Lɔga Madhɛsɛna :Yesusi Zugo Damiya Onynɛnɛa :Zuga Ayhudhi
15
1 Na zuga kɔbhbhɛa damiya Bhɛrɛsi ko ga madhdhɛa zugo Damiya Tumu bere kàjjɛa Muse hoya Yerusalemɔ na assa Yesus na ghini na seyɛsɛ, 2 “Ngangaye zuga kɔbhbhinyɛa inye, yɔk damiya kokonginyany ngabhɛkkɛo kɛ ɔng? Yɔk hunde se kusigi tilaye, sɛnɔ ngaonynyɛo so!”3 Na yagɛsɛ :Yesusi na sɛɛsɛ, “Na ko igge dhɔtto bhɛa kènno bhɛktɛ lɔga bere ajjungu :Tumu na hinno bhɛa bhɛgɛo daminyaa gu kɛ ɔng? 4 Nɔng Tumu annaa bere yogoa lɔgɔ na sewa, ‘Chogonu ko junu tɛngɛrtɔ,’ na ‘Inde dhɔm chɔgɔnɛ oo jɔnɛye, maya katti na rɛsɔ.’ 5 Na nɔng igge anno ngagiya yogɛsɛno zugo lɔgɔ na senɛsɛno, ‘Hiri hunde kataganyɛ chɔgɔnɛ oo jɔnɛ aha na kesɛɛsɛ, “Ahaa taa kesea kɛanɛinyi kumulɔng, mɛa te ga kajjɛi Tumu, ke bhɛa bere kibhiigɛsɛni lɔgɔ,” 6 na chɔgɔnɛ oo jɔnɛ ngaɛana na ɛngɛrsi, bhee gɛrsi ninggɛye.’ Na ngaya messɛo ngangaye, tiranyɛo lɔga Tumu na mautto daminyaa gu. 7 Ngabutokta tabhbho zugo nigiteye, yɔk lɔga gu bere dhugunnono :Isayasi dha bere a dhere chi. Nɔng annaa bere senno,
8 “‘Ngazukta eterrisananyɛ tugichinne sɔng,
na taɛ lɔga ganyu na hinisi dhere ngaibhbhaganyɛo.
9 Na chɔɔ lɔga eterrisanɛanyɛa :yɔkku bhee ku hologun ninggɛ,
ke ngaya dhɔyɛ lɔga ganyu na zugo madhɛsɛnɛ ga sabbiya gɛye.’”
10 Na eleo zugaa bo mɛra na kohoya bhɛa nɛnɛ na sɛɛsɛ, “Ga shigi lɔgɔ na tunggɛsɛyɔ! 11 Nɔng ahite am :hiriyɔ na koo ɛddɛ nɔng na lɔmɛ ridhing, ninggɛ. Yɔk lɔkte bhonsanɛ tuga nɛnɛye, a gee ɛddɛɛ nɔng na lɔmmɛ ridhingge.”
12 Na koo zuga kɔbhbhɛa nɔng hoya gɔra nɛnɛ na seyɛsɛ, “Ngangaye hunde zuga kɔbhbhɛa damiya Bhɛrɛsi dhaa shigi lɔgaa yokkoni na hinisi te kɔrrɔye, wa tagu chi dha?”
13 Na nɔng yagɛsɛ na sɛɛsɛ, “Yɔk kɛnde Baba nanu iho tumɔ ngani kimmoye kumulɔng, ale kùbuchchono ko sindaye kari. 14 Na yɔk ngazuktonu ngatɔgeo! Yɔk a zuga kawarɛ chaga dhigannɛa lalugɛa kawarɛ chaga. Nɔng hira kawarɛ chaga hunde kidhigan lallɛn, ale ngɔsɛnɛ bhɛa kɔbɔnga kari rammane.”
15 Na sɛɛsɛ :Betirosi, “Ga dhugunogiy ngalɔkta wa ɛlɛhɛnnande bhɛa ku hologun.”
16 Na nɔng ghinu yɔk na sɛɛsɛ, “Ngangaye ko igge ko mɛa toye ngalɔkta bhɛa ku hologun ngani tunggɛsɛo na tagato? 17 Na hunde ahaa amma :hiriyɔ hɛ kɛngɔ toye na koo bhonsanɛ rɛhɔye, ngagaoyo? 18 Yɔk lɔga bhonsanɛa tuga hiriguny agga honyo hinisɔ na a gee ɛddɛɛ nɔng na lɔmmɛ ridhingge. 19 Bhee anɛ ngangaye a ngaya lɔga bhonsanɛa hinisa hiriguny gena anɛ ga ɛsɛdhdha :hiriyɔ ku kuhu, ko zugo nisa, ko lollumoa assanɛa :hiriyɔ tɛriya hiriguny oo assanɛa :tɛriyɔ hira lɔmma tɛri, ko lollumoa messɛa :zugu ko ɔgɔrchamo ko butomoa kàmagɛsɛna zugo ko zugo kedhdhaye. 20 Yɔk ngagiya a lɔkte ɛddɛɛ hiri na lɔmmɛ ridhingge. Nɔng hiri bhee diginɛnɛ ke bhɛa sɛnɔ ngani kotonyɛayo na amɛa tila, ninggɛ.”
