Umukumo ughwa omonene uwa abhasirikare
7
Hano Yëësu yaamarrë ökötëëbhya rikomo irya abhantö amangʼana ghayö ghonswe igho,
akasoha mu-mughi ughwa Kaperenaumu.
2 Mu-mughi muyö,
yaare-mo omonene uwa abhasirikare abha Ikiruumi.
Omonene uyö,
yaarenga na omoghorwa uwaaye ono yaahanshirë bhököngʼu.
Kasi omoghorwa uyö,
m-mörööyë musingu yaarë.
3 Mbe,
omonene uyö hano yaaighuurë amangʼana ghano Yëësu yaakoranga,
akatoma abhaghaaka abha Ikiyahudi ku-Yëësu,
okore bhamosaasaame,
aashe amuhwënëri omoghorwa uwaaye.
4 Hano abhaghaaka bhayö bhahikirë ku-Yëësu,
bhakamokangʼasërrya bhököngʼu,
kö ökömötëëbhya igha,
“Naingʼarëëyi omokorre engʼana iyö,
5 ko bhoora nahanshirë ikyaro ikyëtö.
Uyö we yaatohaghaashera inyumba iya esango iyëëtö.”
6 Mbe,
Yëësu akatanora hamwë na abhaghaaka bhayö,
ukughya wa omonene uyö.
Hano bhaahikirë haangʼë,
omonene uyö akatoma abhasaani abhaaye bhaherre Yëësu amangʼana igha,
“Uwe ore Omonene tigha otakaanyanka,
ko bhoora,
tiningʼarëëyi osohe mu-nyumba iyaane hë.
7 Nkyo ndööshë igha,
tiningʼarëëyi ukuusha ku-uwe hë.
Kasi ghamba engʼana ëmwë iyeene igho,
omoghorwa uwaane naraahwene.
8 Ko bhoora kora öni wonswe n-hansë ndë iya ubhwera ubhwa uwöndë,
na ghwiki bhaaho abhasirikare abhandë bhano neena ubhwera ko-obho.
Hano naatëëbhya umusirikare nyabhorebhe igha,
‘Kaghi,’
nkughya arë.
Na hano naatëëbhya uwöndë igha,
‘Nshö,’
nkuusha arë.
Hano naatëëbhya omoghorwa uwaane igha,
‘Kora omoremo ghono,’
nkokora arë.”
9 Hano Yëësu yaaighuurë amangʼana ghayö,
akaroghoora bhököngʼu.
Akaisyörrya rikomo irya abhantö bhano bhaamosoorananga,
akabhatëëbhya igha,
“Tenakasikaini na ömöntö uwa umukumo omonene kya ghono ku-kyaro ikya Isiraëri hano!”
10 Mbe,
abhantö bhayö bhaatömirwë hano bhaakyörrë ka,
bhakanyoora omoghorwa uwa omonene uyö ahwënirë.
Yëësu araryökya umumura uwa umusinö
11 Hake igho,
Yëësu akaghya mu-mughi ghono ghwaabherekerwanga igha Naini,
aana abheegha abhaaye hamwë na abhantö abhandë abhaaru.
12 Hano yaahikirë haangʼë na ikihiita ikya umughi ghuyö,
akasikana na abhantö bhano bhaarenga bhaghëghirë umuku,
bharaghya okobheeka.
Umuku uyö,
m-moona uwa ikishaasha yaarë,
mu-mwëmwë yaarë ku-nyakuwaabho.
Nyakuwaabho m-musinö yaarë.
Omokari umusinö uyö,
yaahinaini na abhantö abhaaru abha mu-mughi muyö,
ukughya okobheeka.
13 Hano Omonene Yëësu yaarööshë umusinö uyö,
akamwabhera.
Akamötëëbhya igha,
“Kira,
otakaakuura.”
14 Ho Yëësu yaasuntarëëyë amasheera ghano bhaaghëghëëyë-ko umuku,
akaghakunia.
Abhantö bhayö bhaarenga bhaghëghirë umuku bhakaimerra.
Yëësu akatëëbhya umuku uyö igha,
“Uwe mora,
ndakötëëbhya igha,
bhooka!”
15 Umumura uyö,
akabhooka akaikara,
akasimya ukushumaasha.
Yëësu akahërrya umusinö uyö mura uwaaye.
16 Abhantö bhayö bhonswe igho bhakabha na entarëki bhököngʼu.
Bhakasimya ökötöönia Waryobha bharaghamba igha,
“Ömörööti omonene yaibhökëëyë mö-bhëëtö mono!”
Bhakaghamba igha,
“Waryobha atotaarëëyë na ökökötöörrya abhantö abhaaye!”
17 Amangʼana ghayö ghakaromaana bhököngʼu mo-mokowa ughwa Yudea yonswe igho,
na mo-mekowa ighyëndë ighya haangʼë hayö.
