Lɔga Ɛlɛhɛnnanɛa :Yesusi Zuga Mesinɛna Gua Woynuny
20
1 Yɔk lɔga lɔmɛa :Komoruya tumonya zugo hɛt ko lɔkte dha bere me :hirre lɔ gua woynunyde. Nɔng dha bere bansana bhorroyɔ shaw na lameono zuga senno kagadhi na kemesɛ gua nɛnɛ. 2 Na hunaa jɔanaye shiginɛnɛ bhɛa kaliyɔ hirre dhɔnɛ gadhiyɛa dinari dhɔnɛ.b Na koo ek gua nɛnɛ woynuny na kemesɛyɔ.3 “Na bhorroyɔ kolea anda ku satinya sizzi, bansana na kɔ na jɔana zuga zinggo ningginɛna gena hunde chillɛ bhɛa gaw jor te. 4 Na senɛsɛn, ‘Ko igge ga hoya ago messɛ gua nanu woynuny, na koo kàgadheung birinyaa ungusinɛna ko zinggoa messo.’ 5 Na yɔk ago.
Na koo kali kɛngɔ ko kolea ku raya, kɔ na lameono zug gena sɛgɛn na ajjɛ zinggo damiyaa sabbune. 6 Na i na jhayny kɔ na or zug gena hunde chillɛ laayte, na ghin na senɛsɛn, ‘Ngangaye igge kali bhɛa bo chillo ngaya dirr zinggo ninggɛn kɛ ɔng?’
7 Na yɔk yagɛsɛnɛ na senɛsɛnɛ, ‘Kichillo ke ngaya hirre ajjiy zinggo ningginɛnɛye.’
Na nɔng senɛsɛn, ‘Ko igge ga hoya ago messɛ gua nanu woynuny.’
8 “Na koo i na hunde bho se kete ririnyaye, eleono hira allinɛnɛa zuga messɛa zinggo na senɛsɛn, ‘Ga eli zugaa mesinɛna kumulɔng na tɔgɔdhay bhɛa gaa honyo wurtɔ ko bhee dogɛ gaa honyo sabbɔ na gadhi birinyaa gɛ.’
9 Na zugaa kàjjɛa zinggo jhayny dha bere hony na kàgadhi dinarinya dhɔnɛ dhɔnɛ kumulɔng. 10 Na zugaa kàjjɛa zinggo sabbɔ hunaa honyoye, yɔk se kako ale kàgadhi birinyaye mɛri. Na ko yɔk kàyɛ dinarinya dhɔnɛ dhɔnɛ kumulɔng. 11 Na yɔk dha bere huna hɛyɛa birinyaa gɛ, mɛzzisɛnɛ ɛnaa guyny girɔngichinne na senɛsɛnɛ, 12 ‘Yɔk ngazuktonu wa hony wurtɔye annaa mesinɛna sati dhɔnɛ sɔng. Na nɔng agge annaa kɔdhdhiy :susɔ na kemesinɛno kali bhɛa bo dirr na kedheshshano susa awurno tuy. Na inye idhochchiy ko yɔk na gadheyi ke dhɔnɛ ɛnɛng?’
13 Na ɛnaa guyny nɔng dha bere yagɛsɛn ngazuktonu kona na senɛsɛn, ‘Ngabɛkkayta nande, anye lɔkte wa kɛddɛi bhɛa nunu ninggɛ. Nɔng inye hunaa kɛ̀mɛzzeo, annaa kìshiginɛnɛa lɔga anda kagadhiyɛinyi dinari dhɔnɛ na igomi shɛɛ chi. Ngayo nganga? A nganga. 14 Na mɛa ibha birinyaa kàgadhiyɛinyi na ogo! Anye keni kìbha birinyaa hɛtta ko ngagiya gunyde na kàgadhiɛ hiraa kajjɛi zinggo wurtɔ. 15 Nɔng anye birinyaa ganyu kemesi damite kihinnonɛ :ɛnaye. Oo wa chirkanu ngaya kanɛ hira kɛngɔ challaye ka?’
16 Na mɛa ko yɔk zukte ku sabbaye, ale a wuru nganga. Na gee ku wuruye, ale a gee ku sabbaye.”
Lɔga Tɔrɛa :Yesusi Na Dhugunnonɛa Lɔga Ale Rɛsɛa Na Bansanɛa
17 Na Yesus ko zuga kɔbhbhɛa nɔng hunaa hɛa Yerusalemɔ na ngani woyɛa gɔrɔye, nɔng kɛnga gaa ku 12 na sɛɛsɛ, 18 “Agge mɛa kɛ̀hɛ Yerusalemɔ na Hiri Hoynɛ kɔ̀gɔdhdhɛsɛn gɔldangɛa bibiyo doraa Tumu barara ko zuga madhdhɛa zugo Damiya Tumu bere kàjjɛa Muse na ujjukkanɛ na kertɔ. 19 Na hɛyɛ na ajjɛ zuga bhorinyaa anaa na kɔbhɔsɔrɔ na karaga na kilagatɔ. Na nɔng ale kòy na sani na unga ku sizzi bansana rɛsɛyɔ.”
