Lɔga Kennɛnɛa :Tɛri Ko :Hiri
19
1 Na Yesus hunaa yogoa ngalɔkta na tewa ushaye, dhɔyu baa Gelila na ogu baa iho kidhoa Yordanosi tandɔ kèe Yuhudha. 2 Na zuga bo mɛra kɔbhɔ nɔng. Na nɔng ibbaysiu gee ilagassɛye ngonu.3 Na zuga kɔbhbhɛa damiya Bhɛrɛsi gena hoya bhɛa nɛnɛ na killobotɔ. Na ghini na seyɛsɛ, “Ngangaye hiri bhɛa dhɔyɛa tɛriya nɛnɛ na kennɛnɛa damite lɔkte hinnono :nɛaye, bere Damiya Tumu ajjiy :Muse kìgombo, oo ngani?”
4 Na nɔng Yesus yagɛsɛ na sɛɛsɛ, “Ngangaye igge lɔga Tumu bere ngani toyito? Nɔng bɛrgua bere kèghendonɛa aha kumulɔng, Komoru Tumu annaa bere ghendono zugo na kona ojjo ke may, kona ojjo ke ngahi, 5 na koo senno, ‘Nganda a bhee bere keghendonɛ yɔk na hira maya dhɔyɛ jɔnɛ ko chɔgɔnɛ na arrabhbhannɛnɛ ko tɛriya nɛnɛ, na rammane anɛ rɛa dhɔnɛnaye. 6 Na yɔk kalda ngangaye te rɛa dhɔnɛna, na ramman ngani ngayo. Na mɛa zuga bere arrabhbhanna :Tumu, hiriyɔ ngakedhdhi.”
7 Na yɔk zugaa kɔbhbhɛa damiya Bhɛrɛsi ghini na seyɛsɛ, “Na kèe Muse nɔng annaa bere igomoa na sewa, ‘Hiri hunde se kegendɛ ko tɛriye, maya kɔdhdhɛsɛn lɔga kennɛnɛa dadabɔ na ajjɛ na chuktɔ,’ Na nɔng bere nganga se kɛ ɔng?”
8 Na nɔng Yesus yagɛsɛ na sɛɛsɛ, “Nɔng Muse bhee bere igommogɛung bhɛa kennɛnɛo ko tɛrroa guye, a ngaya sabbi annɛung dhandaliye. Yɔk ngalɔkta ku ngangaye bere sabbɔ bɛrgua bere kèghendonɛa aha kumulɔng, nganga ngaannao. 9 Na nɔng mɛa anye kesennagung, hirre kennɛ ko tɛriya nɛnɛ nganga hung hunde ko hir kona kari ngani kɛtɛldito na gam konaye, me lollumo.”
10 Na zuga kɔbhbhɛa nɔng seyɛsɛ, “Hunde lɔga hiri ko tɛriyny a ngangaye, dhaa hunde ngakàgamnɛ a challi ni.”
11 Na sɛɛsɛ :Yesusi, “Lɔkte ku ngangaye zugo kumulɔng ngahinnɛo. Hinnɛ gee bere kàjjɛ bhɛa kènno ngagamnɛye sɔng. 12 Anye bhee kesenɛ ngangaye, a ngaya zuga ngagamnɛnao gena anɛ ga dha bere kùhudhukkono ke zuga ngagamnɛnao chi.a Na gena anɛ ga messɛa :zug genne tɔllɔng na ngagamnɛ, na gena anɛ ga ngidhdhɛa lɔgɔ :eygo ke bhɛa senno katagaytɛ Komoruya tumonyb sɔngge. Na mɛa ko nɔng hirre hin bhɛa senno kabhagɛ ba gamma ninggɛnde, sɛɛ kabhak.”
Lɔga Tuhɛa :Yesusi Erroa Ngani Chicho
13 Na koo zugo hoyɛy erroa ngani chicho na ayɛsɛ Yesus na katadhɛ siyɔ na kogolɛsɛ Tumu. Na yɔk zuga kɔbhbhɛa nɔng wologo zugaa honynyɛa erro.
14 Na Yesus sɛɛsɛ zuga kɔbhbhɛa nɔng, “Ayɛ erro kohoya bhɛa nanu, ngakanyɛo, ke ngaya zukte lɔ :Tumuye heo ko ngaerroya rɛye.” 15 Na hunaa tadhɛa erro sɛnɔ na tewa ushaye, bana na dhɔyu ngonu na ogo.
