Okosemoka
Obhotangati
Umwandëki
Eketabho ikya Okosemoka nkyo eketabho ikya mbere ko-bhetabho bhitaano ibhya Mosa. Ebhetabho bhiyö, mbemanyekaini igha, Etoraati, ensonga yaamo igha, Amaraghërryö.
Enkaagha iya ukwandekwa
Eketabho keno, nkyaandëkirwë enkaagha eno Abhaisiraëri bhaarenga kö-këköngö bharaghenda ukurwa Miisiri, bhataraasoha mu-kyaro ikya Kaanaani (maaha eketabho ikya Ukurishoka 12:51 na eketabho ikya Okobhara 14:34). Oroghendo ruyö, rwaarenga kya urwa imyoka 1450 Yëësu Kiristo atareebhorwa (maaha eketabho ikya 1 Abhakama 6:1).
Abhantö bhano bhaandëkëëywë
Mosa yaandëkëëyë Abhaisiraëri bharikyaye bhano yaarë nabho hamwë ko-roghendo. Abhantö bhayö, mbaarenga bhaikaayë kya abhaghëni Miisiri iyö, ku-ribhagha ritambë bhököngʼu. Waanyöörrë bhaaruurë Miisiri, bharëngë ko-nshera bharaghya mu-kyaro keno bhataamanyirë. Mosa yaatunanga abhööröki igha, Waryobha yaarenga asëëmëri kare hayö igha bhaghi ku-kyaro kiyö. Bhaamanyirë igha, Waryobha hamwë yaarë nabho, kasi Mosa yaatunanga abhööröki igha, Waryobha uyö kora n-hamwë yaabhanga na abhakörö abhaabho ukurwa kare.
Keno kyaaghërrë Mosa akaandeka eketabho keno
Eketabho keno kerashumaashera esemoko iya amangʼana ghonswe igho ko-kebhara. Nkeena amahonshoro agha amangʼana kya ghaara abhantö bhaköbhöörya igha, “N-kwakë tooho?” Waryobha umwene yaatobhomba. “N-kwakë toona inyanko enene ko-kebhara kono?” N-ko okoghera iya riragha irya ëbhëbhë. “Waryobha iyakë arë?” M-Monene, kora we yaabhomba ekebhara na sityënyi na kora sinyota, iryobha na umwëri. M-Möhörëëru, taatore ukwishooghana na bhëëtö abha ëbhëbhë. Hamwë na ghayö, kasi nkutuna arë tobhe hamwë nawe, ku bhuyö we yaatokorra enshera iya ukwighwerrana nawe, okore tokore amangʼana agha ökömötëghërya.
Umushabho ughwa eketabho keno
Mo-ketabho mono, seemo mbaara ibhërë senene. Iya mbere, eena amangʼana agha ëbhëntö kya igho bhyaasemoka, okobhombwa ukwa ekebhara, na bhono ëbhëbhë bhyaasëmökirë (1-11). Orobhaara urwa kabhërë, nu-urwa amangʼana agha kare agha abhakörö abha ikyaro ikya Isiraëri, ekenene nu-kusimirya ku-Ibhurahimu (12-50).
Esemoko iya ekebhara
Öbhöbhömbi ubhwa ekebhara 1:1–2:3.
Esemoko iya ëbhëbhë 2:4–4:26.
Eka iya Adamu 5:1-32.
Amangʼana agha Nuhu 6:1–9:29.
Eka iya abhaana abha Nuhu 10:1-32.
Amangʼana agha omonara ughwa Bhaabhëëri 11:1-9.
Eka iya Shëëmu 11:10-26.
Amangʼana agha abhakörö abha ikyaro ikya Isiraëri
Amangʼana agha Ibhurahimu 11:27–25:11.
Eka iya Ishimaëri 25:12-18.
Amangʼana agha Isaaka 25:19–26:35.
Amangʼana agha Yaakobho 27:1–35:29.
Eka iya Esaau 36:1-43.
Amangʼana iya Yusufu 37:1–50:26.