Bhowazi araghegha Ruuti umwandö
4
Mbe,
Bhowazi akaghya akaikara mu-kihiita ikya okosohera mu-mughi,
ahasë hano abhantö bhaasangeranianga-ho.
Mbe,
umushaasha ono Bhowazi yaaghambirë igha m-muhiiri uwa haangʼë bhököngʼu na Ërimërëki,
akaheta hayö.
Bhowazi akamobherekera,
akamötëëbhya igha,
“Mosaani uwaane otaasha wikare hano.”
Ömöntö uyö,
akaghya akaikara-ho.
2 Bhowazi akabherekera abhaghaaka ikömi abha umughi ghuyö,
okore bhabhe abhaimërërri abha engʼana iyö.
Abhaghaaka bhayö bhakaasha,
bhakaikara.
3 Bhowazi akatëëbhya muhiiri uwaaye uyö igha,
“Naömi,
yaakyörrë ukurwa mu-kyaro ikya Mowabhu iyö yaamënyirë,
bhoono nkutuna arë igha aghöri rirema irya muhiiri uwëëtö Ërimërëki.
4 Öni ndööshë igha,
m-buuya nkötëëbhi engʼana eno.
Mbe,
nyoore oratuna igha oghore rirema riyö,
oghambe ko-bhantö bhano na mbere ya abhaghaaka bhano bha hano.
Ko bhoora uwe nu-uwe wingʼarëëyë okoreghora mbere,
kasi öni nkorobhera ndë ku-uwe.”
Umushaasha uyö akahonshora igha,
“Nendaareghore.”
5 Mbe,
Bhowazi akamötëëbhya igha,
“Ni-igha omanye igha,
hano oraaghore rirema riyö,
noraaghabhe Ruuti Nyabhamowabhu,
umusinö ono yaarenga mokaa Maaröni,
okore igha,
rirema riyö ritighare mokaa Maaröni.”
6 Ömöntö uyö akahonshora igha,
“Nyoore ni-igho ërë,
tendeghore hë,
ntakaashe nsari umwandö ughwa abhaana abhaane.
Nyakara nkoteghere uwe oreghore,
öni tentore hë.”
7 Ko-Bhaisiraëri ekaagha iyö,
yaarenga igha,
hano ömöntö yaatunanga aghore ëkëntö handë ukukiswënia,
ekemanyërryö ikyako nkyaarenga ikya ukuruusya ekeraatö ëkëmwë ahaane ono akoghora.
Bhaakoranga igho,
ukwörökya igha bharengerraini.
8 Ömöntö uyö akatëëbhya Bhowazi igha,
“Öni nkötëghëëyë rirema riyö uwe oreghore.”
Akaruusya ekeraatö ikyaye ëkëmwë,
akahaana Bhowazi.
9 Mbe,
Bhowazi akatëëbhya abhaghaaka na abhantö bhonswe igho bhano bhaarë hayö igha,
“Bhoono bhëënyu mobhaayë abhaimërërri abhaane reero.
Mörööshë igha ngörrë ëbhëntö bhyonswe igho ibhya Ërimërëki na ibhya abhaana abhaaye,
Maaröni na Kiriöni,
ukurwa ko-Naömi.
10 Ghwiki,
umusinö Ruuti Nyabhamowabhu mokaa Maaröni,
wonswe mmörëëyë umwandö,
bhoono abhaayë mokaane ukurwa reero.
Ni-igho tukwëngërya ëbhëntö mo-roghanda urwa umuku okore iriina iryaye retakaasika mo-kesaku ikyaye handë umughi ughwaye.
Bhëënyu mbo abhaimërërri abha amangʼana ghano.”
11 Mbe,
abhaghaaka hamwë na abhantö bhonswe igho bhano bhaarë hayö bhakaghamba igha,
“M-maheene bhëëtö m-baimërërri törë.
YEHOBHA Waryobha atöörri omokari ono,
eebhore abhaana abhaaru kya Raahëëri na Rea,
abhaibhöri abha Abhaisiraëri.
a Ghwiki,
mo-kesaku ikya Efurati,
uwe obhe na ëbhëntö,
omanyekane Bhëtërëhëëmu kyonswe igho.
12 Abhaana bhano YEHOBHA Waryobha arekohaana ko-mokari ono,
bhabhe kya abha Përëësi,
ono Tamaari yeebhorra Yuuda.”
13 Bhowazi akaghegha Ruuti,
akabha mokaaye.
YEHOBHA Waryobha akangʼoora Ruuti,
akaimökya enda,
akeebhora omoona uwa ikishaasha.
14 Abhakari abha mu-mughi ghuyö bhakatëëbhya Naömi igha,
“Atöönibhwi YEHOBHA Waryobha we akohaayë umuhiiri uwa haangʼë uwa ukukutugha!
Abhe omoona uwa ikishaasha ono aremanyekana bhököngʼu mu-kyaro ikya Isiraëri.
15 Omoona uyö akörörësi na aashe ukukutugha,
ko bhoora aibhööywë na mokaamoona uwaaho Ruuti ono akohanshirë.
Ruuti nakwisirë okokera abhaana muhungatë abha ikishaasha.”
16 Mbe,
Naömi akaghegha omoona uyö,
akamohaghata,
akabha ömörëri uwaaye.
17 Abhakari abhamenyani bharikyaye,
bhakaghamba igha,
“Omoona aibhööywë wa Naömi.”
Bhakaroka omoona uyö iriina igha Öbhëëdi.
Öbhëëdi uyö we yaaibhööyë Yeese.
Yeese akeebhora Daudi.
18 Bhano mbo urwebhoro urwa Përëësi,
Përëësi akeebhora Hëzirööni,
19 Hëzirööni akeebhora Ramu,
Ramu akeebhora Aminadaabhu,
20 Aminadaabhu akeebhora Naashööni,
Naashööni akeebhora Saarimööni,
21 Saarimööni akeebhora Bhowazi,
Bhowazi akeebhora Öbhëëdi,
22 Öbhëëdi akeebhora Yeese,
Yeese akeebhora Daudi,
ono yaabhaayë omokama uwa Abhaisiraëri.