Kamannaa Yohanis 11

Lɔga Rɛsɛa :Alazari

1 Dha bere lɔ hirre kèe Alazar bhak Bitaniya na ilagasɔ. Na ko yɔk ngɔnigɛa kèe Ngamariyam ko na kèe Ngamarta dha bere bhakkɛ ngaɔrronu kari. 2 Nɔng ngangɔnɛa kèe Ngamariyambe anna bere uhudhdho Yesus jagarɛ mala bo ɔngɔnaa hur hur na hukko chɔɔ chɔra sabba. Na gochonga nɛnɛ bere anna ngahirra ilaga kèe Alazarte. 3 Na koo ngɔnigɛ ege hiri na kesɛɛsɛ Yesus, “Ala Komorue, hira ibhɛsɛni hini wa ilagawa goore.”

4 Na Yesus hunaa shikko ngalɔktaye, seu, “Nɔng mɛa ngahirra ilaga hung na ngarɛsso ke ngaya Tumu se kɔdhɔlay dirama nɛnɛ na ko nɔng Eriya nɛnɛ kɔdhɔnggɛ :zugu na kɔtɔlɔmɛ dirambe.” 5 Nɔng Yesus dha bere ibhɛsɛn Ngamarta ko Ngamariyam ko gɔynɛ Alazar hini goore. 6 Na hunaa shikko lɔga ilagasɛa :Alazari ngangaye, nɔng tɛu ngonu bɔɔ ihɛye ungo ramman.

7 Na koo sɛɛsɛ zuga kɔbhbhɛa nɔng, “Ga banda kàwaga baa Yudha se.”

8 Na yɔk seyɛsɛ, “Hira Madhdhiye, kèe zuga Ayhudhi annaa bɔɔ ngani senno kɔchɔiny bɛnne. Na mɛa seni wak ngonu sɛgɛn?”

9 Na nɔng yagɛsɛ na sɛɛsɛ, “Nɔng kali bhɛa bo dhɔng lɔ satinya tɔmmɔn ko ramman. Na mɛa hunde kɔtɔlɔ hirre wo kaliyɔ, bɛ ngaujjo ke ngaya bho bay ngaya anɛ kali na orɛ bhoye. 10 Na nɔng hunde kɔtɔ barɔ, uy :bɛ ke ngaya bho anɛ kɔrrɔ na hɔldina terinynyo ba ningginɛnɛye.”

11 Na hunaa yogɛsɛa lɔgɔ nganga na tewa ushaye, koo sɛɛsɛ, “Dehunya na Alazar ungussɔ, na mɛa anye keni kòk na kibbaniseo ungge.”

12 Na zuga kɔbhbhɛa nɔng seyɛsɛ, “Komorue! Nɔng hunde dhaa ungu hungge, ale bansanayɔ.” 13 Nɔng Yesus dha bere hunde yokkono ngalɔktaye, yokkono ke lɔga rɛsɛa Alazari dhere. Na yɔk zuga kɔbhbhɛa nɔng se kako mɛzzi lɔga unguny hung.

14 Na koo dhugunɛsɛ lɔgɔ dib na sɛɛsɛ, “Alazar dha bɔɔ garu. 15 Na ngaya bɔɔ ngonu ningginɛnɛanyde, anye mɛa hinisa nanu hɔllany goore ke ngaya ale yɛbhbhɛanyu gooreye. Na mɛa banda kago bhɛa nɛnɛ.”

16 Na nɔng Tomassa kènno Didimos sɛɛsɛ zuga kɔbhbhɛa Yesus kari, “Ko agge banda kago na kèrgi ko nɔng kari.”

Lɔga Ilalɛa :Yesusi Alazar Ngɔnigɛ

17 Na hunaa Yesus kɔa na dokko ngonuye, tagu hunde unga kòjjɛa Alazar dha bɔɔ te wuyte. 18 Nɔng ngaɔrra kèe Bitaniyaye a ɔra ɛlla ko Yerusalem jaa jaa 19 na zuga Ayhudhi ga bo mɛra dha bere hony na kilala Ngamarta ko Ngamariyam ke ngaya bɔɔ garsɛ :gɔynɛye. 20 Na hunaa Ngamarta shikko bhɛa Yesus kunɛaye, bhonu na kok na kɔmɔyɛsɛyɔ. Nɔng Ngamariyam dha bere dhɔynɛ dorigiye.

