Lɔga Yogɛsɛna ꞉Tumu Yonas Na Ngashiko
1
1 Kali kona Tumu yogɛsɛ liya Amate kènno Yonas lɔgɔ na sɛɛsɛ,
2 "Bana og ngaɔrronu bu ke Nɛnɛweye.
Anye bare kɔjɔyau lɔga gɛ gɛrsa,
no ibaytɔ."
3 Na Yonas nɔ kedhɛsɛ lɔga Tumu ba na kajar Tumu Tersesegiyea.
Na bana na ogu chɔɔ ɔra kènno Yobe.
Na jɔa gonggula bo kɔa Tersesegiye na gadhiu birinya na dhɔyu lɔga yogɛsɛna ꞉Tumu na tunugu gonggul na ogu.
4 Na gonggul hunaa kɔa na dokko ma kɛrghɛnde,
Tumu kuyɛy huroyte dhandali na ma bhɔtɛ na ajo gonggul ngani kubɛb.
5 Na zuga kuliɛa gonggul dɛɛbɛ na tɛngɛrɛ bho na ogolo tumoa gɛ na kɛyayɔ.
Na ibhta ahaa ɛla gonggulɔ na ujuktɛsɛ ma na kɔta gonggul na kete hɔlhɔli.
Na Yonas nɔ ungu gonggulɔ bhɛa unguny toye luy.
6 Na gulsaa gongguluny koo asa nɔ bhɛa ungusɛa na ibanisiu na sɛɛsɛ,
"Ay!
Nganga ngaungusi!
Bana na ogol Tumua nunu.
Kako kariy na kibaysieytɔ."
7 Na zuga kuliɛa gonggul se,
"Ga,
kèmesigi dambi na kàtaga hirre lɔ ridhing na honynyɛ ngalɔktaye."
Na mesigi na te Yonas.
8 Na ululumana na seyɛsɛ,
"Ga,
dhugunogi lɔgɔ!
Ngalɔkta hɛsagiyɛ ageye tisana noy?
Na inye ani hirre lɔkte guny mesiye a ɔng?
Na kuni ori?
Na kuni ba inong?
Na ani bhor inong?"
9 Na nɔ sɛɛsɛ,
"Anye kani hira Isirayeli na kɛyɛbi Komoru Tumu nabere ghendono ba ko tumu na iho tumɔ."
10 Na dhugunɛsɛ lɔga bare messo ꞉nɛa na taga bhɛa bare jorɛa Tumu.
Na dɛɛbɛ na seyɛsɛ,
"Na ngalɔkta gɛrɛ ku ngangaye bare mesi kɛɔng?"
11 Na hunaa huroy mɛdhaye,
yɔk ghini Yonas na seyɛsɛ,
"Na mɛya kèmesiny ɛnɛng na ma kalaldayɔ?"
12 Na nɔ sɛɛsɛ,
"Ngalɔkta hɛsagungɛye kaggayɔ hunde mesinyanɛ lɔga ganyuye.
Na hunde ujuktaganyu ngamaya toyeye,
lalnanɛyɔ."
13 Na yɔk zuga kuliɛa gonggul se kayaga gonggul dheyɔ.
Na ilobo tɛr tɛr na ngani ngaɔninyawo.
Na ma irrɔkta dhɛ dhɛ dhɛ.
14 Na yɔk zugo turtɛsɛ Tumu na seyɛsɛ,
"Komoru Tumuye;
hunde kujugɛsɛno ngahirra ma toyeye,
gigey ngaajiy.
Anna hinoni ꞉inyo tɔlɔng na kemeso ngangaye."
15 Na yɔk ibhta Yonas na ujuktɛsɛ ma na maa bo ɔnɛna lalda.
16 Na yɔk hunaa orɛa ngalɔktaye,
tɛngɛrɛ Tumu gore na uduldɛsɛ Tumu go na bhiigi ko Tumu lɔgɔ.
17 Na nɔ Tumu iwa urgusiya bo gore na gɔyu Yonas.
Na nɔ saniu urgusiyɔ kɛngɔ ungo sizzi ko kaliɛna sizzi.