Lɔga Yɛbhɛa :Tɛriya Ku Kanani Yesus
21 Na Yesus bana na dhɔyu ngonu na ogo baa kènno Tiros ko Sidona. 22 Na tɛrite ku Kanani bhak ngabaonu ko na assa nɔng na yogɛsɛ lɔgɔ goore na sɛɛsɛ, “Komoru, Ashaya Dawiyye, chirbhiseonyɔ! Sedhdheya nanu bɔɔ tɔgɛsɛa :mɛnɛngiyɔ na mɛa chɔllanɛ gɛrrɛng.”
23 Na nɔng Yesus lɔk gena ngani kayagɛsɛo dhul. Na zuga kɔbhbhɛa nɔng hoya bhɛa nɛnɛ na tɔllɔsɛsɛ na seyɛsɛ, “Itton ngatɛrita na kogo ke ngaya kɔbhbhɛiy na bholollogɛiy dirrte.”
24 Na nɔng sɛɛsɛ, “Anye bere kèkkononyi na kɛ̀a zuga Isirayeli gee hɛt ko mɛdɛrniya bere litinyana na garsɛaye sɔng.”
25 Na tɔgɔdhɛsɛ :tɛriyɔ kɔmma na tɔllɔhɛsɛ na sɛɛsɛ, “Komoru, ɛyaanyɔ!”
26 Na nɔng sɛɛsɛ, “Hunde kìbhbhana amissɛa errony na kujjugɛsɛn rɔsiye, a gɛrsi.”
27 Na ko nɔng tɛri sɛɛsɛ, “Ee a dhere chi, Komoru. Yɔk rɔsi a gala ammɛa urutaa ngɔanɛa bhɛa aminɛnɛa :komoruya nɛ chi.”
28 Na sɛɛsɛ :Yesusi, “Ngatɛrita, inye dhaa yɛbhbhany goore dhogoy. Na mɛa lɔgaa ghinnɛanyi any kurruknyɛsɛ.” Na ngakaldonu sedhdheya ngatɛritonu bau nga hung.
Lɔga Abhanyisiyɛa :Yesusi Zuga Ku 4,000 Amissɛyɔ
29 Na Yesus bana na dhɔyu ngoonu na dhau yirisiya Gelila tugɔ na koo irrɔgu kutul kona bhe chinyi na tɛa bay. 30 Na zuga bo mɛra hoya gɔra nɛnɛ na hoyɛy zuga ngɔllɛa, ko ga kawarɛ chaga, ko ga ku anyakuwanda, ko ga kadhdhakka ibhinɛna ko zuga bo mɛra ilagassɛa gena na tɛldi bhɛa nɛnɛ jaa na ibbaysiu. 31 Na zugo hunaa orrɛa ga kadhdhakka ibhinɛna hunde mɛzziɛye, ko ga ku anyakuwanda hunde bassɛye ko ga ngɔllɛa hunde woɛ shɛɛ na ga kawarɛ chaga orrɛ bhoye, iwachiyɛ na eterrisana Tumu Komoruya Isirayeli.
32 Na Yesus eleo zuga kɔbhbhɛa nɔng na sɛɛsɛ, “Anye mɛa towonydakkany :ngazukta ke ngaya unga kassaniyɛo ko yɔk kari mɛa teyɛ sizzi na chɔɔ ahiya ammɛa ningginɛnɛ dhulde. Na mɛa bhɛa keni kittonɛ hozzo ngakihiniyo ke ngaya kesea ale bhirsonɛ gɔrɔye.”
33 Na zuga kɔbhbhɛa nɔng yaktɛsɛ na seyɛsɛ, “Na mɛa ngakoruya ku laayte, amissɛte kabhanyisiyɛo ngazukta bu mɛrte ale kohonyɛo ori?”
34 Na nɔng ghinu na sɛɛsɛ, “Lɔmmo tilɛnde ku isɔng?
Na yɔk seyɛsɛ, “Kɔlɔmmo gee ku issabbay ko urguse chichi chichi muchugi.”
35 Na nɔng yogɛsɛ zugo na kɛtɛlda bay. 36 Na ibha tilɛnaa ku issabbay ko urgusa na tuhu Tumu. Na hunaa tuha na tewa ushaye, ngɛru na aynɛ zuga kɔbhbhɛa nɔng na yɔk ngɛrtɛsɛ zugo. 37 Na zugo ussɛ na cha kumulɔng. Na zuga kɔbhbhɛa Yesus mukta urutaa churinyana na dhi gɛlachin issabbay. 38 Yɔk zuga bere ammɛa amissɛ hunde kɛ̀lɛhɛnde ga maya sɔng a 4,000. Na yɔk tɛrro ko erro ngani kòtoyito. 39 Na koo Yesus ittonu zugo. Na hunaa tewa ushaye, irrɔgu gonggul na ogo baa Magadholi.