Abheegha abha Yëësu abha mbere
5
Urusikö nyabhorebhe,
Yëësu yëëghyanga engʼana iya Waryobha,
aimërëëyë ko-morambo ughwa inyansha iya Ghariraaya.
a Abhantö abhaaru bhakamusuntarra haangʼë bhamwinaarrë,
okore bhamwitegherre.
2 Akamaaha amaato abhërë,
ko-morambo hayö.
Abheene amaato ghayö,
bhaarenga bhaghatighirë-ho,
bhaghëëyë ukwöghya emetegho ighyabho.
3 Amaato ghano ghaarë hayö,
ubhwöndë nu-bhwa Simööni bhwaarë,
mbwo Yëësu yaariinirë-mo.
Akatëëbhya Simööni igha,
abhuhuni ukurwa ko-morambo hayö,
bhoghende bhuribha hake igho.
Mbe,
Yëësu akëëghya abhantö,
aikaayë mu-bhwato muyö.
4 Hano yaamarrë ukwëghya abhantö,
akatëëbhya Simööni igha,
“Sukya ubhwato bhuribha ghatë.
Moteghe emetegho ighyënyu,
möghööti sinswë.”
5 Simööni akamohonshora igha,
“Omonene uwëëtö,
tötëghirë igho ubhutikö ubhughima,
kasi titunyöörrë ëkëntö hë.
Kasi ko bhono we oghambirë,
tigha mbe toteghe.”
6 Hano bhaakörrë bhuyö yaabhatëëbhëri,
emetegho ghekaghöötya sinswë sinsharu,
kora emetegho ighyabho ghekahona okotandoka.
7 Ku bhuyö bhakakobhakobha bharikyabho bhano bhaarë mu-bhwato ubhwöndë,
bhaashe okobhatöörrya.
Hano bhaaishirë,
mbaaishööyi amaato ghonswe igho abhërë sinswë,
kora hake igho bhakwererre.
8 Hano Simööni Peetero yaarööshë amangʼana ghayö,
akatema hansë ibhiru mbere iya Yëësu,
akamötëëbhya igha,
“Omonene uwaane,
karwe ku-öni hano,
ko bhoora öni,
nu-uwa ëbhëbhë ndë.”
9 Simööni yaaghambirë amangʼana ghayö,
ko bhoora umwene hamwë na bharikyaye bhonswe igho,
mbaaröghöörrë bhököngʼu,
ku-bhwaru ubhwa sinswë seno bhaaghöötëri.
10 Yaakobho na Yohana bhamura abha Zebhedaayo,
bhano bhaarë mu-bhwato ubhwöndë,
mbaarë na öbhömwë na Simööni ko-mangʼana agha öbhötëghi.
Abheene bhonswe,
ghayö ngaabharöghöörri.
Yëësu akatëëbhya Simööni igha,
“Uwe otakoobhoha.
Uwe m-möghökööri uwa sinswë örë,
kasi ukurwa reero,
na-bhantö oraaghokoorenga.”
11 Hano bhaaghöbhëri amaato aghaabho ko-morambo,
bhakatigha hayö bhyonswe igho,
bhakasoorana Yëësu.
Yëësu arahwënia omoghenge
12 Urusikö urwöndë hano Yëësu yaarë mu-mughi nyabhorebhe,
yaaishirë ömöntö ono yaarenga aromaini obhoghenge ömöbhërë ghonswe igho.
Ni-igho yaarööshë Yëësu igho,
akairekera bhöröngë ubhwaye,
akamosaasaama igha,
“Omonene hano oraahanshe,
oratora ukunhwënia mbe na esaabhuuro iya ikidiini.”
13 Yëësu akarambora okobhoko ukwaye,
akakunia omoghenge uyö.
Akamötëëbhya igha,
“Ni-igho nkutuna igha uhwene,
obhe na esaabhuuro iya ikidiini.”
Kamwë igho omoghenge uyö akahwena.
14 Yëësu akamokaania,
akamötëëbhya igha,
“Otakaatëëbhya ömöntö wowonswe oora kya igho uhwënirë.
Kasi kaghi okore kya bhono amaraghërryö agha Mosa ghakoraghërrya.
b Kaghi kö-mösëngëri,
okore amaahe igha,
m-maheene osaabhuurrwë.
Hano oraamare,
okore ikimwenso ikya okosaabhuurwa ukwa abhaghenge.
Ikimwenso kiyö kebhe ekemanyërryö ko-bhantö,
okore bhamanye igha uhwënirë.”
15 Nokaanyoora Yëësu yaamokaanëri igha atakaatëëbhya abhantö,
kasi amangʼana agha Yëësu ghakaromaana bhököngʼu.
Abhantö abhaaru bhakabha bharaikomania ku-Yëësu,
okore bhaitegherre amëëghyö aghaaye,
na ukuhwënibhwa amarööyë aghaabho.
16 Kasi senkaagha isyëndë,
Yëësu yaabhatighanga hayö,
aghya okosaasaama Waryobha ahasë hano ömöntö atarë.
Yëësu arahwënia ömörööyë uwa risusu
17 Urusikö nyabhorebhe Yëësu yëëghyanga Abhantö.
Bhaare-ho Abhafarisaayoc hamwë na abhëëghya abha amaraghërryö agha Mosad bhaikaayë.
Bhaarwërëëyë mu-bhishishi bhyonswe igho ibhya mo-mokowa ughwa Ghariraaya,
Yudea na mu-mughi ughwa Yërusarëëmu.
Yëësu yaarë na obhotoro ubhwa Omonene Waryobha,
ubhwa ukuhwënia abhantö.
18 Ho abhantö nyabhorebhe,
bhaaishirë bhasëngʼënsirë ömörööyë uwa risusu kwi-shambi.
