Lɔga Kɔyɛa :Yesusi Yerusalemɔ Na Ajjɛa :Zugu Diram
21
1 Na Yesus ko zuga kɔbhbhɛa nɔng hunaa hɛa na dokkɛa Yerusalem jaa ɔra iho Kutula Girarruny kèleo Betebhagaye, Yesus ibha zuga kɔbhbhɛa nɔng gee ku ramman na egu, 2 na sɛɛsɛ, “Ago ngaɔrronu i sabbɔye. Na hunde hɛo na dokko ngoonuye, aleo jɔano sigirte kìchib ko hoynɛye, na ɔkta na tɔktayɔ. 3 Na hunde ghinnong :hir konnɔye, seyɛsɛ, ‘Hin :Komoruyɔ,’ na nɔng aleo igommogung ke tiri.”4 Nɔng dha bere bhee anɛ ngangaye, a ngaya se kurruknyɛsɛ lɔga bere yokkono :hira yogɛsɛna zugo lɔga yokkono :Tumuye. Yɔk ngalɔktonu sennɛ, 5 “Ga yoktɛsɛ ngahoyta Sioniye na seyɛsɛ, ‘Ga gɔnya! Komoruya nunu a ngandonu lachchana rɛ na kun gɔ̀rrè nunde sigirɔ, na bo woono sigirɔ hoynɛgiyeye.’”
6 Na zuga kɔbhbhɛa Yesus ago na mesigi damiyaa madhɛsɛna :nɛa. 7 Na tɔkta sigiraa gina ko hoynɛ na ibhta ruminyaa gɛ ibhɛa chiwan na tɛhɛtɛsɛ tundɔ na irrɔgu :Yesusi na tɛay bay na tɔyayɛy. 8 Na zuga bo mɛra gena ko yɔk ibhta ruminyaa gɛ ibhɛa chiwan na tɛhɛtɛsɛ ganggu, na gena bhiikta bhalloga na tɛhɛtɛsɛ gɔrɔ. 9 Na zuga bere ɛllanɛa sabbɔ ko ga kɔbhinyana wurtɔ bere yokkonɛa lɔgɔ goore na sennɛa,
“Hossana!a Ashaya Dawiy, kèterrisaninydɔ!”
“Hirre kun na bo lɔmmana buyna ajjɛa :Komoruyɔ Tumuye, a tuhinɛ!”
“Hossana! Diram any ke na Tumua iho surr tumɔ tundɔ.”
10 Na hunaa Yesus dokko Yerusalembe, zuga orony kumulɔng dɛlɛ na jalbhana goore na ghindɛ na se, “Nganda a nɛng?”
11 Na zugaa bo mɛra dhɛanɛa ko nɔng yaktɛsɛ na seyɛsɛ, “Nganda a Yesus, hira yogɛsɛna zugo lɔga yokkono :Tumu bere chillana baa Gelila ɔra kèe Naziret.”
Lɔga Chugɛa :Yesusi Zuga Dhakkɛa Gaw Doraa Tumu Barara
12 Na Yesus koo tunnugu doraa Tumu barara tu kɛngɔ, na bhassau zuga dhakkɛa gaw ngonu na chugu. Na ubullanu alleyiya zuga chachchɛa birinya ko ga zuga talnɛnɛa yikka. 13 Na yogɛsɛ lɔgɔ na sɛɛsɛ, “Lɔga Tumu bere kɔ̀gɔdhdhɛsɛna dadab sennɛ, ‘Doraa nanu ale kèli doraa kallinɛnɛo ko zugo.’ Na nɔng igge dhaa bhɔdhto ke bhogoya chimtanyayuny!”
14 Na koo zuga ku anyakuwanda ko ga kawarɛ chaga hoya na assa nɔng doraa Tumu barara ngonu na ibbaysiu. 15 Na yɔk gɔldangɛa bibiyo doraa Tumu barara ko ga madhdhɛa zugo Damiya Tumu bere kàjjɛa Muse hunaa orrɛa ngalɔkta bu kìwachi wa me :Yesusiye, ko erro hunde ɛl doraa Tumu barara tu kɛngɔ na yokkonɛ lɔgɔ goore na sennɛ, ‘Hossana! Ashaya Dawiy, kèterrisaninydɔye,’ yɔk hinisi ngɔ na churu goore.
16 Na ghini Yesus na seyɛsɛ, “Ngangaye ngalɔkta yokkɛ ngaerroyaye shigi chi dha?”
Na nɔng yagɛsɛ na sɛɛsɛ, “Ee, kishigi chi. Yɔk lɔga ɛlla dadaba lɔga Tumu a ngagiya sennɛ,
‘Komoru Tumu, inye wa madhɛsɛu erroa bibiyo
ko ga ngani ahunɛna bhɛa eterrisanɛinyɛa inyeye.’ Na ngalɔkta igge bere ngani toyito?”
