Lɔga Rɛsɛa :Yohanisa Churro Zugo
14
1 Na ngakoleonu komoruya kèe Heredios allinɛnɛa Gelila tan kona shigu sabhana Yesusi. 2 Na sɛɛsɛ zuga marakkɛa lɔgɔ kari, “Nɔng mɛa ngahirronu a Yohanisa Churro Zugo. Na dha bɔɔ bana rɛsɛyɔ na aynde mesɛ ngalɔkta bu barar dhandalde.”3-4 Nɔng dha bere sabbɔ Heredios yogɛsɛn bholi lɔgɔ na kibhigi Yohanis na kaytɛ doraa chibinuny ke ngaya dha bere Yohanis wologɛ Heredios lɔga tɛriya gɔynɛ Bhilibhosi kèe Ngaherodhaye. Nɔng dha bere Heredios kèsenɛsɛn, “Tɛriya goonu ngakɔɛ, ke ngaya Damiya Tumu bere kàjjɛa Muse anɛ kullɛye.” 5 Nɔng Heredios dha bere hinɛsɛn Yohanis rɛsɛ, na nɔng koo tɛngɛru zugo ke ngaya dha bere zugo gunyɛ Yohanis ke hira yogɛsɛnɛa zugo lɔga yokkono :Tumuye.
6 Na hunaa anna kala kàgadhdhanɛa unga dha bere hudhukkinyanɛa :Herediosiye, nɔng sedhdheya Ngaherodha dha bere gɔm na ɛddɛysi kɔmɔna kèleono na Heredios hinisa nɛnɛ a hɔli goore dhogoy. 7 Na bhiigɛsɛn sedhdhey lɔgɔ na hunde hin lɔk gena bhɛa nɛnɛ na ghinde, kaynɛyɔ. 8 Nɔng sedhdhey dha bere madh :jɔnɛ na koo senɛsɛn Heredios, “Keni any sabbaa Yohanisa Churro Zugo kɛdhɛmɔ mɛarrɛ.” 9 Na nɔng komoru dha bere hunde shik ngalɔktaye, munyu goore dhogoy. Na ko hunde kumunyu, nɔng dha bere yogɛsɛn zug gena lɔgɔ na kemesigi lɔgaa ghinno :sedhdheyɔ ke ngaya se ngakamalɛ lɔgaa bhiigɛsɛna sedhdhey bhɛa ɛlɛa kɔmɔnaa eleonoye. 10 Na ek na hɛ doraa chibinuny na kedhdhanɛ Yohanis sabba. 11 Na ibhbhanɛ na ojjɛsɛnɛ kɛdhɛm na ajjɛ sedhdhey. Na sedhdhey kɔɛ na ajjɛsɛn jɔnɛ. 12 Na yɔk zuga kɔbhbhɛa Yohanis dha bere ibhbhanɛ nɔng na hɛyɛ na ojjɛyɔ. Na koo hɛ na yogɛsɛnɛ Yesus ngalɔkta.
Lɔga Abhanyisiyɛa :Yesusi Zuga Ku 5,000 Amissɛyɔ
13 Na Yesus hunaa shikko ngalɔktaye, dhɔyu ngonu na bana na ogo gonggulɔ bhokkonnɔ bhee zugo ninggɛ. Na zugo hunaa shikkɛa ngalɔkta kɔɛ :nɛaye, banda oriya gɛ na kɔbhɔ nɔng jagarre. 14 Na Yesus hunaa bhonsana gonggulɔ na orro zuga bo mɛraye, towonydɛsɛ :zugu na ibbaysiu gee ilagassɛye.
15 Na hunaa bho senno kete kɔrrɔye, zuga kɔbhbhɛa nɔng hoya bhɛa nɛnɛ na seyɛsɛ, “Ngaya a dus na bho se kete kɔrrɔ. Na mɛa yogɛsɛ zugo na kago ori toye na katalda ahaye ammɛ.”
