Abhakari bhano bhaatöörryanga Yëësu
8
Hano ghayö ghaahööyë,
Yëësu akabha arainaaranaara mu-mighi na mu-bhishishi.
Ahasë honswe hano yaahetanga,
yaaraarekeranga abhantö Amangʼana Amaiya agha Obhokama ubhwa Waryobha.
Yaaraarekanga hamwë na abheegha abhaaye ikömi na bhabhërë.
2 Kora bhaare-ho abhakari abhandë bhano bhaahinaini na Yëësu.
Abhakari bhayö bhaarë na amarööyë,
na abhandë bhaarë na amasambwa.
Yëësu yaabhahwënëri na ukwata amasambwa ghano bhaarë nagho.
Mo-bhakari bhayö,
yaare-mo Maryamu uwa Maghidara,
ono Yëësu yaatirë-ko amasambwa muhungatë.
3 Yoana mokaa Kuza wonswe ho yaarë.
Kuza uyö,
we yaarë umwimërërri uwa ëbhëntö ibhya omokama Herode Antipa.
Yaare-ho Susana,
na abhakari abhandë abhaaru.
Abhakari bhayö,
mbaasororanga ëbhëntö ibhyabho,
kö ökötöörya Yëësu na abheegha abhaaye.
Ëkërëngyö ikya umubhusuri
4 Hano rikomo irya abhantö ukurwa mu-mighi imyaru bhaaikomaini,
na abhantö bhakabha bharaasha ku-Yëësu,
akabharëngërya ëkërëngyö keno igha,
5 “Yaare-ho umubhusuri ono yaaghëëyë ukubhusura kö-möghöndö ughwaye.
Enkaagha eno yaabhusuranga,
seheke isyëndë isya imbusiro sekaghwa ko-nshera,
sekatashwatashwa,
na ibhinyönyi bhekaasha bhekaserya.
6 Isyëndë sekaghwa ku-rirobha irya ku-ritare,
na hano syaamërrë,
sekabhorwa ikinyiha sekooma.
7 Isyëndë sekaghwa mo-maanyamahwa,
sekamera hamwë na amaanyamahwa,
ëntöki ekasetokera.
8 “Syaare-ho isyëndë seno syaaghööyë ku-rirobha iriiya.
Sekamera na ukukiina bhuuya,
sekaama bhököngʼu!”
Hano Yëësu yaamarrë okobharëngërya ëkërëngyö kiyö,
akaghamba bhököngʼu igha,
“Ömöntö wowonswe ono aighuurë ghayö ngambirë,
aghaitegherre bhuuya.”
Keno kyaagheranga Yëësu ararëngya ëbhërëngyö
9 Abheegha abha Yëësu bhakamöbhöörya ensonga iya ëkërëngyö kiyö yaabharëngëëyi.
10 Akabhahonshora igha,
“Amangʼana agha Obhokama ubhwa Waryobha ngaibhisirë.
Nyakara bhëënyu,
ko bhoora Waryobha abhahönyörrëëyë amangʼana ghayö,
okore moghamanye.
Kasi abhandë në-bhërëngyö nkobharëngërya,
ko bhoora igha,
‘Hano bhamaaha,
n-kya hano bhatarööshë.
Nokaanyoora bhaana amatwë bharaighwa,
kasi n-kya bhano bhatakwighwa,
tebhakomanyërrya hë.’a
11 “Ensonga iya ëkërëngyö kiyö ni-igha,
Amangʼana Amaiya agha Waryobha,
ngo imbusiro.
12 Simbusiro seno syaaghööyë ko-nshera,
siyö na-bhantö bhano bhakwitegherra engʼana iya Waryobha,
kasi Oghosambwa ghuusha ghuruusya engʼana iyö mo-senkoro isyabho,
okore bhatakaakumya,
bhatööribhwi.
13 “Na simbusiro seno syaatöönyirë ku-rirobha irya ku-ritare,
siyö na-bhantö bhano bhakwitegherra engʼana iya Waryobha,
bhashomerwa,
bhakumya enkaagha enke igho.
Kasi hano bhashaashibhwa bhaghitigha,
mbatuubhaini kya ëmëröngö gheno ghetahirrë imiri mu-rirobha.
14 “Simbusiro seera syaatöönyirë mo-maanyamahwa,
siyö na-bhantö bhano bhakwitegherra engʼana iya Waryobha bhaghikërrya.