Yohana Omobhatiisya arabhöörya Yëësu engʼana
18 Abheegha abha Yohana bhaatëëbhëri Yohana amangʼana ghayö ghonswe igho,
ghano Yëësu yaakoranga.
19 Yohana akabherekera abhabhërë mo-bheegha abhaaye muyö.
Akabhatoma bhaghende bhabhööri Omonene Yëësu igha,
“Nu-uwe Mesiyaa ono abharööti bhaaghambirë igha ariisha,
kasi nu-wöndë tokaitengʼera?”
20 Abheegha abha Yohana bhayö,
bhakatanora bhakaghya.
Hano bhaahikirë ku-Yëësu,
bhakamötëëbhya igha,
“Yohana Omobhatiisya atötömirë tököbhööri igha,
‘Nu-uwe Mesiya oora abharööti bhaaröötirë igha ariisha?
Kasi tu-uwe hë,
nu-wöndë toraaghanye?’ ”
21 Enkaagha iyö,
Yëësu yaahwënianga abharööyë abhaaru.
Yaatanga amasambwa ko-bhantö,
kora yaagheranga abhahukuru abhaaru bhamaaha.
22 Mbe,
Yëësu akabhahonshora igha,
“Moghende mötëëbhi Yohana ghano mörööshë hano,
na ghano mwighuurë.
Abhahukuru nkomaaha bharë,
amatengʼo nkoghenda gharë,
abhaghenge nkosaabhuurwa bharë,
abhakirö nkwighwa bharë,
abhaku nkuryökibhwa bharë,
na abhatöbhu nkoraarekerwa bharë Amangʼana Amaiya.b
23 Nyakara ömöntö ono aköghëndërrya ukunkumya.”
24 Hano abheegha abha Yohana abhabhërë bhayö bhaatanööyë,
Yëësu akasimya ököbhöörya rikomo irya abhantö bhayö amangʼana agha Yohana igha,
“Hano mwaaghëëyë ku-riköngö okomaaha Yohana,
m-möntö kë mwaaitengʼeranga okomaaha?
Mwaaitengʼeranga okomaaha ömöntö ono akwikërrya amangʼana ghonswe igho,
kya umunyaamunsi ghono ghukuhuushwa na rikama hasë honswe igho hano rikama rekobhata?
Ti-igho hë.
25 Nyoore motaarë möghëëyë okomaaha ömöntö ono anga kya umunyaamunsi,
bhoono n-kë mwaarë möghëëyë okomaaha?
Tö-möntö ono atöörrë singibho sinshiiya hë.
Ko bhoora abhantö bhano bhakotoora singibho sinshiiya,
na ukwihansha ku ubhwaru ubhwa ëbhëntö bheno bhaanabhyo,
bhayö mmo-manyumba agha ekekama bharë.
26 Bhoono n-kë mwaarë möghëëyë okomaaha?
Nö-mörööti?
M-maheene,
tigha mbatëëbhi!
Yohana uyö,
nakërrë ömörööti.
27 Yohana uyö,
we Amaandeko Amahörëëru ghakoghamba igha,
‘Tamaaha,
nendaatome umuhiri uwaane uwa amangʼana,
ono araakösëëmëri enshera.’c”
28 Yëësu akaghamba igha,
“Ndabhatëëbhya igha,
abhantö bhonswe igho bhano bheebhorwa ko-kebhara kono,
taaho omonene okokera Yohana Omobhatiisya hë.
Nokaanyoora ni-igho ërë,
kasi omoke,
mo-Bhokama ubhwa Waryobha,
m-monene ku-Yohana uyö!”
29 Hano abhantö bhayö bhaaighuurë amangʼana ghayö,
bhakaikërrya kya bhono Waryobha yaabhasëëmëëyi.
Kora na abhaghööti abha righööti bhonswe m-buyöbhuyö bhaakörrë.
Abhantö bhayö,
m-baara bhaarenga bhaabhatiisiibhwi na Yohana.
30 Kasi Abhafarisaayo na abhëëghya abha amaraghërryö agha Mosa,
abheene mbaangirë ghano Waryobha yaabhatoneranga-ko,
ko bhoora mbaangirë okobhatiisibhwa na Yohana.
31 Yëësu akaibhöörya igha,
“Kana,
n-kë nkatuubhania na abhantö abha rekora reno?
Iyakë bharë?
32 Mbatuubhaini kya abhaana bhano bhaikaayë mo-moteera,
bharahonshorana na bharikyabho igha,
‘Tobhahöötëëyë ekerongwe,
kasi timubhinirë hë!
Tokarëëtya amarëëtyö agha amaashishi,
kasi timukuurrë hë.’
33 “Nembatuubhaini igho,
ko bhoora hano Yohana Omobhatiisya yaaishirë,
tiyaaryanga emekaate handë ukunywa idivai hë.
d Kasi bhëënyu mokaghamba igha,
‘Aana risambwa.’
