Lɔga Kùhudhɛa Yesus Bitaniyagiye Malɔ
12
1 Na unga Gibiriya Basika hunaa dhɔynɛna illɛyte,
Yesus ogu na dagu Bitaniya,
ɔra bhakka :hira bere ibbaniseono rɛsɛyɔ kèe Alazar.
2 Na te kɔmɔniya bo,
na jhaynɔ kàbhanyisi amissɛyɔ ngonu.
Na nɔng Ngamarta hunde kay zugoye,
nɔng Alazar ko zug gena bere ɛlla bay na mulnɛna ko Yesus kari.
3 Na koo Ngamariyam dhuma mala bo ɔngɔnaa hur hur gaw dhandala kèmessono kɛte kèe nardo i galite heo butulle.
Na ɔgɛ na uhudhɛ Yesus jagarɛ na huga chɔra sabba.
Na dori toye tɔnga hur hur.
4 Na bhɛa zuga kɔbhbhɛa Yesus,
na ale kɔdhdhɛsɛna Yesus mirɔga kèleo Yihudhaa Askorotu,
nɔng tamaru na seu,
5 “Lɔ ɔng ngamalda ngakàtalnɛnɛo na birinya kajjɛo bhoyogaye?
Ngamalda ngayo na bo dhandala huna birinyaa kàgadhiyɛa hira messo zinggo oyo dhɔnɛ dhɔnga dha?”
6 Nɔng dha bere ngalɔkta ke bhɛa wonyɛsɛnɛa :bhoyokku,
ngayokkonoo.
Na yokkono ke ngaya kali kali nɔng anɛ hira ibhbho kammaya kòjjɛa birinyaa zuga kɔbhbhɛa Yesus na anɛ ɔgɔrchagi na hunde hinnonoye,
kedhdhanɛ birinya gen dari ke gɛnyɛye.
7 Na Yesus yagɛsɛ Yihudha na sɛɛsɛ,
“Ɔdda!
Ngamariyam ngamargii.
Ngamalda anna bɔɔ ojjogonyi anye kɔk ke ngaya kolea ale kɛrɛsɛi na kòjjɛanyi ihɛ jaaye.b
8 Yɔk bhoyoga ɛllo ko igge kari tii.
Nɔng anye ko igge kari tii ngakɛllo.”
9 Na ngakaldonu zuga Ayhudhi ga bo mɛra hunaa shikkɛa bhɛa Yesus ihɛa ngonuye,
hoya na kargi nɔng ko hira bɔɔ ibbaniseono rɛsɛyɔ kèe Alazar.
10 Na gɔldangɛa bibiyo doraa Tumu barara koo ɛsɛdhɛ lɔga senno kindɛ Alazar damiya bere senno kindɛ Yesus,
11 ke ngaya dha bɔɔ zuga Ayhudhi ga bo mɛra orɛ nɔng bhɛa kìbbaniseonɛa rɛsɛyɔ na dhɔyɛ lɔga madhɛa :gɔldangɛa bibiyo na yɛbhɛ Yesuse.
Lɔga Kɔyɛa :Yesusi Yerusalemɔ Na Ajjɛa :Zugu Diram
12 Na bhorre zuga dha bɔɔ honynyo gibiri bo mɛra,
shigi hunde Yesus se kun Yerusalembe.
13 Na ibhta anjo nyabha na ago na mɔttɛsɛ Yesus gɔrɔ ga bo yokkɛa lɔgɔ goore na sennɛa,
“Hossana!”
c
“Hirre lɔmmana buyna ajjɛa :Komoruyɔ Tumu na kunde,
a tuhinɛ!”
“Komoruya Isirayeli a tuhinɛ!”d
14 Na Yesus ibha sigira ku hoynɛ na irrɔgu na tɔyay tundɔ damiya bere lɔga kɔ̀gɔdhdhɛsɛna dadab sennɛa,
15 “Ngahoyta Sioniye,
bho ngaɛngɛrsi!
Ga ar Komoruya nunu a nganda kun
na bo woono sigirɔ hoynɛgiyeye.”e
16 Yɔk zuga kɔbhbhɛa nɔng dha bere sabbɔ hunde ngalɔkta kɔ̀gɔdhdhɛsɛn dadabte agga Yesusi na chɔɔ zugo nganga mesɛsɛnɛ nɔngge,
ngani kutunggɛsɛo.
Na koo ungusɛɛnɛ na kadhdhanɛ halɛ hunaa aleo Yesus banaa rɛsɛyɔ na tɔlɔma dirambe.
17 Na zuga bere ɛlla ko Yesus kala bere eleonɛa Alazar bhogoyɔ na ibbaniseonɛa rɛsɛyɔ,
koo yogo lɔga Yesusi na tɛhɛtɛy ko ba.