Lɔga Ghinɛa :Mamaa Yaykobi ko Yohanisi Yesus
20 Na koo tɛriya Zɛbɛdosi dhiya ko erroa gɛnyɛ na hoya chɔɔ bhɛa ihɛa :Yesusi. Na nɔng tɔgɔdhɛsɛ Yesus kɔmma na tɔllɔhɛsɛ na kemesɛsɛ lɔk gena.
21 Na ghinu :Yesusi na sɛɛsɛ, “Hini ɔng?”
Na nɔng tɛri yagɛsɛ na sɛɛsɛ, “Keni igommo na kolea ale lɔmɛi zugo, ibha ngaerroya gany ku rammande na kona oy bhɛa nunu sɛtɛn, kona oy bhɛa nunu kangitɛn.”
22 Na nɔng Yesus sɛɛsɛ erroa ngatɛritonu, “Ngalɔkta ghinnonyuye imaggoyɔ. Ngangaye ahaye ale kamayi kombiyɔye,c ko igge ale matto na ɔanoyɔ?”
Na yɔk igommo na se, “Ee, ale kɔanoyɔ!”
23 Na nɔng sɛɛsɛ, “Yɔk ahaye ale kamayi kombiyɔye, ko igge ale matto chi. Na nɔng inde oy zugo sɛtɛna nanu ko kangitɛna nanuye, anye ngakaniyo. Yɔk ngahandonu a hana kòjjo kɔk na kènno kɛ̀tɛldɛ :zukte bere sennana :Babaa nanuye.”
24 Na zuga kɔbhbhɛa Yesus ku tɔmmɔn hunaa shikkɛa ngalɔktaye, dɛbɛ na wologo zugaa ku gɔ̀ynggɛ. 25 Na nɔng Yesus eleo yɔk kumulɔng na mugɛsɛ bhee dhɔnɛ na sɛɛsɛ, “Nɔng igge gao chi hunde komortɛna bhorinya anaa allinɛnɛ zuga gɛ na adhɛsɛnɛ lɔgɔ damite hinɛye na kɛtɛngɛrɛ ke ngaya anɛ zuga lɔmmɛa buynde. 26 Na nɔng igge maya nganga ngamessoo. Na hunde bhɛa nu lɔ inde hin buynde, nɔng maya lachchana rɛ na kachchung igge kumulɔng. 27 Na ko nɔng inde hin bhɛa senno keteɛ hira bo bhɛa nuye, maya lachchana rɛ goore na a gaymaya nu. 28 Anye bhee kesennagɛung ngangaye, a ore go! Hiri Hoynɛ huna bere kunno, se katagay zugo na kete yekkuya rɛsɛa zugo ga mɛra. Nɔng bhee bere kunɛ na katagaytɛ :zugu ngayo.”
Lɔga Ibbaysiyɛa :Yesusi Zuga Ku Ramman Kawarɛ Chaga
29 Na Yesus ko zuga kɔbhbhɛa nɔng hunaa dhɔttɛa Yariko na ngani hɛaye, yɔk zuga bo mɛra kɔbhɔ yɔk. 30 Na bere ganggu dheyyɔ ngonu lɔmma zukte kawarɛ chagi ku ramman ɛl bay. Na hunaa shikkɛa hunde Yesus dho ngonuye, yokto lɔgɔ goore na se, “Komorue! Ashaya Dawiy! Chirbhisieyyɔ!” 31 Na wologo :zugu na kɛtɛldi laay. Na yɔk kalda yokto lɔgɔ goore dhogoy na se, “Komorue! Ashaya Dawiy! Chirbhisieyyɔ!” 32 Na Yesus daga ba na eliu yɔk na ghinu na sɛɛsɛ, “Senno kèmessung ɛnɛng?” 33 Na yɔk yaktɛsɛ na seyɛsɛ, “Kenno kàrto bho!” 34 Na Yesus towonydɛsɛ :ngazuktonu kawarɛ chakte. Na kumu kawara gɛ na yɔk argi bho nga hung, na kɔbhɔ nɔng.