Mataayo 4

Oghosambwa ghorashaasha Yëësu

(Maariko 1:12-13; Ruuka 4:1-13)

Mbe, Umwika uwa Waryobha akatangata Yëësu ukughya ku-riköngö, okore ashaashwe na Oghosambwa. 2 Yëësu akaisasa ibhyakorya ku-sinsikö merongo ene, ubhutikö na omobhasö, ku bhuyö akaighwa umweko bhököngʼu. 3 Oghosambwa ghokaasha, ghokamushaasha. Ghokatëëbhya Yëësu igha, “Nyoore m-Moona uwa Waryobha örë, tëëbhya amaghena ghano ghaisyöri, ghabhe emekaate.”

4 Kasi Yëësu akahonshora Oghosambwa igha, “Ti-igho hë, yandëkirwë mo-Maandeko Amahörëëru igha,

‘Ti-bhyakorya ibhyene igho, igha mbyo bhekohaana ömöntö öbhöhöru,

kasi öbhöhöru ubhwa ömöntö, nkurwa bhörë mo-ngʼana yoyonswe eno Waryobha akoghamba.’”

5 Mbe, Oghosambwa ghokahira Yëësu mu-mughi omonene ömöhörëëru ghono ghokobherekerwa igha Yërusarëëmu. Ghokamwimërrya ko-kenono ikya risengerro irya Waryobha. 6 Ghokamötëëbhya igha, “Nyoore m-Moona uwa Waryobha örë, irekera hansë, ko bhoora yandëkirwë mo-Maandeko Amahörëëru igha,

‘Waryobha naraatome abhamaraika abhaaye

bhakogheghe mo-mabhoko aghaabho,

okore otakaashe wituuretuure kwe-ghena.’”

7 Kasi Yëësu akaghohonshora igha, “Tinirekere hansë hë, ko bhoora yandëkirwë mo-Maandeko Amahörëëru igha, ‘Otakaashaashya Omonene uwaaho Waryobha.’”

8 Ho ghwiki Oghosambwa ghwaaghëghirë Yëësu, ghokamuhira ku-nguku entambë bhököngʼu. Ghokamwörökya ibhyaro bhyonswe igho ibhya ko-kebhara kono, na ubhuuya ubhwabhyo. 9 Ghokamötëëbhya igha, “Nendaakohaane ibhyaro bheno bhyonswe igho obhetonge, hano oraanyaghamere onsaasaame.”

10 Kasi Yëësu akaghohonshora igha, “Ndwera-ho ghore Ghosambwa. Tenkosaasaame hë, ko bhoora yandëkirë mo-Maandeko Amahörëëru igha,

‘Ni-igha osaasaame Omonene uwaaho Waryobha,

na ukumwighwera umwene igho.’”

11 Mbe, Oghosambwa ghokamutigha ibhagha ike igho. Tamaaha, abhamaraika abha Waryobha bhakaasha kutighinkanera Yëësu.

Yëësu arasimya okotoora amangʼana aghaaye harabhu igho

(Maariko 1:14-15; Ruuka 4:14-15)

12 Mbe, hano Yëësu yaaighuurë igha, Yohana Omobhatiisya arëngë mo-kebhohe, akarwa hayö, akaghya mo-mokowa ughwa Ghariraaya. 13 Akarwa Nazarëëti hayö, akaghya ukwikara mu-mughi ghono ghwaabherekerwanga igha, Kaperenaumu. Kaperenaumu, nu-mughi ghono ghwaarë haangʼë na inyansha iya Ghariraaya, orobhareka urwa Abhazabhurööni na Abhanafutaari. 14 Yëësu yaakörrë igho, okore amangʼana agha ömörööti Isaaya ghahekerane ghano yaaghambirë igha,

15 “Mwitegherre abhantö abha ikyaro ikya Zabhurööni na ikya Nafutaari,

ahasë hano harëngë haangʼë na inyansha iya Ghariraaya, humbu iya omooro ughwa Yorodani,

mo-mokowa ughwa Ghariraaya iya Abhakyaro.

16 Abhantö abha mu-kisuntë, bharööshë obhorabhu obhonene,

abhantö bhayö abha mu-kiiriiri ikya uruku, bhamörëkirwë emerengaari ighya nyinkyo.”

17 Ko-nkaagha iyö, Yëësu akasimya okoraarekera abhantö arabhatëëbhya igha, “Bhëënyu, ni-igha mohongore ëbhëbhë ibhyënyu, ko bhoora enkaagha iya Obhokama ubhwa Waryobha n-haangʼë ërë.”

Yëësu arashaaghora abhatëghi abhane

(Maariko 1:16-20; Ruuka 5:1-11)

18 Hano Yëësu yaaghendanga ko-morambo ughwa inyansha iya Ghariraaya, akamaaha abhantö abhabhërë, ömöntö na mura uwaabho enda ëmwë. Uwöndë yaabherekerwanga igha Simööni, iriina iryaye iryëndë ni-igha Peetero, na mura uwaabho enda ëmwë uyö, yaabherekerwanga igha Anderea. Bhaarekeranga omotegho mu-nyansha, ko bhoora m-batëghi bhaarë. 19 Yëësu akabhatëëbhya igha, “Monsoorane, mobhe abheegha abhaane. Nendaabhëëghi ököghöötya abhantö, kya bhono mwaarë ököghöötyanga sinswë.” 20 Kamwë igho, Anderea na Simööni bhakatigha hayö emetegho ighyabho, bhakasoorana Yëësu.

21 Yëësu akaghëndërrya na oroghendo urwaye, hake igho akamaaha ghwiki abhantö bhabhërë, ömöntö na mura uwaabho. Uwöndë yaabherekerwanga igha Yaakobho na mura uwaabho yaabherekerwanga igha, Yohana, m-bamura abha Zebhedaayo bhaarë. Bhaarenga bhaikaayë mu-bhwato na suwaabho, bharatuma emetegho ighyabho. Bhonswe Yëësu akabhabherekera. 22 Kamwë igho, abheene bhonswe bhakatigha hayö ubhwato na suwaabho, bhakasoorana Yëësu.

Yëësu arëëghya araraareka na ukuhwënia abhantö

(Ruuka 6:17-19)

23 Yëësu yaainaarrë ikyaro kyonswe igho ikya mo-mokowa ughwa Ghariraaya, yëëghyanga abhantö mu-sinyumba isya esango iya Abhayahudi. Akabha araraarekera abhantö Amangʼana Amaiya agha Obhokama ubhwa Waryobha, kora akabha arahwënia abharööyë bhonswe igho. 24 Amangʼana ghayö Yëësu yaakoranga, ghakaromaana mu-kyaro kyonswe igho keno kekobherekerwa igha Siria. Mbe, bhakamoreetera abharööyë bhonswe igho, bhano bhaarë na amarööyë agha teemo nsharu. Abhandë mbaaighwanga öbhörrö bhököngʼu, kora mbaarenga na amasambwa, abha ëndööri, na abha amasusu, akabhahwënia bhonswe igho. 25 Ku bhuyö abhantö abhaaru bhakabha bharasoorana Yëësu. Abhandë bhaarwërëëyë mo-mokowa ughwa Ghariraaya, Dekapööri, Kapadokia, Yërusarëëmu, mo-sembaara isyëndë isya Yudea na humbu ya omooro ughwa Yorodani.