Lɔga Bhɔdhinɛnɛa :Ɛa Yesusi
17
1 Na hunaa saniya ungo illɛy na tewa ushaye, Yesus ibha Betiros ko Yaykob ko gochonga Yaykobi Yohanis na dhi kari na irrɔgɔ kutula bo rammaya kona na tɛldi bhichang. 2 Na hunaa ngani ɛlla kari ngonuye, ɛa Yesusi bhɔnyɛsɛ yɔk kawarre na mumɔ bhadhu huna susuny na ruminyaa gɛnyɛ bhɔttɛ na te hɔli hurr. 3 Na argi Muse ko Eliyas hunde dhullanɛ dɛk na mɛzzɛɛ ko Yesuse.4 Na Betiros sɛɛsɛ Yesus, “Komoru, nɔng ngaya kɛ̀lɛo ngayaye, a challi. Na hunde hiniye, ga any kàrak gahachinde ku sizzi, na kona ke nunu kona ke Muse kona ke Eliyas.”
5 Na nɔng hunde chinyi ngani yokkono lɔgɔye, idhoa bo hɔla ko na chɛbu yɔk. Na idhogiye toye shigi lɔkte sennɛ, “Erite nan ajjany hini hɔldin kibhɛsɛn hiniye, a nganda. Shigi nɔng!”
6 Na zuga kɔbhbhɛa nɔng hunaa shikkɛa ngalɔktaye, dɛɛbɛ goore na tunggo bay na tɔgɔndɛ kawarɛ ba. 7 Na Yesus ko na idharu na sɛɛsɛ, “Banda tunɔ, bho ngaɛngɛrso.” 8 Na yɔk hunaa dhɔngnganɛa sabbi na gunynyɛa baye, argi hunde ngoonu i :Yesusi sɔng na zug gena dhaa garayɛye.
9 Na hunaa ngani shidhinyana kutulɔye, nɔng Yesus madhɛsɛ yɔk lɔgɔ na sɛɛsɛ, “Ngalɔkta wa orroye hir kona ngayogɛsɛno ko bhee Hiri Hoynɛ ale bansanɛ rɛsɛyɔ.”
10 Na yɔk zuga kɔbhbhɛa nɔng ghini na seyɛsɛ, “Na ngangaye yɔk zuga madhdhɛa zugo Damiya Tumu bere kàjjɛa Muse sennɛ, ‘Hunde Kirisos ba ngani kugooye, maya sabbɔ jimmana :Eliyasi,’ kɛ ɔng?”
11 Na nɔng yagɛsɛ na sɛɛsɛ, “A dhere chi, nɔng Eliyas ale kun na me lɔgɔ kumulɔng shɛɛ na ɛl damiya bɔɔ sabbune. 12 Na nɔng anye kesennagung ɛnɛnggeo, Eliyas nɔng bere kowa na yɔk zugo timakta na tiranydɛa gɛrrɛng gɛrrɛng damite hinɛ :yɔkkuye kumulɔng. Na ko nɔng Hiri Hoynɛ ale chɔllayɛ nganga.” 13 Na ngakaldonu zuga kɔbhbhɛa nɔng tagayɛ hunde nɔng dhaa yogɛsɛn lɔga Yohanisa Churro Zugoye.
Lɔga Ibbaysiyɛa :Yesusi Eriya Tɔgɛsɛna :Mɛnɛngiyɔ
14 Na hunaa honyo na dokkɛa bhɛa ɛlɛa :zugaa mɛraye, nɔng hir kona ko gɔ̀rrè Yesusiye na tɔgɔdhɛsɛ kɔmma na sɛɛsɛ, 15 “Komorue, chirbhisi eriya nanu. Chɔlla ilagayte dhagɛ ba na chɔllanɛ goore dhogoy. Na tii ngɔsɛn go oo ma toye. 16 Na wa kugunɛi na kajjɛsɛni zuga kɔbhbhinyɛa na kibbaysitɔ. Na yɔk ngani ngaɔanɛayo.”
17 Na yagɛsɛ :Yesusi na sɛɛsɛ, “Ngatenyda bhanggalung Tumu ngayɛbhbhooye, ngangaye anye ale kàbhak kari dirr chɔɔ ore? Na lɔga gu ale kinyimi chɔɔ ore? Ga hoyɛy eri ngaya se!” 18 Na koo wologu mɛnɛngi na chugu, na mɛnɛngi bhona na eri bau nga hung.
19 Na yɔk zuga kɔbhbhɛa nɔng koo kɛnggiyaa bhichang na assa Yesus na ghini na seyɛsɛ, “Ngangaye, mɛnɛngiyaa gina agge bhee ngakobhoniseonɛoyoye a ore?”
20 Na nɔng yagɛsɛ na sɛɛsɛ, “A ngaya Tumu goore ngayɛbhɛoyoye. Na nɔng mɛa ga shigitɔ! Hunde tɔlɔmɔ yɛbha bhɛa chinynyo godhe hɛtta ko katilay kawari, na seyɛsɛ ngakutulda, ‘Bɔchiyaa ngaya na ok ngonu,’ kɔyɔ. Na chɔɔ anda lɔkte dhandal bhɛa nu na ngaɔninyao, ninggɛ dhul. 21 [Na nɔng mɛnɛngite ku ngangaye, ngabhonsanao dhul. Na bhonsana hunde kìchib rɛhi hunynɛn na kallinɛ ko Tumuye sɔng.]”a
22 Na kali kona yɔk hunaa mukkinyana na ɛlla kari Gelilagiyeye, nɔng sɛɛsɛ yɔk, “Hiri Hoynɛ ale kɔ̀gɔdhdhɛsɛn zugo, 23 na nissɛ na sani, na unga ku sizzi bansanayɔ.” Na yɔk zuga kɔbhbhɛa nɔng munyu goore.
Lɔga Gharataa Kàgadhiyɛa Doraa Tumu Barara
24 Na koo Yesus ko zuga kɔbhbhɛa nɔng ago na daga Kibirom. Na hunaa dakta ngoonu na tewa ushaye, yɔk zuga mukkanɛa birinyaa ku gharataa doraa Tumu barara, hoya na assa Betiros na ghini na seyɛsɛ, “Na ngahirra madhdhungge nɔng birinyaa ku gharataa doraa Tumu barara ngagadhiyo?”
25 Na nɔng yagɛsɛ na sɛɛsɛ, “Gadhi chi so!”
Na nɔng hunaa kɔa na ngani tunnukko doriye, ghinu :Yesusi sabbɔ na sɛɛsɛ, “Simone, ngangaye inye hunde ɛlɛhɛniye, komortɛna bany birinyaa ku gharatab kumulɔng mukkanɛ bhɛa erroa gɛ oo bhɛa zug gennuny?”
26 Na nɔng Betiros yagɛsɛ na sɛɛsɛ, “Mukkanɛ bhɛa zug gennuny.”
Na sɛɛsɛ :Yesusi, “Yee hunde a ngangaye, yɔk erro dhaa ngagadhinɛo ni. 27 Na nɔng bhɛa kènno ngakɛdɛbtagiy :ngazukta, ga ok yirisiyɔ na kɔng kormiya nunu. Na urgusite ibhi sabbɔye oo tugɔ, aleo jɔan tamuniyaa ungusinɛna ko birinyaa anda gadhiyɛa zuga ku ramman ke gharata. Na ibha na gadhiɛ gharataa nanu ko na nunu.”