Kasi hano enkaagha yaaheta-ho,
bhanyankibhwa na amangʼana agha ubhutuni,
ukwighomba ubhwamë,
na obhoraaghëri.
Amangʼana ghayö ngo ghakoghera umukumo ughwabho teghokobha ughwa heene hë.
15 “Kasi simbusiro seno syaatöönyirë mu-rirobha iriiya,
siyö na-bhantö bhano bhakwighwa engʼana iya Waryobha.
Hano bhamara ukughitegherra,
bhaghetoora mo-senkoro isyabho sinshiiya,
na eno bharaghëndërrya okoghenaghya.
Bhayö mbo bhakobha na örööbhö senkaagha syonswe igho.
Ëkërëngyö ikya etara
16 “Taaho ömöntö ono aköghöötya etara,
amare aghikundikiri mu-nyöngö,
handë aghetoore mwi-rungu.
Kasi ömöntö hano yaghöötya etara,
nkoghetoora arë ko-katangora,
okore hano abhantö bharaasohe mu-nyumba bhamaahe obhorabhu.
17 Hano yaakora igho,
ëkëntö kyokyonswe keno kibhisirwë,
nkobha kërë harabhu igho.
Na bheno bhikundikiriibhwi mberaakondokorwe bhemaahekane.
18 Ku bhuyö amëëghyö aghaane ghano mukwighwa,
moghaitegherre bhuuya.
Ömöntö ono amanyirë ëkëntö,
Waryobha nkumwëngërya arë ko-bhomanyi ubhwaye bhuyö.
Kasi ono atamanyirë ëkëntö,
nkuruusibhwa arë kora keera akokanya igha naanakyo.”
Bhawamwabho Yëësu
19 Mbe,
nyakuwaabho Yëësu na bhawamwabho Yëësu,
bhakaasha ku-Yëësu.
Kasi tebhaamuhikirë haangʼë hë,
ko bhoora waanyöörrë abhantö bhamwihöndërrëëyë.
20 Abhantö abhandë bhakatëëbhya Yëësu igha,
“Nyakuwëënyu na abhamura abhëënyu n-kebhara hayö bharë,
bharatuna momaahane.”
21 Yëësu akabhahonshora igha,
“Maayö na abhamura abhëëtö m-bano bhakwitegherra engʼana iya Waryobha na ukughikërrya.”
Yëësu arahamera rikama na amayengo
22 Urusikö nyabhorebhe,
Yëësu yaariinirë mu-bhwato hamwë na abheegha abhaaye.
Akabhatëëbhya igha,
“Twamboke tughi humbu.”
Bhakatanora bhakaghya.
23 Enkaagha iyö bhaambokanga,
Yëësu akaghya akaraara,
akaihiribhwa.
Mbe,
ikighumbë kekahuusha ku-nyansha kuyö,
kora ubhwato ubhwabho bhokataha amanshë bhokasimya ukukwererra,
hake bhakwererre.
24 Abheegha bhayö bhakaghya ku-Yëësu,
bhakamutura bharamötëëbhya igha,
“Omonene uwëëtö!
Omonene uwëëtö!
Torakwererra!”
Yëësu akabhooka,
akahamera rikama iryaru riyö na amayengo.
Bhekatigha kamwë igho,
kokatendeera.
25 Hayö bhoono ho Yëësu yaabhöörri abheegha abhaaye igha,
“Ukukumya ukwënyu hayi körëngë?”
Abheegha bhakoobhoha bhököngʼu,
bhakaroghoora,
na okobhoorania igha,
“Kana!
Ömöntö ono n-wa teemo kë?
Arahamera rikama rirörö kai na amayengo,
bheramwighwera kamwë igho bhamurë!”
Yëësu arahwënia ömöntö ono aana amasambwa
26 Ho bhoono Yëësu na abheegha abhaaye bhaambökirë inyansha iya Ghariraaya.
Bhakahika ko-morambo ughwa ikyaro ikya Abhagherasi,
keno kërëngë humbu iya Ghariraaya.
27 Ni-igho Yëësu yaaikirë ukurwa mu-bhwato igho ko-morambo hayö,
akasikana na ömöntö uwa mu-mughi muyö,
ono yaarë na amasambwa.