17 Na nɔng koo dhɔyu yɔk na bana ɔr toye na ogo Bitaniyagiye na tungu ngonu.
Lɔga Chɔrɛa :Yesusi Chamochi
18 Na bhorroyɔ shaw hunaa bansana na wokkono ɔrte, dhagu :hozzo gɔrɔ. 19 Na koo daga chamochi kona ganggu dheyyɔ, na ogo jaa na gɔnyu na aru hunde lɔ nyawa sɔng na kawarɛ ninggɛ dhulde. Na sɛɛsɛ, “Ngakɛta, kalda wurtɔ kawarɛ sɛgɛn ngadhungngani dhul ko kingi!” na chamochiyaa gina dhɔrɔgu ke tiri.
20 Na zuga kɔbhbhɛa nɔng hunaa orrɛa ngalɔktaye, iwachiyɛ na se, “Na chamochi shaw hung wa dhɔrɔgu ɛnɛng?”
21 Na yagɛsɛ :Yesusi na sɛɛsɛ, “Ga shigitɔ! Hunde yɛbhɛ Tumu na ko hinisi ngadhaginɛno, anda messo lɔga hɛtta ko ngagiya wa kème bhɛa ngachamochitaye. Na chɔɔ anda hunde senɛsɛno ngakutulda, ‘Bɔchiyaa ngaya na ngɔyɛsɛ yirisi toyeye,’ buchinya na kɔyɔ. 22 Na mɛa igge hunde yɛbhɛ Tumu dhere, anda lɔkte ghinno hunde allinɛno ko nɔngge kumulɔng jɔanoyɔ.”
Lɔga Kìghinɛa Yesus Hunde Buyn Ajjɛ :Noyye
23 Na Yesus koo ogu doraa Tumu barara tu kɛngɔ na madhu zugo. Na hunaa ngani madhdha zugoye, yɔk gɔldangɛa bibiyo doraa Tumu barara ko zuga Ayhudhi bibiyo hoya gɔ̀rrè nɛnde na ghini na seyɛsɛ, “Ngangaye ngalɔkta mesi buyna nini? Na inde ajjiny buyn na me ngalɔktaye, a nɛng?”
24 Na nɔng yagɛsɛ na sɛɛsɛ, “Ga ko anye kìghinong kalde dhɔnɛ. Na hunde yakkaganyuye, ko anye kòyogogung hunde ngalɔkta kemesi buyna niniye. 25 Na ngangaye ngabuyndonu bere churɛ :Yohanisi zugoye, bere anna ajjɛa ꞉Tumu oo anna ajjɛa :zugu?”
Na yɔk mɛzzi kɛngɔ na se, “Nɔng mɛa hunde kèseyɛsɛ, ‘Bere ajjɛa ꞉Tumu,’ nɔng ghinney na sennagiy, ‘Na bere ngayɛbhbhooye?’ 26 Na chɔɔ hunde kèseyɛsɛ, ‘Bere ajjɛa ꞉zugu,’ nɔng agge kɛ̀ngɛrɛ bho ke ngaya zugo kumulɔng bɔɔ gunyɛ Yohanis ke hira yogɛsɛna zugo lɔga yokkono ꞉Tumuye.”
27 Na yaktɛsɛ Yesus na seyɛsɛ, “Agge hunde bere ajjɛ :noyye, kimaggoyɔ.” Na ko nɔng sɛɛsɛ, “Ko anye hunde ngalɔkta kemesi buyna niniye, ngakoyokkogungo.”
Lɔga Ɛlɛhɛnnanɛa :Yesusi Lɔga Erroa Ku Ramman Ekko :Chɔgɔnɛ
28 Na koo sɛɛsɛ yɔk, “Ga kɛ̀lɛhɛnagung lɔk gena na yaktaganyu hunde kighinnongge! Dha bere hir kona lɔ erroye may ku ramman. Na kɔ na senɛsɛn na bo, ‘Ngakalda ok guyɔ na ulal woyn.’
29 Na nɔng eri yagɛsɛn na senɛsɛn, ‘Anye kamari. Ngakɔgɔyo.’ Na koo i na ungusɛsɛn lɔgɔ na kɔ guyɔ.
30 Na chɔgɔnɛ dha bere kɔ na madhɛsɛn naa chinynyo lɔgɔ damiyaa naa sabbune na kok guyɔ. Na eri igomɛsɛn na senɛsɛn, ‘Kɔgɔyɔ baba.’ Na ngakɔyo.
31 Na mɛa bhɛa ngaerroya ku rammande, inde igomɛsɛn chɔgɔnɛye a inong?
Na yɔk yaktɛsɛ na seyɛsɛ, ‘A nganda buye!’