21 Na koo Ngamarta sɛɛsɛ Yesus, “Komorue, mɛa hunde bɔɔ tɛ ngaya, anda gochonga nanu ngani kerro. 22 Nɔng chɔɔ mɛa hunde ogol Tumu lɔkte hiniye kumulɔng, hunde anda ajjinyde, kaggayɔ.”

23 Na sɛɛsɛ :Yesusi, “Goonu bansanayɔ.”

24 Na nɔng Ngamarta yagɛsɛ na sɛɛsɛ, “Nɔng hunde ale bansana kala wurtune ibbaniseonɛa :Tumu zugoye, kaggayɔ.”

25 Na Yesus yagɛsɛ na sɛɛsɛ, “Hira kibbaniseoni zugo rɛsɛyɔ na kajjɛi bassey kani :anynyo. Na inde yɛbhbhany anyeye, chɔɔ ko hunde kere, ale bansana na i basseyɔ. 26 Na ko nɔng hirre i basseyɔ na yɛbhbhany anyeye ale dhul ko kingi ngani ngarɛsso. Na inye ngalɔkta yɛbhiyɔ oo ngayɛbhiyo?”

27 Na Ngamarta sɛɛsɛ, “Ee! Komoru, hunde ani Eriya Tumu ku Kirisos bere kènno ale kuni baye, kɛyɛbhiyɔ.”

28 Na hunaa yogoa ngalɔkta na tewa ushaye, wagu chɔɔ dori na eleo ngɔnɛ Ngamariyam na yagu dheyyɔ na sɛɛsɛ, “Hira madhdhiy wa kowa na lamienydɔ.” 29 Na Ngamariyam hunaa shikko ngalɔktaye, bana kɛhɛy na ogu na assa Yesus. 30-31 Na zuga Ayhudhi bere honynyo duhu na ilallɛa Ngamariyam, hunaa orrɛa nɔng hunde bansana kɛhɛy na bhono bhɔye, ko yɔk dha bere bansanɛ na kɔbhbhɛyɔ. Yɔk sennɛ kako kɔ igingeyɔ na kuturtɔ. Nɔng Yesus bere ɔr toye ngani kokkao na iho bhɛaa itinynyanɛnɛa ko Ngamarta.

32 Na hunaa Ngamariyam kunno chɔɔ bhɛa ihɛa :Yesusi na orro nɔngge, dhagɛ rɛ ba jagara gɛnyɛ na turɛsɛ sak sak na sɛɛsɛ, “Komorue, hunde bɔɔ tɛ ngaya anda gochonga nanu ngani kerro.”

33 Na Yesus hunaa orro Ngamariyam ko zuga Ayhudhi dhɛanɛa kari hunde ruɛye, towonydɛsɛ na ko nɔng munyu goore. 34 Na ghinu na sɛɛsɛ, “Bɔɔ ojjo ori?”

Na yɔk seyɛsɛ, “Komorue, aynda, wo gɔnya!” 35 Na Yesus kɛngɔ bhɔdhɛ na turu sak sak. 36 Na zuga Ayhudhi se, “Ga gɔnyigiyɛ! Kèe dha bere ibhɛsɛn hini goore.” 37 Na yɔk gena se, “Ngahirra ngayo hira bere oono hira kawarɛ chaga kawarɛ, na bɔɔ ngaibbaysiyo ngahirra huna ngani iho basseyɔye?”

Lɔga Ibbaniseonɛa :Yesusi Alazar Rɛsɛyɔ

38 Na Yesus munyuɛsɛ gɔrɔ gɔrɔ ko bhee dogɛ bhɛa ihɛa bhogoya bɔɔ kòjjɛa hiri. Nɔng ngabhogotonu kòjjɛ hiriye dha bere nyuginɛ bɛgiye. 39 Na Yesus sɛɛsɛ zugo, “Ga ubullana ngabɛtta dheyyɔ se.”

Na nɔng Ngamarta sɛɛsɛ Yesus, “Komorue, unga bɔɔ kòjjɛa mɛa te wuy na chɔɔ mɛa ɔngɔnayɔ.”

40 Na sɛɛsɛ :Yesusi, “Hunaa kesennaginyi, ‘Hunde yɛbhiye, ale ori dirama Tumu.’”

41 Na zugo ubullana bɛ. Na nɔng Yesus dhɔngɛsɛ tumu kawarɛ na seu, “Babaye, ngaya shikkɛanyde kutuhenydɔ. 42 Na chɔɔ hunde shikkony kali kaliye, anye kaggayɔ. Nɔng anye bhee kesenɛ ngangaye, a ngaya keni ngazukta chillɛ ngayaye kɛyɛbhɛ bhɛa ekkonɛanyi :inynyoye.”

