Ruuti aratëëbhya Bhowazi igha amutughe
3
Urusikö urwöndë Naömi yaatëëbhëri Ruuti mokaamoona waaye igha,
“Mwisëkë uwaane,
tigha nkotonere umushaasha ono oraakutughe,
okore amangʼana aghaaho ghashome.
2 Bhowazi ono ukuhinananga hamwë na abhaköri abha emeremo abhaaye abha ekekari,
m-muhiiri uwëëtö uwa haangʼë.
Ubhutikö ubhwa reero,
naraashe ahoore ishayiri ku-kibhugha.
3 Bhoono uwe kaghi wisaabhe,
wihake amaghuta agha ikirumba ikiiya,
wibhohe singibho isyaho sinshiiya,
oghende ku-kibhugha.
Kasi angarra atakaamanya igha n-hayö örë.
Utighe tangata amare okorya na ukunywa.
4 Uushe witaahe bhuuya ahasë hano araaghi okoraara.
Hano araashe ihiribhwi,
ushobhe,
okondokore ko-maghörö aghaaye,
oraare-ho.
Hano araabhooke nakötëëbhya keno oraakore.”
5 Ruuti akamohonshora igha,
“Nendaakore ghonswe igho ghayö öntëëbhëri.”
6 Mbe,
akaghya ku-kibhugha haara,
akakora kya bhono nyakubhyara uwaabho yaamoraghërrëëyi.
7 Hano Bhowazi yaamarrë okorya na ukunywa,
akashomerwa.
Akaghya haangʼë na ishayiri eno yaarenga ëbhömbirwë hamwë,
akaraara akaihiribhwa.
Ruuti akashobha,
akakondokora ko-maghörö agha Bhowazi,
akaraara-ho bhughunyi.
8 Mu-bhutikö ghatë,
Bhowazi akaisyörya,
akaitakya,
ko bhoora yaanyöörrë omokari araayë ko-maghörö aghaaye hayö.
9 Akamöbhöörya igha,
“Nu-uwe wë?”
Ruuti akamohonshora igha,
“Nö-öni Ruuti,
ömököri uwa emeremo uwaaho.
Uwe nu-uwe muhiiri uwaane uwa haangʼë,
ndasabha untughe.”
10 Bhowazi akamötëëbhya igha,
“Umwisëkë uwaane,
YEHOBHA Waryobha akongʼoore ko-ghonswe igho ghano ökörrë.
Öbhöntö ubhwa heene bhono ökörrë bhoono igho mo-kesaku ikyëtö,
bhökërrë ubhwa mbere bhoora waakörëëyë Naömi.
Ko bhoora otakënyërrëëyë abhamura abhaamë,
handë abhatöbhu igha bhakotete.
11 Bhoono uwe umwisëkë uwaane,
otakoobhoha,
nendaakokorre bhuyö ukutuna,
ko bhoora abhantö bhonswe igho abha mu-mughi ghono,
mbakomanyirë igha,
eteemo iyaaho ni-nshiiya.
12 M-maheene igha m-muhiiri uwaaho ndë uwa haangʼë.
Kasi aaho umuhiiri uwaaho uwa haangʼë bhököngʼu konkera.
13 Bhoono otakaarwa hano ubhutikö bhono,
kasi uwe raara hano bhoke,
nemaaha nyoore umushaasha uyö naikërrya ukukutugha.
Hano araaikërri,
m-buuya eraabhe.
Kasi hano araange,
ndatyana ku-YEHOBHA Waryobha ömöhöru igha,
nendaakogheghe.
Uwe bhoono raara hano bhoke.”
14 Mbe,
Ruuti akaraara ko-maghörö agha Bhowazi hayö.
Akamuta nyinkyo shiri ukurwa hayö,
okore abhantö bhatakaamomaaha,
ko bhoora Bhowazi tiyaatunanga ömöntö amanye igha,
Ruuti ku-kibhugha hayö yaaraayë.
15 Bhowazi akatëëbhya Ruuti igha,
“Aarya hansë ingibho iyö.”
Ruuti akaghyarya hansë.
Bhowazi akamohaana ishayiri ekerengere kya amadebhe abhërë,
a akamwitëëkya,
Ruuti akakyora ka.
16 Hano Ruuti yaahikirë ku-nyakubhyara uwaabho,
nyakubhyara uwaabho akamöbhöörya igha,
“Mokaamoona uwaane,
iyakë ghabhaayë iyö?”
Ho yaahaayë nyakubhyara uwaabho amangʼana ghonswe igho kya bhono Bhowazi yaamökörëëyë.
17 Akaghëndërrya ökömötëëbhya igha,
“Bhowazi antëëbhëri igha,
‘Tootore ukukyora amabhoko masa ku-nyakubhyara wëënyu hë,’
Ku bhuyö akangʼaana ishayiri eno,
hake yishore amadebhe abhërë.”
18 Mbe,
Naömi akaghamba igha,
“Bhoono uwe mokaamoona uwaane kira,
omaahe nyoore ghayö ghonswe igho aghambirë ngabha.
Nemanyirë igha,
ömöntö uyö reero tamuunye hë,
kohekera hano araamare amangʼana ghayö ghonswe igho.”