Mataayo 9

Yëësu arahwënia ömörööyë uwa risusu

(Maariko 2:1-12; Ruuka 5:17-26)

Mbe, Yëësu akariina mu-bhwato akaamboka ukughya humbu iya inyansha iya Ghariraaya, akahika Kaperenaumu, umughi ghono yaamënyirë-mo. 2 Abhantö abhandë bhakareetera Yëësu ömörööyë uwa risusu bhamösëngʼënsirë kwi-shambi. Hano Yëësu yaarööshë engʼana iyö abhantö bhayö bhaakörrë, akamanya igha mbaana umukumo. Akatëëbhya ömörööyë uyö igha, “Moona uwaane iköngʼërrya, otakoobhoha, nkwabhëëyë ëbhëbhë ibhyaho!”

3 Hano abhëëghya nyabhorebhe abha amaraghërryö agha Mosa bhaaighuurë amangʼana ghayö, bhakaighambera mo-metwe ighyabho igha, “Ömöntö ono nkotoka arë Waryobha.” 4 Kasi Yëësu yaamanyirë keno bhaaitegherranga, ku bhuyö akabhatëëbhya igha, “Motakaabha na amaitegherro amaghogho kya ghayö mo-metwe ighyënyu. 5 Ne-ngʼana kë ëntöbhu iya okoghamba, ‘Wabhëëywë ëbhëbhë ibhyaho,’ kasi nö-kömötëëbhya igha, ‘Emoka oghende?’ 6 Keno nkutuna momanye ni-igha, öni Omoona uwa Ömöntö, neena obhotoro ubhwa ukwabhera abhantö ëbhëbhë ibhyabho ko-kebhara kono.” Ho Yëësu yaamarrë akatëëbhya ömörööyë uwa risusu uyö igha, “Emoka, ogheghe rishambi iryaho oghende yeeka waaho.” 7 Ömöntö uyö akahwena, akeemoka, akaghya ka. 8 Hano rikomo irya abhantö ryaarööshë ghayö, rekaroghoora bhököngʼu kora rekoobhoha. Rekatöönia Waryobha ono yaahaayë abhantö ubhwera kya bhuyö.

Yëësu arabherekera Mataayo amosoorane

(Maariko 2:13-17; Ruuka 5:27-32)

9 Hano Yëësu yaaruurë hayö, akasikana na ömöghööti uwa righööti ono yaabherekerwanga igha, Mataayo. Mataayo uyö, yaarenga aikaayë mo-kaghutu akaaye aka righööti. Yëësu akamötëëbhya igha, “Nshö onsoorane.” Mataayo akeemoka, akamosoorana.

10 Mbe, Yëësu akaghya wa Mataayo. Hano Yëësu yaarenga ko-meeza ararya ibhyakorya wa Mataayo hayö, tamaaha, abhaghööti abha righööti abhaaru na abhantö abhandë bhano bhaamanyekaini igha, m-ba ëbhëbhë, bhonswe bhakaasha bhakarya hamwë na Yëësu na abheegha abhaaye. 11 Hano Abhafarisaayo bhaarööshë amangʼana ghayö, bhakatëëbhya abheegha abha Yëësu igha, “Umwëghya uwëënyu uyö, taingʼarëëyë okorya hamwë na abhaghööti abha righööti na abha ëbhëbhë abhandë!” 12 Hano Yëësu yaangʼurrë amangʼana ghayö, akaghamba igha, “Ömörööyë we akutuna ömörëri, tö-möhöru hë! 13 Mbe, moghende mutune ensonga iya amangʼana agha Waryobha hano yaaghambirë igha, ‘Engʼana eno nkutuna, na-bhantö ukwabherana, ko bhoora ukwabherana nkökërrë ikimwenso keno abhantö bhakummwensera.’” Yëësu akabhatëëbhya igha, “Öni tenaasha okobherekera bhano bhakwimaaha igha, m-ba heene ku-Waryobha, a a! Kasi naasha igha, mberekere abha ëbhëbhë.”

Amëëghyö amahya nkutuna gharë amaitegherro amahya

(Maariko 2:18-22; Ruuka 5:33-39)

14 Mbe, ho abheegha nyabhorebhe abha Yohana Omobhatiisya bhaaishirë ku-Yëësu, bhakamöbhöörya igha, “Bhëëtö hamwë na Abhafarisaayo, nkwisasanga törë ibhyakorya. Kasi n-kwakë abheegha abhaaho bho bhatakwisasa ibhyakorya?” 15 Yëësu akabhahonshora igha, “Abhaghëndësya abha ömötëti, tebhakobhaabhayera enkaagha eno ukunyoora bharëngë hamwë na ömötëti. Kasi hano ömötëti ariruusibhwa mo-bhasaani abhaaye muyö, hayö bhoono ho abhasaani abhaaye bhareebhabhayera na ukwisasa ibhyakorya.

16 “Taaho ömöntö ono akoghegha ekeraka ekehya, aketomere ku-ngibho ëngötu hë. Hano araakore igho, ekeraka ekehya kiyö, nkeraatandore bhököngʼu ingibho ëngötu iyö. 17 Ghwiki ni-igha, abhantö tebhakohoma idivai eehya mo-bheghansha ëbhëkörö ibhya amaseero. Ko bhoora hano bharaakore igho, nkwateka bhërë, bhesareka, na idivai yeteka. Abhantö nkotoora bharë idivai eehya mo-bheghansha ebhehya. Hayö ho idivai na bheghansha bhetaasareke.”

