Okobheekwa ukwa Yaakobho
50
Mbe,
Yusufu akairekera ku-kihundughu ikya suwaabho,
akamumuumunta mu-bhusyö,
akamokoorra.
2 Hano akomara,
akaraghërrya abhantö abhaaye abha amaryogho igha,
bhahake ikihundughu ikya suwaabho iryogho,
okore ketakaaghunda.
Bhakakora kya bhuyö bhaaraghërribhwi
3 Sinsikö merongo ene sekahwa,
ko bhoora siyö nsyo syaarë sinsikö isya Abhamiisiri okohaka ikihundughu amaghuta.
Abhamiisiri bhakasenkemerra Yaakobho sinsikö merongo muhungatë.
4 Hano sinsikö isya uruku syaahööyë,
Yusufu akatëëbhya abharaghërrya abha Farao igha,
“Nyoore munyikërërrya,
moghende mushumaashe na Farao,
mömötëëbhi igha,
taata yaantëmirë imuuma.
Akantëëbhya igha,
5 ‘Öni n-haangʼë ndë ukukwa.
Hano ndikwa,
ombeeke mo-mbeehera eno naakora ku-kyaro ikya Kaanaani.’
Ku bhuyö nkosabha ndë Farao,
unyikërërri ngende mbeeke taata,
mare nkyore.”
6 Farao akahonshora igha,
“Kaghi obheeke suwëënyu kya bhono yaakotema imuuma iyö.”
7 Mbe,
Yusufu akaghya kobheeka suwaabho.
Akahinana na abharaghërrya bhonswe igho abha Farao,
na abhaghaaka abha ughunyumba ughwa Farao,
hamwë na abhaghaaka bhonswe igho abha ikyaro ikya Miisiri.
8 Yusufu akaghegha abhantö abha eka iyaaye,
bhamura abhaabho,
hamwë na abhantö abhandë,
abha eka iya suwaabho.
Abhaana bhake,
na situgho,
mbyo bhyaatighaayë Ghöshëni hayö.
9 Mbe,
yaahinaini na rikomo rinene irya abhantö,
abha sefaraasi,
na abha sematoka isya ukurutwa na sefaraasi.
10 Hano bhaahikirë ahasë hano hakobherekerwa igha Atadi,
ahasë aha okohoorra ibhyakorya,
humbu ya omooro ughwa Yorodani,
bhakabhaabhayera bhököngʼu,
bhakasenkemerra.
Ahasë hayö,
ho Yusufu yaakörëëyë uruku urwa suwaabho sinsikö muhungatë.
11 Hano Abhakaanaani bhano bhaamënyirë hayö bhaarööshë bhono abhantö bhaakuuranga bharasenkemerra ku-kibhugha ikya okohoorra ibhyakorya ikya Atadi hayö,
bhakaghamba igha,
“Amangʼana agha uruku urwa Abhamiisiri,
m-marito bhököngʼu!”
Ku bhuyö ahasë hayö hakabherekerwa igha,
Abheri-miisiri,
a humbu ya omooro ughwa Yorodani.
12 Bhamura abha Yaakobho,
bhakakorra suwaabho bhono yaarenga abharaghërrëëyi.
13 Bhakahira ikihundughu kyaye ku-kyaro kya Kaanaani,
bhakamobheeka mu-risana kö-möghöndö ghono ghwaarë Makipeera,
haangʼë na Mamure.
Ömöghöndö ghuyö n-goora Ibhurahimu yaaghörrë ku-Efurööni,
Umuhiti,
okore habhe ahasë aha okobheekera abhantö abhaaye.
14 Hano Yusufu yaamarrë okobheeka suwaabho,
akakyora Miisiri na bhamura bhaabho,
hamwë na abhantö bhonswe igho,
bhano bhaamöhërëkërrëëyë ukughya kobheeka suwaabho.
Yusufu araabhera bhamura abhaabho
15 Hano bhamura bhaabho Yusufu bhaarööshë igha,
suwaabho akuurë,
bhakaghamba igha,
“Bhoono iyakë eraabhe,
Yusufu aratora kotoregha,
aratora kohaka ikisiiyomba ko amangʼana ghano twaamokorra?”
16 Ku bhuyö bhakarekerra Yusufu amangʼana igha,
“Hano waanyöörrë suwëënyu ataraakwa,
yaaghambirë igha,
17 ‘Mötëëbhi Yusufu,
ndamosabha igha,
aabhere bhamura abhaabho ko amangʼana amaghogho ghano bhaamokorra.’
Ku bhuyö torakosabha utwabhere bhëëtö abhaghorwa abha Waryobha uwa suwëënyu.”
Hano amangʼana ghayö ghaahikirë ku-Yusufu,
akakuura.
18 Ho ghwiki bhamura abhaabho bhakaghya,
bhakamughwera ko-maghörö aghaaye,
bhakamötëëbhya igha,
“Maaha,
bhëëtö m-baghorwa abhaaho törë!”
19 Kasi Yusufu akabhahonshora igha,
“Motakoobhoha,
öni tëndëngë Waryobha hë.
20 Bhëënyu mwaatunanga monkorre amangʼana amaghogho,
kasi Waryobha akaghasyörya,
ghakabha amangʼana amaiya,
okore abhantö abhaaru bhahönibhwi kya bhono ërë bhoono igho.
21 Ku bhuyö motakoobhoha.
Öni nendaabhahaane ibhyakorya,
bhëënyu hamwë na abhaana bhëënyu.”
Akashumaasha nabho bhuuya,
akabhatërëmya senkoro isyabho.
Uruku urwa Yusufu
22 Mbe,
Yusufu akaghëndërrya okomenya Miisiri hamwë na eka iya suwaabho.
Yaamënyirë imyoka ighana imwë na ikömi.
23 Yusufu,
akamaaha abhaana na abhöshökörö abha mura uwaaye Efurahimu.
Yaarööshë kora na abhaana abha möshökörö uwaaye,
Makiri mura wa Manase,
akabhakora kya abhaana abhaaye.
24 Mbe,
Yusufu akatëëbhya bhamura abhaabho igha,
“Öni bhoono,
n-haangʼë ndë kukwa.
Kasi obhoheene ni-igha,
Waryobha narebhatöörrya abharuusi mu-kyaro keno,
abhahire ku-kyaro keno yaatëmirë imuuma Ibhurahimu,
Isaaka,
na Yaakobho.”
25 Ho yaamarrë akabhatema imuuma abhaana abha Isiraëri igha,
“Hano Waryobha arebhatöörrya murwe ku-kyaro kono,
motakaasha kutigha kono amaghuha aghaane.”
26 Mbe,
Yusufu akakwera Miisiri,
aana imyoka ighana imwë na ikömi.
Bhakamohaka amaryogho agha ibhihundughu,
okore ketakaaghunda,
bhakamotoora mwi-sandeko Miisiri iyö.