany,
‘Ga dhɔlagiy Baba nunu’ ɛnɛng?
10 Ngangaye hunde anye ko Baba nanu kanno dhɔnɛye,
inye ngayɛbhiyo?
Yɔk ngalɔkta koyokkogung :anynyoye ga sabbaa nanu ngayo.
Agga messo :Babaa nanu.
Nɔng chɔɔ a nganda mɛa kɛllo ko anye kari,
na ngani me lɔga gɛnyɛye.
11 Na mɛa hunde kesennagung,
‘Anye ko Baba nanu kɛllo kari na kanno dhɔnɛye,’
yɛbhtanyu hung!
Na chɔɔ ko hunde ngalɔkta koyokkogungge ngayɛbhbho,
yɛbhɛ ke ngaya bɔɔ kemesɛ ngalɔkta bu bararte.
12 A challi,
ga shigitɔ!
Inde yɛbhbhany anyeye,
ko nɔng ale me lɔkte kemesi :anynyoye.
Na chɔɔ ale me ga jorronɛa ngagiya kemesi :anynyoye ke ngaya anye ale kɔgɔɛ bhɛa Babaa nanuye.
13 Na lɔkte ogollo bhɛa Tumu sara ganyuye kumulɔng,
anye ale kurrugɛsɛn ke ngaya Eriya Tumu kèe kɔdhɔngɛ Chɔgɔnɛ na kɔtɔlɔmɛ dirambe.
14 Na hunde chɔɔ ogoldonyu lɔk gena sara ganyu,
anye kurrugɛsɛndɔ.
Lɔga Bhiigɛsɛna :Yesusi Zugo Lɔga Ale Ajjɛa Kuloya Tumu
15 “Hunde ibhtaganyu anye hinisi dhere,
anda bhɛkko lɔga kajjungu :anynyo.
16 Nɔng anye ale kighini Baba nanu na kittonogung Hira Irishshongngub na tɛldi ko igge kari dhul ko kingi.
17 Nɔng ngandonu a Kuloya Tumu dhugunnono lɔga ku dhere.
Na yɔk zuga marrɛa Tumu ale marrɛ nɔng ke ngaya ngaorɛo na imagɛye.
Na nɔng igge gaoyɔ ke ngaya ɛlɛo ko nɔng kari na anɛo dhɔnɛye.
18 Nɔng igge huna erroa ku bhoyoga bhichang ngakɔdhɔttungo.
Ale kowokkon na kasanunggɔ.
19 Nɔng anye ale kihon ungge muchugi na zuga marrɛa Tumu sɛgɛn ngaorronynyɛo dhul ko kingi.
Na nɔng igge ale orronyu sɛgɛn.
Na ko igge ale ɛllo basseyɔ ke ngaya anye kihɛ basseyɔye.
20 Na ngakaldonu hunde ale kòrnɛ sɛgɛnde,
ale gaoyɔ hunde dhaa anye ko Baba nanu kanno dhɔnɛ,
na kɛ̀l ko anye kari na kan dhɔnɛye.
21 Inde ibhbhagany anye hini dhereye,
aynde shik lɔga kajjɛi :anynyo na me na urrugɛsɛnde.
Na inde ibhbhagany hiniye,
ko nɔng ale ibhɛsɛn :Babaa nanu hini.
Na ko anye ale kibhɛsɛn hini sɛgɛn na chɔɔ kudhugunɛsɛn rɛa nanu hunde kani hir inongge.”
22 Na koo Yihudha ghinu Yesus na sɛɛsɛ,
“Komorue,
ngangaye bhee seni dhugunogiy agge rɛa nunu na zugo kumulɔng ngadhugunɛsɛniye a ore?”
(Nɔng ngahirra Yihudhaa Askorotu ngayo.)
23 Na yagɛsɛ :Yesusi na sɛɛsɛ,
“Nɔng hirre ibhbhagany hini dhereye,
a inde bhɛk lɔga ganyuye.
Na ko nɔng Baba nanu ale ibhɛsɛn nɔng hini.
Na anye ko Baba nanu ale kasano nɔng na kabhakko kari.
24 Nɔng hirre hini ngaibhbhaganyoye,
lɔga ganyu ngabhɛkko.
Yɔk ngalɔkta mɛa shikkoye,
a ga Babaa nanu bere ekkononyi.
Ga sabbaa nanu ngayo.
25 “Yɔk ngalɔkta kumulɔng,
a ngagiya wa koyogogungɔ hunde ngani kɛ̀l ko igge kariye.
26 Nɔng Baba nanu ale ittonnogung Kuloya Nɛnɛ sara ganyu.
Nɔng ngakuloytonu anna Irishshongngu igge.
Na ale madhdhagung lɔgɔ kumulɔng na chɔɔ bhɛsseung sabbi na kadhdhano lɔga bere koyokkogungu kumulɔng.
27 Na mɛa anye kɔdhɔttagung zany,
na kajjung bhɛa ɛlɛo ko Tumu ke na bo challa hunde nande.
Nɔng zanya kajjungu :anynyo ko na ajjungɛa :zuga bhakkɛa ba ngaya,
ngahɛtto.
Na igge ngachurnɛno na ɛngɛrso bho.
28 “Yɔk ngalɔkta wa koyokkogung na kesennagung,
‘Nɔng anye ale kɔgɔ na kowokkon na kassanungge’ annaa shikto.
Igge hunde te zuga ibhbhaganyu hinisi dhere,
anda ngaya keni kɔ̀gɛ bhɛa Babaa nanuye hinisiya gu a hɔli ke ngaya Baba nanu anɛ na jorrononyi anyeye.
29 Nɔng bhee koyokkogɛung ngalɔkta sabbɔ hunde chɔɔ ngani kurruknyɛsɛoye,
a ngaya keni ale yɛbhtɛ hunde ale urruknyɛsɛnɛye.
30 Na mɛa lɔkte kɛ̀mɛzzɛɛ ko igge dirr ninggɛ,
ke ngaya komoruya allinɛnɛa ngabaya se kugoye.
Na chɔɔ nɔng anye ngaallinɛnɛanyo.
31 Nɔng anye kemesi lɔga bere ajjanyi :Babaa nanu na kurrugɛsɛn dib ke ngaya keni zuga bhakkɛa ba kumulɔng kataktɛ bhɛa kibhɛsɛni Baba Nanu hini dhereye.
“Mɛa banda kago!”