Yëësu araryökya umwisëkë//na ukuhwënia omokari ono yaanyankuha

(Maariko 5:21-43; Ruuka 8:40-56)

18 Enkaagha eera waanyöörrë Yëësu akishumaasha ghayö, tamaaha, omotangati uwöndë uwa inyumba iya esango iya Abhayahudi, akaasha ku-Yëësu, akamotemera hansë ibhiru, akamötëëbhya igha, “Umwisëkë uwaane m-boono yaakwa. Kasi toghende omosambekere amabhoko, anyoore öbhöhöru.” 19 Yëësu akeemoka, akahinana na abheegha abhaaye, hamwë na suwaabho omohara uyö.

20 Tamaaha, omokari ono yaatemoranga amaanyinga imyoka ikömi na ibhërë, akarwa nyuma Yëësu, akakunia ku-ripindo irya ingibho iya Yëësu. 21 Yaakörrë igho, ko bhoora yaaighambëëyë mo-motwe ughwaye igha, “Hano ndaashe nkuni ripindo irya ingibho iyaaye igho, nendaahwene.” Ku bhuyö akakunia ripindo irya ingibho iya Yëësu. 22 Yëësu akaisyörya akamomaaha, akamötëëbhya igha, “Ghömërrya mwisëkë uwaane. Keno këghërrë uhwënirë, nu-mukumo ughwaho.” Hayö na hayö igho, omokari uyö akahwena.

23 Mbe, hano Yëësu yaaghyanga mu-nyumba iya omotangati uwa esango iya Abhayahudi, akamaaha abhantö abhaaru bhaikomaini mu-ruku hayö, abhandë bharahuuta ebherongwe, na abhandë bharakuura bhököngʼu bhabhaabhayëëyë. 24 Yëësu akabhatëëbhya igha, “Murwe hano. Omohara ono takuurë hë naraayë.” Hano abhantö bhaaighuurë amangʼana ghayö, bhakamosekerra. 25 Hano rikomo irya abhantö ryaaruusiibhwi mu-nyumba, Yëësu akasoha mu-kinyumba ikya omohara uyö. Akaghoota okobhoko omohara uyö, akeemoka ahwënirë. 26 Amangʼana ghayö ghakaromaana ikyaro kiyö kyonswe igho.

Yëësu arahwënia abhahukuru na rimuumu

27 Hano yaarwanga hayö, abhahukuru abhabhërë bhakamurwa nyuma bharakonga igha, “Umwebhorwa Daudi, otatwabhera!” 28 Hano Yëësu yaasöhirë mu-nyumba, abhahukuru bhayö bhakaghya ko-we. Akabhabhöörya igha, “Morakumya igha, ndatora okobhahwënia?” Bhakamohonshora igha, “Yëë Omonene, nkukumya törë.” 29 Ho bhoono Yëësu yaakuniri amaiso aghaabho, na eno arabhatëëbhya igha, “Nkobhahwënia ndë, ko bhoora mukukumya igha ndatora okobhahwënia.” 30 Kamwë igho, bhakamaaha. Yëësu akabhakangʼasërrya igha, bhatakaatëëbhya ömöntö wowonswe oora amangʼana ghayö. 31 Kasi hano bhaaruurë hayö, bhakaraarekera abhantö bhonswe igho abha ikyaro kiyö.

32 Hano abhahukuru bhayö bhaarwanga hayö, tamaaha, abhantö abhandë bhakareetera Yëësu ömöntö ono yaarenga na risambwa reno ryaamökörrë abhe rimuumu. 33 Yëësu akaata risambwa ukurwa kö-möntö uyö. Rimuumu riyö rekasimya ukushumaasha. Abhantö bhano bhaarë hayö, bhakaroghoora bhököngʼu, kora bhakaghamba igha, “Engʼana kya eno tiyaakakörrwë Isiraëri hano hë.” 34 Kasi Abhafarisaayo bhakaghamba igha, “Oghosambwa, oghonene ughwa amasambwa ghoora, ngwo ghokomohaana obhotoro ubhwa ukwata amasambwa ukurwa ko-bhantö.”

Yëësu aramaahera abhantö amaabhë

35 Mbe, Yëësu akabha arainaaranaara mu-mighi ghyonswe igho na mu-bhishishi. Ahasë honswe hano yaahetanga, yëëghyanga abhantö mu-sinyumba isya esango iya Abhayahudi. Yaaraarekanga Amangʼana Amaiya agha Obhokama ubhwa Waryobha, na ukuhwënia abhantö amarööyë ghonswe igho. 36 Hano yaarööshë abhantö abhaaru bharösirë, tebhaana uwa okobhatöörrya hë, akabhaabhera. Mbaarë kya amangʼöndi ghano ghataana ömörëësya uwa okoghangarra. 37 Hayö ho Yëësu yaatëëbhëri abheegha abhaaye igha, “Ibhyakorya m-byaru kö-möghöndö, kasi abhaghësi m-bake igho. 38 Ku bhuyö mosaasaame mwene ömöghöndö, ahire abhaghësi kö-möghöndö bhaghese.”