18 Na zuga bo mɛra hoya na kɔmɔtta nɔng ke ngaya bere shigɛ ngalɔkta bu barar ibbaniseonɛ Alazar rɛsɛyɔye.
19 Na hunaa tewa ngangaye,
yɔk zuga kɔbhbhɛa damiya Bhɛrɛsi,
daga go na se,
“Ala!
Ngazuktaye,
ga gɔnyigiyɛ,
yɔk zugo kumulɔng dha bɔɔ kɔbhɔ ngahirra.
Na mɛa kème ɛnɛng?”
Lɔga Dhugunnonɛa :Yesusi Lɔga Ale Rɛsɛa
20 Yɔk bhɛa ngazuktonu bere hɛ Yerusalemɔ na kɔgɔndɛsɛ Tumu kɔmma kala gibirinyde,
gena bere anna zuga Giriki.
21 Na yɔk koo assa Bhilibhos,
hira bhakka ɔra iho baa Gelila kènno Betesaydha na tɔllɔsɛsɛ na seyɛsɛ,
“Igge,
kenno dhɔldagiy Yesus na kɔ̀gɔnydoyɔ.”
22 Na Bhilibhos ogu na yogɛsɛ Indiriyas.
Na yɔk dhi kari na yoktɛsɛ Yesus.
23 Na Yesus yagɛsɛ na sɛɛsɛ,
“Kolea kènno Hiri Hoynɛ kɔtɔlɔmɛ diram mɛa te ja.
24 A challi,
ga shigitɔ!
Hunde gɔraya ku duguyf dhɔnɛ ba ngani kɔngɔɛsɛo na kumujjuyooye,
i ke ngakawaritonu dhɔnɛnɛ.
Na nɔng hunde mujjuaye,
dhumuttana na eggissono kawarte mɛri.
25 Nɔng hirre marrany anye na hin lɔga sabbaa nɛnɛye,
ale ujjuk rɛ.
Na nɔng inde mar lɔga sabbaa nɛnɛ na hunde ngani bhak ba ngayaye ibhbhagany anye hiniye,
ale ibbaysi rɛ na jɔana basseya iho dhul ko kingi.”g
26 Inde kachanyde,
any kɔɔbhany anye.
Na aynde ko nɔng ale i bhee kihɛ :anynyoye.
Nɔng hirre kachanyde,
ale dhɔng :Babaa nanu na ajjɛ diram.
27 “Anye mɛa kɔlɔmi lɔgɔ hinisɔ na kushurnɛn goore,
na mɛa dha ale keseni ɛnɛng?
Maya keseni,
‘Babaye,
ibbayseony ngalɔkta ale kɔchɔllanɛnɛye’ ka?
Ay,
anye bhee kesenɛ nganga ninggɛ.
Bere kuguni na kɔ̀chɔllayɛi ngalɔkta kɔchɔllanɛnɛ mɛa toyeye rɛ.
28 Na mɛa Babaye,
dhɔng sara gunyu na kɔtɔlɔmɔ diram!”
Na koo lɔk gen hoya tumɔ na se,
“Sara ganyu annaa bere kaynɛu diram na ale ngani kajjɛ diram sɛgɛn.”
29 Na zuga chillɛa ngonu bo mɛra hunaa shikkɛa ngalɔktaye gen se,
“Uy :Tumu hung!”
Na yɔk gen se,
“Yogɛsɛn :hira ekko :Tumu lɔgɔ!”
30 Na nɔng Yesus yagɛsɛ zugo na sɛɛsɛ,
“Ngalɔkta kòyokkono tumɔye agga kènno iriytɛiy :iggeu.
Ga kòyokkogonyi anye ngayo.
31 Nɔng kolea kedhdhɛa :Tumu lɔga zuga bhakkɛa ba kumulɔng a mɛa toye rɛ.
Na mɛa ko nɔng te kolea ale kàhangngɛa komoruya allinɛnɛa yɔk.
32 Na nɔng anye hunde ale kɔ̀dhɔnganany bayte,
ale kalamman zugo kumulɔng na hony gɔra nanu na yɛbhbhanyɛ anye.”
33 Nɔng dha bere yokkono ngalɔkta na kataga :zugu hunde ale rɛ ɛnɛngge.
34 Na seyɛsɛ :zugu,
“Agge lɔga kɔ̀gɔdhdhɛsɛna Damiya Tumu sennɛ,
‘Hira kɛ̀bɛrrana kèe Kirisos ale i basseyɔ dhul ko kingi.’
Na inye ngaya senɛ,
‘Hiri Hoynɛ maya ale kilak kɛyɔye go,’
a bhɛa senɛi ɛnɛng?
Na Hiri Hoynɛ a :nonni?”