Ömöntö uyö ku-ribhagha ritambë tiyaatooranga singibho hë,
kora tiyaikaranga mu-nyumba hë,
kasi yaaikaranga mo-sembeehera seno syaarë mo-masana.
28-29 Risambwa riyö,
m-mara kaaru ryaamoghootanga.
Abhantö bhaashaashyanga okomorenda ko okomobhoha ebheraangʼani na sipingu,
kasi yaabhebhotoranga.
Risambwa riyö ndyaamuhiranga ku-riköngö.
Hano ömöntö uwa risambwa uyö yaahomeraini na Yëësu,
akakora ikituri.
Mbe,
Yëësu akahamera risambwa riyö rirwe kö-möntö uyö.
Ömöntö uyö akairekera hansë bhubhuumaayë mbere iya Yëësu hayö,
arakonga bhököngʼu igha,
“Uwe Yëësu Omoona uwa Waryobha ono ökërrë bhyonswe igho,
ne-ngʼana kë ukuntuna-ko?
Ndakosaasaama,
otakaanteesa!”
30 Yëësu akamöbhöörya igha,
“Iriina iryaho nu-uwe wë?”
Akamohonshora igha,
“Nö-öni rijëëshi.”
Yaaghambirë igho,
ko bhoora amasambwa m-maaru yaarë nagho.
31 Amasambwa ghayö ghakasaasaama Yëësu,
okore atakaaghahamera ukughya mu-bhwina ubhwa mu-kyaro ikya abhaku.b
32 Mbe,
ahasë hayö,
ryaare-ho rihisho rinene irya sëmbëëshë seno syaarëësyanga ku-nguku hayö.
Bhoono mbe,
amasambwa ghayö ghakasaasaama Yëësu aghatighe ghaghende ghasoherre sëmbëëshë,
Yëësu akaikërrya.
33 Amasambwa ghakarwa kö-möntö uyö,
ghakaghya ghakasoherra sëmbëëshë siyö kwa nguru.
Sëmbëëshë syonswe igho,
sekatirimana ukurwa ku-nguku,
ku-kihiringityö ëkërörö,
sekaghya mu-nyansha,
sekakwera-mo.
34 Hano abharëësya abha sëmbëëshë siyö bhaarööshë ghayö ghaaikörrë,
bhakakenya ukughya mu-mughi na mu-bhishishi bhakaraareka amangʼana ghayö ko-bhantö.
35 Ho abhantö bhaaimökirë ukughya okomaaha amangʼana ghayö kya igho gharë,
bhakahika ku-Yëësu.
Hano bhaamöhëkërëëyë,
bhakamaaha ömöntö uyö yaatirwe-ko amasambwa,
aikaayë haangʼë na amaghörö agha Yëësu.
Atöörrë singibho na ikyamotwe kyamökirë,
abhaayë ömöhöru.
Abhantö bhayö bhakoobhoha.
36 Abhantö bhano bhaarööshë ghonswe igho ghayö,
mbo bhaatëëbhëri bhayö bhaaishirë,
kya igho ömöntö uyö yaahwëniibhwi.
37 Abhantö bhonswe igho bhayö,
bhano bhaaruurë mu-kyaro ikya Abhagherasi,
bhakoobhoha bhököngʼu.
Bhakasaasaama Yëësu igha,
arwe waabho hayö.
Yëësu akariina mu-bhwato,
akakyora.
38 Ömöntö uyö yaatirwë-ko amasambwa,
akasaasaama Yëësu igha,
bhahinane.
Kasi Yëësu akaanga.
Akamötëëbhya igha,
39 “Kyora wëënyu,
ötëëbhi abhantö ghayö Waryobha akökörëëyë.”
Ömöntö uyö akarwa hayö,
akainaaranaara araraarekera abhantö abha kera ahasë mu-mughi muyö ghano Yëësu amökörëëyë.
Yëësu araryökya umwisëkë na ukuhwënia omokari ono yaanyankuha
40 Hano Yëësu yaakyörrë mo-mokowa ughwa Ghariraaya eera yaarë,
akasërëënibhwa-yo na rikomo irya abhantö bhano bhaamoghanyanga.
41 Akeesherwa hayö na ömöntö ono yaabherekerwanga igha Yairo.
Yairo uyö we yaarë omonene uwa inyumba iya esango iya Abhayahudi.
