Ruuti
Obhotangati
Eketabho keno, kerabherekerwa igha Ruuti. Ruuti uyö, no-mokari uwa Ekemowabhu yaarë. Abhamowabhu, mbaheegheraini na Abhaisiraëri. Eramaahekana igha, ko-nkaagha iyö, ibhyaro ibhibhërë bhiyö, mbyaaighwerrananga bhököngʼu. Amangʼana agha mo-ketabho mono, n-gano ghaaibhökirë kora ghakaikora enkaagha eno Abhaisiraëri bhaatangatwanga na abhaahokania (imyoka ighya 1375-1050 Yëësu atareebhorwa). Ko-nkaagha iyö, ikyaro ikya Isiraëri kyaarenga ketaraasimya okotongwa na abhakama. Abhaahokania mbaarenga abhantö bhano bhaabhërëkëëywë na Waryobha, okore bhaatangatenga Abhaisiraëri ku-riihë. Ghwiki mbaabhotoranga ibhiina ibhyaru ibhya Abhaisiraëri (maaha mo-ketabho ikya Abhaahokania 2:10-19).
Engʼana eno tuukwegha mo-ketabho mono ni-igha, obhongʼoore ubhwa Waryobha, mbörëngë ko-bhantö abha ibhyaro bhyonswe igho. Waryobha yaangʼöörrë Ruuti, akabha ömösëmöri uwa oroghanda urwa abhakama. Muyö mo omokama Daudi yaasëmökirë ukurwa, kora na Yëësu Kiristo wonswe. Eteemo iya Ruuti, obhohaabhu ubhwaye na okosooka abhahiiri abha moghaaka uwaaye, nkomaahekana bhërë mo-ketabho mono. Ghwiki öbhöntö ubhwa heene ubhwa Waryobha, ubhwa okorenda abhantö abhaaye ko-nkaagha iya inyanko, na okobhahaana obhotoro, harabhu igho bhërë.