50
1 Na Yoseb tungɛ chɔgɔnɛ tundɔ na turu sak sak.a
2 Na koo yogɛsɛ zuga bhɛllɛa zuga rɛsa na ojjɛsɛnɛa rɛ zibu na kɔdhɔrɔgɔ na kɔtɔnga hurhur na ngamujusi.
Na koo yɔk hoya na mesigi damiya nɛ
3 na oytɛsɛ zibu ungo 40.
Na zuga Gibsi turgi ungo 70 kumulɔng ke ngaya rɛsɛ :Yaykobiye.
4 Na hunaa ibhta duhu na tewa ushaye,
Yoseb sɛɛsɛ gulsachinaa komoruya Gibsi chicho,
“Kesea hunde kani hirre kɔlɔmi diram bhɛa nuye ga ago na ghindogonyu komoruya Gibsi na seyɛsɛ ɛnɛnggeo,
5 ‘Wa yokkogiy Yosebi lɔgɔ na kèe kèseaginy,
se dha bɔɔ huna baba nɛnɛ senno kere,
bhiigɛsɛn :nɛa lɔgɔ.
Na hunde ale rɛsse,
kɔgɛ na koy bhogoya dha bere tallana chɔgɔnɛ iho Kananɔ.
Na mɛa se igomɛsɛ na kok na koy chɔgɔnɛ na kawagayɔ.’”
6 Na komoruya Gibsi hunaa shikko ngalɔktaye,
sɛɛsɛ,
“Ok na oy chogonu damiya bɔɔ bhiigɛsɛni lɔgɔ.”
7-8 Na Yoseb bana na ogo na koy chɔgɔnɛ Kananɔ.
Yɔk dha bere zuga gɛnyɛ ko gɔynggɛ ko bhɛnɛna chɔgɔnɛ kumulɔng dhiyɛ kari.
Na ko yɔk gulsachinaa komoruya Gibsi chicho ko zuga bibiyo ɛlla doraa komoruny marakkɛa lɔgɔ ko zuga bibiyo mukkinyana Gibsigiye kɔbhɔ Yoseb.
Na dha bere Gesemɔ dhɔynɛ :erroa chicho ko :mɛdɛrniu ko :beo ko :tenu sɔng.
9 Na chɔɔ bholisa bo mɛra woyɛa harteyaye ko ga woyɛa gala ghurtɛa :harteyau ko yɔk kɔbhɔ Yoseb.
Yɔk dha bere zuga kɔbhbhɛa nɔng agga bo mɛra dhogoy.
10 Na hunaa hɛa na dokkɛa bhɛa ujjɛa :zugu liwa kèe Atal iho kidhoa kèe Yordanos tandɔye,
ara wuy na turgi goore.
Na Yoseb ibhu chɔgɔnɛ duhu ngonu ungo issabbay.
11 Na zuga bhakkɛa Kanan hunaa orrɛa zugo hunde ibhbhɛ duhu ngonuye,
se,
“Yee!
Kèe zuga Gibsi ibhbhɛ duhua bo na ruɛ goore dhogoy.”
Na ngonu wa ibhɛ duhuye tɔgɔndɛsɛ sarre kèe Abel Miziram.b
12 Na erroa Yaykobi mesigi damiya bere yogɛsɛna :chɔgɔnɛ.
13 Na koo ibhta chɔgɔnɛ na aytɛ Kananɔ na ojjigi bhogoya kèe Magabela iho Mamirɛgiye bere tallana :Awurahami bhɛa hira bhora Hitani kèe Ebherom.
14 Na Yoseb hunaa ojja chɔgɔnɛ na tewa ushaye,
dhi ko gɔynggɛ ko zugaa ojjɛa chɔgɔnɛ kari na waga Gibsigiye.
Lɔga Chirbhisiyɛa :Yosebi Gochonginyaa Gɛnyɛ
15 Na hunaa ojjɛa hiri na wokkonɛaye,
Yoseb gɔynggɛ mɛzi kɛngɔ na se,
“Na mɛa hunde Yoseb kighiney lɔga bere kɛddɛa na katamariyɔ,
agge kèse ɛnɛng?”
16 Na koo ayɛ hir kona lɔgɔ na ege na koyogɛsɛ Yoseb lɔgɔ na kesɛɛsɛ,
“Kèe keseyaginy ɛnɛnggeo,
‘Huna bere baba nunu ngani kerrao,
annaa yokkogiy lɔgɔ na sennagiy,
17 “Lɔga bere ɛddɛyɛa :goungguu bhɛa nunu bo dhandala ujuk na sɛɛsɛ,
‘Any kagarayɛ!’”’
Na mɛa ujuk lɔga bere kɛddɛo :aggeu,
zuga kagachcho Tumu Komoruya bere babaa nunu,
na kagarayɛ.”
Na Yoseb hunaa shikko ngalɔktaye,
turu goore.
18 Na koo gɔynggɛ hoya na tɔgɔndɛsɛ kɔmma na seyɛsɛ,
“Agge kanno gaymanyaa gunyu.”
19 Na nɔng Yoseb yagɛsɛ na sɛɛsɛ,
“Te may!
Bho ngaɛngɛrso.
Anye Tumu ngakaniyo.
20 Nɔng igge annaa bere mesonyu gɛrrɛng gɛrrɛng chi.
Na nɔng Tumu annaa bere bhɔdha ngalɔktonu na tewa challi na kabayɛ zuga bo mɛra.
21 Na mɛa bho ngaɛngɛrso.
Ale igge ko erroa gu kajjung ahaye hinnoye ko amissɛ kumulɔng.”
Na yogɛsɛ ngalɔkta hinisa lalna haalɛ na lamma hinisi.
Lɔga Rɛsɛa :Yosebi
22 Na Yoseb ko bhɛnɛna babaa nɛnɛ kumulɔng bhaga Gibsi.
Na oynyaa bere bhagɛa :nɛa ba kumulɔng a 110.
23 Na bhagu ba ko bhee orɛ ashaa Ebhironi.
Na chɔɔ bou erroa ngani hudhukkinyana irrittono :eriya Minase kèe Makir.
24 Na Yoseb sɛɛsɛ gɔynggɛ,
“Anye mɛa kolea senno kèrɛ te ja.
Na nɔng Tumu ale kun na ɛanung na dhɔtto ngabaya na zigɛung baa bere bhiigɛsɛna Awuraham ko Isak ko Yaykob.
25 Na mɛa ga bhiiktaganyu lɔgɔ na hunde Tumu ale kun na ɛanung na zigɛung ngabaonu bere bhiigɛsɛn kokonginyaa gaye,
ibhta gigaa ganyu na lɔgɔnɔ ngabaonu.”
Na yɔk bhiiktɛsɛ lɔgɔ.
26 Na Yoseb hunaa oynyaa gɛnyɛ ku 110 dhuytɛaye,
koo ere.
Na tonyo :zugu zibunyaye na rɛa nɛnɛ dhɔrɔgu na oytɛsɛ kɛya kɔ̀gɔdhdhana ku gɔnay toye na ojjigi Gibsigiye.