Bhakasëëmya ukumuhira mu-nyumba bhöröngë ubhwa Yëësu,
19 kasi bhakakerwa,
ko bhoora abhantö m-baaru bhaare-ho.
Mbe,
ku bhuyö bhakamurinia ko-rosara,
bhakahobhora ribhanga,
okore bhanyoore umweya ughwa ököhëtya-ho ömörööyë na rishambi iryaye.
Bhakamwikya bhöröngë ubhwa Yëësu.
20 Hano Yëësu yaarööshë engʼana iyö abhantö bhayö bhaakörrë,
akamanya igha mbaana umukumo.
Akatëëbhya ömörööyë uyö igha,
“Mosaani,
wabhëëywë ëbhëbhë ibhyaho!”
21 Abhëëghya abha amaraghërryö agha Mosa na Abhafarisaayo bhakasimya okobhoorania igha,
“Kana ono m-möntö kë ono akotoka Waryobha?
Taaho ömöntö ono akotora ukwabhera abhantö ëbhëbhë hë.
Waryobha umwene we akokora igho!”
22 Yëësu akangʼura keno bhaaitegherranga.
Ku bhuyö akabhabhöörya igha,
“N-kwakë mukwitegherra igho mo-metwe ighyënyu?
23 Bhoono bhëënyu möntëëbhi,
ne-ngʼana kë ëntöbhu,
ökötëëbhya ömöntö igha,
‘Wabhëëywë ëbhëbhë ibhyaho,’
kasi nö-kömötëëbhya igha,
‘Emoka oghende?’
24 Kasi keno nkutuna ni-igha momanye igha,
öni Omoona uwa Ömöntöe neena ubhwera ubhwa ukwabhera abhantö ëbhëbhë ibhyabho,
ko-kebhara kono.
Ni-igho ndaakore.”
Mbe,
Yëësu akaisyörrya ömörööyë uyö,
akamötëëbhya igha,
“Emoka,
ogheghe rishambi iryaho oghende yeeka waaho.”
25 Kamwë igho,
ömöntö uyö akaimerra mo-bhantö hayö,
akaghegha rishambi iryaye reno yaarenga araarëëyë,
akaghya yeeka na eno aratöönia Waryobha.
26 Abhantö bhonswe igho bhano bhaarenga hayö,
bhakaroghoora bhököngʼu!
Bhakatöönia Waryobha.
Bhakabha na entarëki,
bhakaghamba igha,
“Reero törööshë amakono agha ököröghöörya!”
Yëësu arabherekera Raawi amosoorane
27 Hano ghayö ghaahööyë,
Yëësu akarwa hayö,
akamaaha ömöghööti uwa righööti ono yaabherekerwanga igha Raawi.
Raawi yaarenga aikaayë mo-kaghutu akaaye aka righööti.
Yëësu akamötëëbhya igha,
“Nshö onsoorane.”
28 Raawi akeemoka akatigha bhyonswe igho,
akamosoorana.
29 Raawi akakora öbhöghëni obhonene yeeka waaye,
ubhwa ökösërëënia Yëësu.
Akaraareka abhaghööti abha righööti abhaaru,
na abhantö abhandë bhonswe bhaaryanga nabho hamwë hayö ko-meeza.
30 Abhafarisaayo na abhëëghya abha amaraghërryö agha Mosa,
bhakaibhëmbëërya ko-bheegha abha Yëësu igha,
“N-kwakë mokosanga hamwë ibhyakorya na abhaghööti abha righööti na abha ëbhëbhëf abhandë?”
31 Yëësu akabhahonshora igha,
“Abharööyë mbo bhakutuna ömörëri abharere,
ta-bhahöru hë.
32 Ku bhuyö öni tenaasha okobherekera abhantö bhano bhakwimaaha igha m-bantö abha heene hë.
Kasi keno kyandeeta,
no-kobherekera abha ëbhëbhë,
okore bhahongore ëbhëbhë ibhyaho.”
Yëësu araituubhania kya ömötëti
33 Abhantö bhayö bhakabhöörya Yëësu igha,
“Abheegha abha Yohana na abha Abhafarisaayo,
nkwisasa bharë ibhyakorya bharasaasaama Waryobha.
Kasi abheegha abhaaho,
ndarra bho tebhakwisasa röndë hë?
No-korya ukwene bhaikarëëyë!”
34 Yëësu akabhahonshora igha,
“Iyakë moraatore okokora abhaghëndësya abha ömötëti,
bhaisase ibhyakorya,
na mbe n-hamwë bharë na ömötëti mu-bhwenga?
35 Kasi enkaagha iriihika,
hano ömötëti ariruusibhwa mo-bhasaani abhaaye muyö,
enkaagha iyö,
yo bhoono bharisasanga ibhyakorya.”
Amëëghyö amahya nkutuna gharë amaitegherro amahya
36 Yëësu akabharëngërya ëkërëngyö ikyëndë igha,
“Taaho ömöntö ono akotandora eketati ku-ngibho eehya,
okore aketomere ku-ngibho ëngötu.
Hano araakore igho,
naraasari ingibho eehya eera na eketati ikya ingibho eehya eera,
ti-kituubhane na ingibho ëngötu hë.
37 “Kora abhantö tebhakotoora idivai eehya mo-bheghansha ëbhëkörög ibhya amaseero hë.
Na hano bharaakore igho,
ebheghansha bhiyö,
nkobhaaroka bhërë,
na idivai ereeteka,
na ebheghansha bherasareka.
38 Idivai eehya,
ni-igha etoorwe mo-bheghansha ebhehya.
39 “Ömöntö ono yaanara idivai ënkörö,
takutuna idivai eehya hë.
Ko bhoora nkoghamba arë igha,
ënkörö eera,
yo inshiiya.”