Lɔga Ghinɛa :Zuga Kɔbhbhɛa Damiya Bhɛrɛsi Yesus Na Kɔdhɔlɛsɛ Lɔkte Barari Gena
16
1 Na zuga kɔbhbhɛa damiya Bhɛrɛsi ko ga kɔbhbhɛa damiya Sodhokka hoya gɔra Yesusi na illobo na ghini na kɔdhɔlɛsɛ lɔkte barari tumɔ.2 Na nɔng yagɛsɛ na sɛɛsɛ, “Nɔng kolea ngɔyɛa :susɔ, igge anno ngagiya senno, ‘Rogonɔ guyɔ ninggɛ ke ngaya tumu anɛ gɔlɔnyiye.’ 3 Na hunde bho a bhorreye senno, ‘Ngakalda guyɔ dhaktɔ, ke ngaya tumu anɛ gɔlɔnyi na ba anɛ ghiruye.’ Nɔng igge anno ngagiya gao bhɛa maragɛo tumu tundɔ na gayɛo lɔgɔ shɛɛye, na yɔk lɔga ɛrrinyana mɛa toye, ngamarakkoo na gaoyo. 4 Yɔk tenyde ku kuhuyaga messɛ lollumoye a gee lamɛɛ bhɛa senno kartɛ lɔga bararaye. Na yɔk lɔkte barar hinnɛ :yɔkku na kargite anye ngakɔdhɔlɛsɛnno. Na kɔdhɔlɛsɛn lɔga bere messo :Tumu bhɛa Yonasi sɔng.” Na nɔng koo dhɔyu yɔk na ogo.
Lɔga Bhoguma Zuga Kɔbhbhɛa Damiya Bhɛrɛsi Ko Ga Sodhokka
5 Na huna bere erressɛa yirisiyɔ tandɔ, yɔk zuga kɔbhbhɛa nɔng bere dhinyɛsɛnɛa :sabbichinnu na tilaa ammɛa ngani kohoyɛyɛayo. 6 Na sɛɛsɛ :Yesusi, “Tɛldi kɔk na kɛngɛ rɛhi bhɛa bhoguma zuga kɔbhbhɛa damiya Bhɛrɛsi ko gaa kɔbhbhɛa damiya Sodhokka!”
7 Na yɔk mɛzzi ngalɔkta kɛngɔ na se, “Nɔng mɛa bhee senɛ ngangaye, a ngaya tila ngani kòhoyɛytoye chi.”
8 Na nɔng Yesus tagu ngalɔkta mɛzzɛɛ :yɔkkuye na ghinu na sɛɛsɛ, “Ngazukta Tumu goore ngayɛbhbhooye! Ngangaye kɛngɔ mɛzzeo lɔga tila ngalɔmmɛoyo kɛ ɔng? 9 Ngangaye ko mɛa toye lɔgɔ ngani tunggɛsɛo na tagato? Na lɔga bɔɔ ammɛa :zuga ku 5,000 tilɛna ku hayna ngakadhdhanoo? Na chɔɔ uruta hunde bɔɔ dheo gɛlachin isɔngge ngakadhdhanoo?” 10 Na lɔgaa ammɛa :zuga ku 4,000 tilɛna ku issabbay ngakadhdhanoo? Na chɔɔ uruta hunde wa dheo gɛlachin isɔngge, ngakadhdhanoo? 11 Na ngalɔkta wa koyokkogung :anynyoye hunde ga tila ngayoye ngaungusɛɛnoo ɛnɛng? Mɛa tɛldi kɔk na kɛngɛ rɛhi bhɛa bhoguma zuga kɔbhbhɛa damiya Bhɛrɛsi ko gaa kɔbhbhɛa damiya Sodhokka!” 12 Na koo tunggɛsɛ lɔgɔ na tagayɛ hunde dhaa nɔng mɛzzi lɔga kènno kɛbhɛktɛ :yɔkku rɛhi bhɛa zuga kɔbhbhɛa damiya Bhɛrɛsi ko bhɛa gaa kɔbhbhɛa damiya Sodhokka na ga kènno kɛbhɛktɛ rɛhi bhɛa bhoguma kòjjɛsɛna tila ngamɛzziyoye.
Lɔga Dhugunnonɛa :Betirosi Bhɛa Yesus Anɛa Kirisos
13 Na Yesus koo ogu na dagu baa Kesariyaa Bhilibhisi. Na hunaa dokko ngoonuye, ghinu zuga kɔbhbhɛa nɔng na sɛɛsɛ, “Ngangaye, yɔk zugo sennɛ Hiri Hoynɛ a nonni?”