Na sɛɛsɛ :Yesusi, “Ga shigitɔ! Yɔk chɔɔ zuga jimmanungɛa igge gɔrɔ sabbɔ na hɛa bhɛa lɔmɛa :Tumu zugo, a zuga mukkɛa gharata ko ga messɛa lollumo. 32 Anye bhee kesennagɛung ngangaye, a ngaya huna bere Yohanis kunno bhɛa nu na kamadhagung bhɛa bhagɛo ba ke zuga ridhing ningginɛna, igge ngani yɛbhtɛoye. Na yɔk zuga mukkɛa gharata ko ga messɛa lollumo, bere yɛbhta lɔga gɛnyɛ. Na chɔɔ huna bere orro ngalɔkta Yohanisiye, igge annaa nɔng ngani yɛbhtao na lɔga gu gɛrsa ujjuktao na waktaayo gɔra Tumu.”
Lɔga Ɛlɛhɛnnanɛa :Yesusi Lɔga Zuga Kɔ̀dhɔyɛsɛna Gua Woynuny
33 “Na mɛa ga kɛ̀lɛhɛnagung lɔk gena sɛgɛn. Dha bere lɔ hirre lɔ gua woynuny.b Na koo luk dhey dhey kumulɔng na bhɔgɛsɛn loga ale kùchudhdhanɛa. Na kɔdhdhɛsɛn chɔɔ hayua kɛ̀bhɛgɛa. Na koo dhɔyɛsɛn zuga kɔhinɛna gena na kɛbhɛgɛ na ale kagadhi ahaa suneonɛa gena. Na nɔng kɔ ɔr konnɔ rɛna. 34 Na hunaa tewa kolea suniynyde, koo ekkono zuga kachchɛa nɔng gena chɔɔ bhɛa zuga bere dhɔyɛsɛna gu na kaytɛ kawara woynuny gen na kayɛsɛyɔ.
35 Na yɔk zuga bere kɔ̀dhɔyɛsɛna gu ibhbhɛ zugaa kèkkono na kona dhakkɛyɔ, kona nissɛyɔ na naa dhɔynɛna ujjɛ bɛnne. 36 Na nɔng ɛnaa guyny dha bere ibhbhana gee ko mɛri ko ga bare sabbune ngahɛttao na ek sɛgɛn. Na yɔk zuga bere kɔ̀dhɔyɛsɛna gu ibhbhɛ yɔk na messɛ damiya bare gaa kèkkono sabbɔ sɛgɛn. 37 Na koo wurtɔ ɛnaa guyny se, ‘Nɔng mɛa eriya nanu ale ɛngɛrsɛyɔ.’ Na ibhbhana eriya nɛnɛ na ektɔ.
38 Na yɔk zuga bere kɔ̀dhɔyɛsɛna gu hunaa orrɛa eriyaa ginaye, dokkɛ go na sennɛ, ‘Nɔng nganda a hoynɛye ale sɛrɛ ahaye dhogoy. Na mɛa kìndi na aha kɛ̀sɛrɛ ꞉aggeu.’ 39 Na ibhbhɛ na hɛyɛ guyɔ dheyyɔ na nissɛyɔ.
40 “Na mɛa hunde ɛnaa guyny kunde, anda ale ngazukta me ɛnɛng?”
41 Na yɔk yaktɛsɛ na seyɛsɛ, “Nɔng ale kɔ na tiranyɛ ngazukta bu ku kuhuyagaye gɛrrɛng gɛrrɛng na nis na gu dhɔyɛsɛn zukte bas ale ajjɛsɛnɛ nɔng liwa kolea suniuny shɛɛye.”
42 Na nɔng sɛɛsɛ, “Na igge ngangaye lɔga bere kɔ̀gɔdhdhɛsɛna dadabinyaa lɔga Tumu bere ngani toyito? Yɔk annaa bere sennɛa,
‘Bɛa marrɛa :zuga kɔdhdhɛa doriyo,
wa tewa inde egenggisheono dori sabbɔye.c
Yɔk ngagiya a lɔga bere messo :Komoruyɔ Tumu.
Na hunde kùguny kawarreye, kìwachiyɔ.’
43 “Na mɛa anye kesennagung ɛnɛnggeo, Tumu ale dhɔt bhɛa lɔmɛungu igge na lɔ zukte dhungnganɛ kawara gɛnyɛye. 44 Na zukte ngɔanɛ na dhagɛ rɛhi ngabɛtayed, inyinyihanɛ chinyi chinyi. Na yɔk gee ngɔsɛn :ngabɛtaye, ngunynɛ ke liga.e”
45 Na gɔldangɛa bibiyo doraa Tumu barara ko zuga kɔbhbhɛa damiya Bhɛrɛsi hunaa shikkɛa ngalɔkta ɛlɛhɛnnana :Yesusiye, tagayɛ hunde dhaa mɛzzi lɔga gɛye. 46 Na lami ganggua senno kibhtɛ nɔng na kɛchɛbtɛ. Na tɛngɛrɛ bhɛa senno kibhtɛ ke ngaya zugo gunyɛ nɔng ke hira yogɛsɛna zugo lɔga yokkono :Tumuye.