43 Na Yesus hunaa sewa nganga na tewa ushaye, eliu Alazar goore na seu, “Alazare! Bhona!” 44 Na hiri bhona bhogoyɔ bhɛa bɔɔ kòjjɛa na bo sɛnɔ ko jagarɛ takkuynɛna charkinyaye na mumɔ takkuynɛna ruma hɛtta ko kukubha.

Na Yesus sɛɛsɛ zugo, “Ɔkta ruminyaa kàtakkuyɛa na ɔtta kogo.”

Lɔga Dogɛa :Zugu Go Na Kindɛ Yesus

45 Na zuga Ayhudhi dhaa honynyo na kilala Ngamariyam hunaa orrɛa ngalɔkta me :Yesusiye, ga bo mɛra yɛbhɛ nɔng. 46 Na yɔk gena ago na yoktɛsɛ zuga kɔbhbhɛa damiya Bhɛrɛsi lɔgaa messo :Yesusi. 47 Na koo gɔldangɛa bibiyo doraa Tumu barara ko zuga kɔbhbhɛa damiya Bhɛrɛsi mukta gulsachina Ayhudhi kedhdhɛa lɔgɔ na daga go na se, “Ngahirra me lɔga bo bararaye, maya kème ɛnɛng? 48 Nɔng mɛa hunde kùdhuyu dhɛɛ, zugo kumulɔng ale yɛbhbhɛ nɔng na chɔɔ gulsachina Rome hony na bolkɛɛ doraa na Tumu barara na hukkanɛ zuga bhora na na garsɛyɔ.”

49 Na gɔldanga bo kèleo Kayama allinɛnɛa doraa Tumu barara ngabɛrguonu ko nɔng bana na seu, “Dhaa igge lɔgɔ imaggo dhul! 50 Ngamɛa ga tunggɛsɛ shɛɛ! Ko bhee dhiynɛnɛ ngabhorra naye kumulɔng, hunde hirre dhɔnɛ kerɛ lɔga zugony, anda a challi.”

51 Yɔk ngalɔkta yokkonoye, dha bere ga ɛsɛdhdhana sabbaa nɛnɛ ngayo. Agga yogɛsɛna :Tumu ngabɛrguonu bere anɛ gɔldanga bo doraa Tumu bararaye, na dha bere dhugunɛsɛn zugo bhɛa Yesus ale rɛsɛa zuga Ayhudhi. 52 Na chɔɔ ale zuga Ayhudhi sɔng ngarɛssɛayo. Na ale rɛssɛa chɔɔ erroa Tumu bere bhasanyɛsɛnɛa ba na kumuga na koy ke dhɔnɛ. 53 Na ngakaldonu gɔldangɛa bibiyo ko zuga kɔbhbhɛa damiya Bhɛrɛsi shiktɛ na lami bhɛa senno kindɛ Yesus.

54 Na hunaa anna ngangaye, nɔng Yesus oriya zuga baa Yudha tok tok ngani ngawoyo. Na koo dhulu dari na dhi ko zuga kɔbhbhɛa nɔng na ago ɔra kèe Ebhiron iho korugiye jaa na tɛlda ngonu bhe chinyi.

55 Na hunaa senno kete kolea ammɛa :zuga Ayhudhi Gibiriya nɛ Basikaye, zuga bo mɛra hoya oriya gɛ na ago Yerusalemɔ na kemesigi damiya kònyonɛa ridhing hunde Basika ngani kussigitoye. 56 Na yɔk zuga Ayhudhi bere lamiyɛa Yesus ngonu. Na hunaa koo chillɛa doraa Tumu barara tu kɛngɔye, ghindɛ kɛngɔ na se, “Ngazukta, kèse ɛnɛng? Yesus ngaya gibirinyde ngakunno ka?” 57 Yɔk gɔldangɛa bibiyo doraa Tumu barara ko zuga kɔbhbhɛa damiya Bhɛrɛsi dha bere ajjɛ zugo lɔgɔ na hunde tɔlɔ hirre tagu bhɛa ihɛa :Yesusiye, kɔdhɔlɛsɛ na kibhigitɔ.