35 Na koo sɛɛsɛ :Yesusi,
“Mɛa hɔldin ngani ɛllano ko igge kari bhe chinyi.
Na ga dhi ko nɔng hunde ngani ɛllo kariye na mugur ngauturbhannungu.
Nɔng hirre wo mugurɔye imag gɔrre kɔɛye.
36 Na igge hunde ngani ɛllo ko hɔldin kariye,
yɛbhɛ na te erroa gɛnyɛ.”
Na hunaa yogoa ngalɔkta na tewa ushaye,
ogu na liya yɔk.
Lɔga Zuga Ayhudhi Yesus Ngani Ngayɛbhɛayo
37 Na chɔɔ zugo ko hunde kargi ngalɔkta bu barar me :Yesusiye kumulɔng,
yɔk ngani ngayɛbhbhɛo chi.
38 Nɔng dha bere bhee zugo ngalɔkta ngayɛbhɛoye,
a ngaya se kurruknyɛsɛ :lɔga bere yokkono :hira yogɛsɛna zugo lɔga yokkono :Tumu kèe Isayase.
Yɔk ngalɔktonu sennɛ,
“Komorue,
inde bere yɛbh lɔga koyokkono :aggeuye,
a nɛng?
Na inde bere ga yira nunu bu ɔnnɛnaye,
a nɛng?”
39-40 Na sɛgɛn dha bere Isayas yokkono lɔga ngazukta dadabɔ bhokkonnɔ na se,
“Nɔng Tumu wa taganyɛa yɔk bhɛa senno ngakartɛ bho
ko bhɛa senno ngakutunggɛsɛ lɔgɔ hinisiye.
Na mɛa lɔga kemesi :anynyo bhee orɛ :yɔkku kawarre
na ungusɛɛnɛ hinisiye
na ujjugɛ lɔga gɛ gɛrsa na wokkonɛ gɔra nanu
na kibbaysɛ :anynyo,
ninggɛ.”
Na mɛa a bhee yɔk Yesus ngayɛbhɛo na kurruknyɛsɛ ngalɔktaye.
41 Nɔng Isayas ngaya senɛ ngangaye dha bere a ngaya orɛ dirama Yesusi na yokkonɛ chɔɔ lɔga gɛnyɛye.
42 Na chɔɔ ko hunde kete nganga,
yɔk gulsachina Ayhudhi ga bo mɛra dha bere yɛbhbhɛ Yesus na zugo ngayogɛsɛnɛo ke ngaya ɛngɛrsɛ zuga kɔbhbhɛa damiya Bhɛrɛsiye.
Yɔk se kako ale obhonisɛɛ doraa madhinɛnɛa zuga Ayhudhi lɔga Tumu na chukkɛyɔ.
43 Yɔk ngazukta dha bere bhee ɛngɛrsɛ bhoye,
a ngaya dirama ajjɛa :Tumu goore ngahinɛo na hinɛ bhɛa senno kɔdhɔnggɛ :zuguye.
44 Na koo Yesus yogo lɔgɔ goore na seu,
“Nɔng inde yɛbhbhany anyeye,
ngangaye yɛbhu chɔɔ hira bere ekkononyi.
Anye sɔng ngayɛbhbhanyo.
45 Na ko nɔng inde orrony anyeye,
ngangaye aru chɔɔ hira bere ekkononyi.
46 Anye huna bere kuguni ba ngaya,
bere kuguni kète hɔldin na kàlamma zuga yɛbhbhanyɛa anye kumulɔng,
na mugurɔ ngadhɔynɛ.
47 “Na nɔng inde shik lɔga ganyu na ngabhɛkkoye,
anynyo ngakujjukkanno.
Anye nɔng bere kuguni ba ngaya na kìbbaysi zugo kumulɔng.
Bhɛa kèni kègedhdhɛ lɔga gɛ ngani kùgoo.
48 Nɔng hirre marrany anye na lɔga ganyu ngahinnoye,
hira ale kedhdho lɔga gɛnyɛ ihe.
Yɔk ngalɔkta gany bere koyokkonde rɛ a gee ale ujjukkanɛ nɔng kala ale wurtuneye.
49 Anye huna bere koyogɛsɛni zugo lɔgɔ,
ga sabbaa nanu ngani kòyogɛsɛo.
Bere koyogɛsɛni ga ajjanyi :Babaa nanu ekkononyi sɔng.
Na ngalɔktonu hunde a lɔk giyong na kèe kòyogɛsɛ ɛnɛngge bere madhdhaganyi :nɛa na ajjanyiyɔ.
50 Yɔk ngalɔkta gɛnyde hunde agga ajjiyɛa basseya iho dhulde,
anye kaggayɔ.
Na aynde koyokkonɛ dib damiya bere yokkogɛanyi :Babaa nanuye.”