Hano yaahikirë ku-Yëësu,
akamotemera hansë ibhiru.
Akamokangʼasërrya igha,
aghi yeeka waaye,
42 ko bhoora mwisëkë uwaaye,
m-mörööyë yaarë musingu.
Umwisëkë uyö,
uwa imyoka ikömi na ibhërë,
mu-mwëmwë yaarë.
Yëësu akaikërrya bhakahinana.
Hano Yëësu yaaghyanga-yo,
rikomo irya abhantö ndyaahinaini nawe,
rekabha reramwihonderra bhököngʼu.
43 Na mo-bhantö bhayö,
yaare-mo omokari uwöndë ono yaatemoranga amaanyinga imyoka ikömi na ibhërë.
[Nokaanyoora yaahirrë ëbhëntö ibhyaye bhyonswe igho kö-bhörëri,]
c kasi tiyaare-ho ömörëri kora ömwë ono yaatöörrë okomorera.
44 Bhoono mbe omokari uyö,
akaasha nyuma iya Yëësu,
akakunia ripindo irya ingibho iya Yëësu.
Okotemora amaanyinga ukwaye,
kokabhotoka hayöhayö.
45 Yëësu akabhöörya igha,
“N-nawë ankuniri?”
Abhantö bhonswe igho bhakaanga.
Peetero akatëëbhya Yëësu igha,
“Omonene uwëëtö,
tokomaaha igha abhantö m-baaru bhakwinaarrë,
bhakwihöndërrëëyë?”
46 Kasi Yëësu akaghamba igha,
“Nemanyirë igha aaho ömöntö ono ankuniri,
ko bhoora nighuurë obhotoro ubhwa ukuhwënia bhundure-ko ukughya ukuhwënia ömöntö.”
47 Hano omokari uyö yaarööshë igha taana enshera yoyonswe igho iya ukwibhisa,
akaasha ku-Yëësu na eno ararighita.
d Akatema hansë ibhiru,
akatëëbhya Yëësu ikibhuno ikya ukumukunia,
na bhono ahwënirë kamwë igho.
Na abhantö bhonswe igho,
mbaaighuurë bhuyö yaaghambirë.
48 Yëësu akamötëëbhya igha,
“Mwisëkë uwaane,
keno këghërrë uhwënirë,
nu-mukumo ughwaho.
Kaghi na omorembe!”
49 Enkaagha iyö waanyöörrë Yëësu akishumaasha,
akaasha-ho ömöntö ukurwa wa Yairo omonene uwa inyumba iya esango iya Abhayahudi.
Ömöntö uyö akatëëbhya Yairo igha,
“Otakaanyankya umwëghya,
ko bhoora umwisëkë uwaaho,
amarrë ukukwa.”
50 Kasi hano Yëësu yaaighuurë amangʼana ghayö,
akatëëbhya Yairo igha,
“Otakoobhoha.
Uwe obhe na umukumo,
umwisëkë uwaaho naraahone.”
51 Hano Yëësu yaahikirë wa Yairo,
tiyaikërëëyi ömöntö wowonswe igho asohe hamwë nawe.
Kasi yaaghëghirë Peetero,
Yohana,
Yaakobho,
na abhaibhöri abha umwisëkë uyö yaarenga akuurë,
mbo yaasöhirë nabho muyö.
52 Abhantö bhano bhaare-ho mbaakuuranga na okosemenkerra ko okoghera ukwa umwisëkë uyö.
Kasi Yëësu akabhatëëbhya igha,
“Motakaakuura.
Umwisëkë ono takuurë hë,
kasi naraayë.”
53 Abhantö bhayö bhakasimya okomosekerra,
ko bhoora mbaamanyirë igha,
umwisëkë uyö,
amarrë ukukwa.
54 Yëësu akaghoota okobhoko ukwa umwisëkë uyö,
akamutura bhököngʼu igha,
“Bhooka ore mwisëkë.”
55 Kamwë igho,
umwisëkë uyö akaheeshera,
akemerra.
Yëësu akabharaghërrya igha,
bhamohaane ibhyakorya.
56 Abhaibhöri abha umwisëkë uyö,
bhakaroghoora bhököngʼu.
Kasi Yëësu akabhakaania bhatakaatëëbhya ömöntö wowonswe igho ghayö ghaaikörrë hayö.