16 Na nɔng Yesus sɛɛsɛ, “Ahaa ammɛa ayɛ :iggeu hung! Yɔk bhee hɛyɛ bhokkonnɔ ninggɛ.”
17 Na yɔk seyɛsɛ, “Agge ngaya kɔlɔmmo tilɛnde ku hayna ko urguse ku ramman sɔng.”
18 Na nɔng sɛɛsɛ, “Ga hoyɛy ngaya nande.” 19 Na yogɛsɛ zugo na kɛtɛlda lanjoyɔ bay. Na ibha tilɛnaa gina ku hayna ko urgusaa ku ramman na dhɔngu kawarɛ tumɔ na tuhu. Na ngɛru tilɛna na aynɛ zuga kɔbhbhɛa nɔng na yɔk ngɛrtɛsɛ zugo. 20 Na zugo ussɛ kumulɔng na chaya. Na zuga kɔbhbhɛa nɔng mukta urutaa dhaa churinyana na dhi gɛlachin tɔmmɔn ko ramman. 21 Yɔk zuga bere ammɛa amissɛ hunde kɛ̀lɛhɛnde ga maya sɔng heo a 5,000. Na yɔk tɛrro ko erro ngani kòtoyito.
Lɔga Woyɛa :Yesusi Yirisiyɔ Tundɔ Jagariyɔ
22 Na Yesus hunaa ngani yaginɛna ko zugoye, yogɛsɛ zuga kɔbhbhɛa nɔng lɔgɔ ke tiri na kirrɔgɔ gonggul na kɛjɛmɛ sabbɔ na kerre yirisiyɔ tandɔ. 23 Na hunaa yaktɛa ko zugo na tewa ushaye, koo irrɔgu kutul kona bhe chinyi bhichang na kalliyɛ ko Tumu. Na hunaa bho barraye, nɔng tɛu ngonu bhichang. 24 Nɔng ngakoleonu gonggul bere kɔa yirisiyɔ toye ko rɛna na chukkeo :yirisiyɔ goore ke ngaya bere ɛbbɛgɛ ngɔye.
25 Na hunaa bho tewa gidhanggayte nɔng tɔa yirisiyɔ tundɔ na ko gɔrre ɛlɛ :zuga kɔbhbhɛa nɔngge. 26 Na yɔk hunaa orrɛa nɔng hunde woono yirisiyɔ tundɔye, tɛngɛrɛ bho goore na ara wuy na se, “A rimboya hira rɛssa, rɛssa!”
27 Na sɛɛsɛ :Yesusi, “Kani anye, anye. Tɛldi hung! Bho ngaɛngɛrso!”
28 Na nɔng Betiros sɛɛsɛ, “Komoruye, hunde ani inyeye, ga seagany na kɔ̀tɔ ma tundɔ na kàssaginy inye.”
29 Na nɔng sɛɛsɛ, “Wo ni!”
Na Betiros bhona gonggulɔ na tɔu ma tundɔ na ogu gɔrre ihɛ :Yesusiye. 30 Na hunaa orro ngɔyɔ hunde ɛbbɛk gooreye, tɛngɛru bho. Na hunde chinyi ngani se kɔggɔyɛye, aru wuy na seu, “Komoruye! Ibbayseonyɔ, ibbayseonyɔ!”
31 Na ibhu :Yesusi ke tiri na sɛɛsɛ, “Ngahirra goore ngayɛbhbhanyoye, wa ga dhaginɛno ko hini kɛ ɔng?”
32 Na yɔk hunde chinyi ngani irrɔkkɛ gonggulde, ngɔyɔ garu. 33 Na zugaa ɛlla gonggulɔ toye seyɛsɛ, “Inye dhaa ani Eriya Tumu dhere,” na tɔgɔndɛsɛ kɔmma.
Lɔga Ibbaysiyɛa :Yesusi Zugo Gensaretɔ
34 Na yɔk hunaa erreya yirisiyɔ tandɔ na tewa ushaye, daga ba Gensaretɔ. 35 Na zuga maya bhakkɛa ngoonu hunaa gayɛa hunde a Yesuse, ege tugi oriya ɛlla ngabaonu kumulɔng. Na zugo hoyɛy zuga ilagassɛa kumulɔng chɔɔ bhɛa ihɛa :nɛa, 36 na tɔllɔsɛsɛ na kigomɛsɛ zuga ilagassɛa na kidhara ruma malukko :nɛa nyabhi sɔng. Na zuga bere idharrɛa rum nyabhi, bere bassɛa kumulɔng.