34 Bhoono mbe,
öni Omoona uwa Ömöntö nishirë,
nkorya ndë emekaate na ukunywa idivai,
bhëënyu moraghamba igha,
‘Motamaaha mbe omohoobhaaru ono,
kora m-mörëëbhi,
na omosaani uwa abhaghööti abha righööti na abha ëbhëbhë abhandë.’
35 Kasi abhantö bhano bhaköröndërrya obhongʼaini ubhwa Waryobha,
nkwörökya bharë igha,
obhongʼaini ubhwaye m-boheene.”
Yëësu araabhera omokari umunyanku
36 Omofarisaayo nyabhorebhe yaaraarëkirë Yëësu aghende okorya waaye.
Yëësu akaghya igho,
akasoha mu-nyumba,
akabha ko-meeza hayö.
37 Mu-mughi muyö,
yaare-mo omokari uwöndë ono yaamanyekaini igha mököri uwa ëbhëbhë.
Omokari uyö,
akaighwa igha Yëësu nkorya arë ibhyakorya wa Omofarisaayo uyö.
Akahika mu-nyumba muyö,
aana inshubha iya arabhaasitae yiishööyë amaghuta ghano ghakurumbaasa bhuuya.
38 Omokari uyö akaimerra nyuma,
haangʼë na amaghörö agha Yëësu.
Hano yaakuuranga,
amaisöri aghaaye ngatoonyeranga Yëësu ko-maghörö,
akabha aragheeyera situukya isyaye.
Akabha aramuumunta amaghörö agha Yëësu na okoghahaka amaghuta ghano ghakurumbaasa bhuuya.
39 Omofarisaayo uyö hano yaarööshë amangʼana ghayö,
akaitegherra mo-motwe ughwaye igha,
“Singa m-maheene igha Yëësu ono m-mörööti,
nakaamanyirë igha,
omokari uyö akumukunia n-wa teemo kë,
nakaamomanyirë igha,
n-wa ëbhëbhë.”
40 Yëësu akatëëbhya Omofarisaayo uyö igha,
“Simööni,
ndatuna nköbhööri-ko engʼana.”
Simööni akamohonshora igha,
“Uwe otamböörya umwëghya uwaane.”
Mbe,
Yëësu akamöbhöörya igha,
41 “Bhaare-ho abhantö bhabhërë,
bhano bhaarë na isiirë iya ömöntö nyabhorebhe.
Uwa mbere yaarë,
na isiirë iya sidinaari maghana ataano.
Uwa kabhërë,
we yaarë na isiirë iya sidinaari merongo etaano.
42 Hano bhonswe igho bhabhërë bhayö bhaabhörrwë ikya okohaka,
mwene isiirë uyö,
akabhaabhera,
bhatakaamohaka.
Bhoono mbe ko bhonswe abhabhërë bhayö,
nawë araahanshe mwene isiirë uyö okokera murikyaye?”
43 Simööni akamohonshora igha,
“Ndamanya no-oora yaabhëëywë isiirë enene.”
Yëësu akamötëëbhya igha,
“M-buuya oghambirë.”
44 Hayö ho bhoono Yëësu yaaisyörëëyi omokari uyö,
akatëëbhya Simööni igha,
“Oramaaha omokari ono?
Hano nsöhirë waaho hano,
tönsërëënëri ko okongʼaana amanshë agha ukwisaabha amaghörö aghaane hë.
Kasi omokari ono,
anshöshëri amaghörö na amaisöri aghaaye,
kora aghëëyëyë situukya isyaye.
45 Uwe tönkëërri,
kora tunyibharrë hë.
Kasi we taraarosa ukumuumunta amaghörö aghaane kerenga asöhirë mono.
46 Tonhakirë amaghuta ko-motwe ughwane ukwörökya igha nönsöökirë,
kya igho eteemo iyëëtö ërë.
Kasi umwene anhakirë amaghuta ghano ghakurumbaasa bhuuya ko-maghörö aghaane!
47 Ku bhuyö ndakötëëbhya igha,
ëbhëbhë ibhya omokari uyö,
m-byaru,
kasi abhëëywë bhyonswe igho.
Kiyö nkyo kekoghera arabha na righonshe rinene.
Kasi ömöntö ono akwabherwa ëbhëbhë bheke igho,
wonswe righonshe iryaye ni-ike igho rekobha.”
48 Ho bhoono Yëësu yaatëëbhëri omokari uyö igha,
“Wabhëëywë ëbhëbhë ibhyaho.”
49 Abhaghëni abhandë bhano bhaarë ko-meeza hayö,
bhakasimya okobhoorania igha,
“Kana ono m-möntö kë akwabhera abhantö ëbhëbhë ibhyaho bhamurë?”
50 Yëësu akatëëbhya omokari uyö igha,
“Keno këghërrë ötööriibhwi,
nu-mukumo ughwaho.
Kaghi na omorembe.”