14 Na yɔk yaktɛsɛ na seyɛsɛ, “Gena sennɛ a Yohanisa Churro Zugo. Gena sennɛ a Eliyas. Gena sennɛ a Ermiyas oo zuga bere yogɛsɛnɛa zugo lɔga yokkono :Tumu kona.”
15 Na nɔng sɛɛsɛ, “Na igge senno kani nɛng?”
16 Na yagɛsɛ :Simon Betirosi na sɛɛsɛ, “Inye ani Kirisos,a Eriya Tumu, Komoruya iho basseyɔ.”
17 Na sɛɛsɛ :Yesusi, “Eriya Yona Simon, inye ani tuhinɛ, ke ngaya ngalɔkta anɛ ga dhugunnogɛinyi :Babaa nanu iho tumɔye. Na ayuk ko nyawa ngani kudhugundoginyo.b 18 Na nɔng mɛa anye kesennaginy, inye ani Betiros,c na ani ba bhɛa kumkuma. Na ngaya kumkumbe ale kɔgɔdhdhɛ :anynyo doraa nanu.d Na ngadoronu, chɔɔ ɔnneya rɛsɛuny ale ngaɔanao na mɔggo dhul. 19 Na ale kajjiny ghulsinyaa kòyɛa bhɛa ɛlɛa :zuga lɔmma :Komoruya tumony.e Na lɔkte ngidhi bay ngayaye kumulɔng, ko yɔk tumɔ tundɔ ngidhinɛyɔ. Na gee igommon bay ngayaye kumulɔng, ko yɔk tumɔ tundɔ kìgommonoyɔ.” 20 Na koo dagɛsɛ zuga kɔbhbhɛa nɔng go na bhɛa anɛa Kirisos zug gena ngayogɛsɛnɛ.
Lɔga Dhugunnonɛa :Yesusi Lɔga Ale Rɛsɛa Na Bansanɛa
21 Na Yesus tɔgɔdhay ngakaldonu na dhugunɛsɛ zuga kɔbhbhɛa nɔng lɔgɔ hunde dhaa nɔng ale maya kɔ Yerusalemɔ na chɔllayɛ :zuga Ayhudhi bibiyo ko gɔldangɛa bibiyo doraa Tumu barara ko zuga madhdhɛa zugo Damiya Tumu bere kàjjɛa Muse na ale kìni na unga ku sizzi bansana rɛsɛyɔye.
22 Na nɔng Betiros yagu Yesus dheyyɔ na wologu na sɛɛsɛ, “Nganga ngayo, Komoru! Lɔkte ku nganga inye ale ngadokkono dhul!”
23 Na Yesus budhu Betiros, na sɛɛsɛ, “Alala Moldoy! Isogo! Inye illobi bhɛa seni bhakkɛany na karak ba ke ngaya lɔga ɛsɛdhdha Tumu ngaɛsɛdhɛo na ɛsɛdhɛ ga zugonyde.”
24 Na sɛɛsɛ zuga kɔbhbhɛa nɔng, “Inde hin bhɛa senno keteɛ hira kɔbhbhanyi anyeye, maya dhɔt lɔga sabbaa nɛnɛ na it kɛya kìlagɛa na kɔbhbhany kali kali. 25 Anye bhee kesenɛ ngangaye, a ngaya inde hin lɔga sabbaa nɛnɛ na se kibbaysi rɛye, nɔng ale ujjuk rɛye. Nɔng inde ujjuk rɛ ke bhɛa kɔbhbhɛanyi anyeye, ale jɔana basseya iho dhul. 26 Mɛa hiri hunde kɔtɔlɔ ngaahaya ɛl bay ngayaye kumulɔng ke gɛnyɛ na basseya iho dhul katamar na ngajɔana, anda hologunde nɛnde a inong? Oo chɔɔ ahite anda ibhbhana na chachchanɛ bassey ihe? Ninggɛ. 27 Anye bhee kesenɛ ngangaye, a ngaya Hiri Hoynɛ ale lɔmmanɛ dirama Babaa nɛnɛ na dhɛanɛ ko zuga ekko :nɛa, na ɛdhdhɛttanɛ zugo bhiy bhiy damite lɔkte bere messɛ :yɔkkuye.
28 Ga shigitɔ! Bhɛa ngazukta chillɛ ngayaye, ga ale shaw ngarɛssɛayo na ɛlla ko bhee orɛ Hiri Hoynɛ hunde kun na allinɛnɛ zugoye, ɛllɛ.”