Lɔga Ghinnɛnɛa Hira Aha Mɛra
16 Na koo hir kona ko gɔ̀rrè Yesusiye na ghinu na sɛɛsɛ, “Hira madhdhiy, ngangaye bhɛa keni kɔ̀jɔyay basseya iho dhul, maya lɔkte chal kemesiye a lɔk giyong?”
17 Na yagɛsɛ :Yesusi na sɛɛsɛ, “Na inye ghinony gee lɔkte challi kɛ ɔng? Nɔng inde chalde a Tumu dhɔnɛnɛ. Na hunde seni ok gɔra basseynyde, bhɛk lɔga ɛlla damiya nɛnɛ toye.”
18 Na ghinu :hiriyɔ na sɛɛsɛ, “Ngalɔktonu a lɔk giyong?”
Na nɔng yagɛsɛ na sɛɛsɛ, “Agga sennɛa, ‘Hiri nganisi, lollumo ngamesi, ngaogornɛni, zugo lɔga ku butomo ngamagɛsɛni, 19 chogonu ko junu tɛngɛrtɔ’, na ‘hira bhakko kari ibhɛsɛ hini na teyel huna rɛa nunu.’”c
20 Na nɔng tɛgayaa gina sɛɛsɛ, “Na kèe yɔk ngalɔkta kumulɔng bere kɛbhɛkka. Na gee ngani ɛllaganyɛ geleye a giyong? 21 Na yagɛsɛ :Yesusi na sɛɛsɛ, “Hunde hini bhɛa seni teyɛ hira hɔla hurr ridhing ningginɛnaye, ok tallɛy ahaa lɔmi kumulɔng na birinya aynɛ bhoyoga. Na inye ale kɛdhdhɛttanniny :Tumu ahaa bo dhandala tumɔ. Na hunde mesu nganga na te ushaye, wo na kɔbhanydɔ!”
22 Na tɛgay hunaa shikko ngalɔktaye, nɔng munyuɛsɛ gɔrɔ gɔrɔ na ogo ke ngaya dha bere lɔmɛ ahaa bo mɛraye.
23 Na Yesus sɛɛsɛ zuga kɔbhbhɛa nɔng, “Ga shigitɔ! Zuga aha mɛra bhɛa senno kɔtɔlɔmɛ ꞉Komoruya tumony a dhandali. 24 Na ga kɔ̀tɔrrɛung na taga shɛɛ! Chɔɔ hira aha mɛra bhɛa kènno kɔtɔlɔmɛ :Tumu, hunde galisey kudhul hologuna marsiny, anda a bhaseni.”
25 Na zuga kɔbhbhɛa nɔng hunaa shikkɛa ngalɔktaye iwachiyɛ goore na ghini na seyɛsɛ, “Aay! Na hunde a ngangaye, ale ba :nonni?”
26 Na nɔng gɔnyu yɔk na sɛɛsɛ, “Ngalɔkta bhee ɔanɛ :hiriyɔ ninggɛ. Na nɔng bhɛa Tumu, lɔgɔ ɔninya kumulɔng.”
27 Na sɛɛsɛ :Betirosi, “Nɔng agge annaa bere kɔdhɔtto ahaa gayo kumulɔng na kɔ̀ɔbhtinyɔ inye! Na ahaye ale kɔjɔanoye a ɔng?”
28 Na sɛɛsɛ :Yesusi, “Ga shigitɔ! Bɛrgua ale bhɔdhɛa :Tumu lɔga bany kumulɔng ke chagi, hunde ale Hiri Hoynɛ i alleya nɛnɛ komorumo bo lɔmma dirambe, ko igge ngazukta kɔbhbhanyu anye ku 12de, ale ɛllo alleyiya komorumo ku 12 na kedhdho lɔga bhorinyaa Isirayeli ku 12. 29 Yɔk zukte dhɔttɛ doriyoa gɛ oo gɔynggɛ oo ngɔnigɛ oo choginggɛ oo jugɛd oo erro oo gunya ke bhɛa kɔbhbhɛanyɛa anyeye, ale kɛ̀dhdhɛttan na lɔga gɛ jorronɛ ga bere sabbune jagarɛ kɛngi 100 na chɔɔ kàjjɛ basseya iho dhul. 30 Na ngazukta bu mɛr ku sabbaye, yɔk ale a wuru. Na ngagiya bu mɛr ku wuruye ale a gee ku sabbaye.”