Yaakobho arangʼoora bhamura abhaaye
49
Hano ghayö ghaahööyë,
Yaakobho akabherekera bhamura abhaaye,
akabhatëëbhya igha,
“Mwikomani,
mbatëëbhi amangʼana bhono gharebha kö-bhëënyu.
2 Bhëënyu abhaana abha Yaakobho,
mwikomani mwitegherre,
munyitegherre öni Isiraëri suwëënyu.
3 Uwe Ruubhëëni,
nu-uwe omotangi uwaane,
nu-uwe singuru isyane
nu-uwe uwa ubhumura ubhwane.
Nökërrë bhawamwënyu bhonswe igho,
ko obhotoro na obhonene.
4 Uwe n-kya amanshë agha ëhöörö,
toobhe na ubhwera ubhwa okobha obhotangi hë,
ko bhoora waarinirë kö-bhörrë ubhwane,
okaraara na mokaane.
5 Simeoni na Raawi,
m-bamwë mörë,
ibhyöghë ibhyënyu,
mbyo mukwiseghera okokorra amangʼana amaghogho.
6 Kasi öni tembe ëkëntö këmwë na bho ku-kibhisirë ikyabho,
tengootane na bho ku-bhikaro ibhyabho hë,
ko bhoora bhaaitirë abhantö ko okorerra ukwabho,
na ko bhoghashaghasha ubhwabho,
bhakatembora amaki agha eghaini.
7 Öbhöbhë ubhwënyu bhuyö,
bhwihiimwe,
ko bhoora m-babhë bhököngʼu mörë,
okorerra ukwënyu,
tekoona kyabhera hë.
Ku bhuyö,
nendaabhanyaraghani ku-kyaro ikya Yaakobho,
nendaabhanyaraghani ku-kyaro ikya Isiraëri.
8 Uwe Yuuda,
bhawamwënyu mbaraakukumi,
nuritana riihë na abhabhisa abhaaho,
obhabhaahe.
Bhawamwënyu,
mbaraakotemerenga hansë ibhiru.
9 Uwe Yuuda omoona uwaane,
uwe n-kya ëndwë inyana nke ingwëmi örë,
eno ikurwa kughwema,
wirambööyë hansë kya ëndwë enkari,
n-nawë araakarehe ukughitura?
10 Inyimbo iya obhokama,
tirirwa röndë ku-Yuuda hë,
inyimbo iya öbhötöngi,
neraaghëndërri okobha mo-kesaku ikya Yuuda,
okohekera hano ariisha mwene bhokama,
ono ibhyaro bhyonswe igho,
bhirimwitegherranga.
11 Uyö we arisibha itikërë iyaaye ko-mozabhibhu,
na ëkëmööri ikya itikërë,
ku-risagharya iriiya.
Afurrë singibho syaye mo-marwa agha sezabhibhu,
na engansho iyaaye mo-manshë agha emezabhibhu ghano ghaakangaara kya amaanyinga.
12 Amaiso aghaaye ngarekangaara ko okoghera iya amarwa agha sezabhibhu.
Amaino aghaaye,
ngarerabha shaa,
ko okoghera iya amabheere.
13 Zabhurööni,
noremenya haangʼë na inyansha.
Ahasë hayö nharebha ahasë aha okoghobhera amaato,
orotonga urwaho,
ndorebhata Siidööni.
14 Isakaari,
n-kya itikërë iya obhotoro,
eno eraayë ghatëghatë iya imirigho ghyayo.
15 Aremaaha igha,
ahasë aha okomoonyera,
n-haiya
na ikyaro kyonswe n-kiiya,
narihiinya omoghongo,
okoghegha umurigho,
narebha omoghorwa uwa ukusingʼirribhwa.
16 Daani,
norebha umwahokania uwa abhantö abhaaho,
kya ömwë uwa ekabhira iya Isiraëri.
17 Daani norebha kya inshoka iya ko-mohanda,
kya inshoka iya öbhösöngö,
eno ërëngë haangʼë na enshera
eno ekoroma sefaraasi ebherenge,
okore umuriini uwa ko-faraasi aghwe bhösöghööti.
18 YEHOBHA Waryobha,
nö-bhötöörya nkutuna ukurwa ku-uwe.
19 Ghaadi,
narinyankibhwa na abhasaki,
kasi we,
narebhaitania ukurwa nyuma,
abhakere.
20 Asheeri ikyaro ikyaye,
nkerebha na ibhyakorya ibhyaru,
ibhiiya,
noreremanga ibhyakorya bheno bhikutunwa na omokama.
21 Nafutaari onga kya ekebharahe ekekari keno ketashööywë,
keno kikwebhora ebhemaanwa ibhiiya.
22 Yusufu onga kya omozabhibhu ghono ghukwama,
ghono ghörëngë haangʼë na ekeseekaani.
Amasagharya aghaako,
nkoranda gharë ku-ndighi.
23 Abharasi abha imighwë bhaakwitaini,
bhakakorasa na imighwë,
bhakakunyankya.
24 Kasi obhota ubhwaye,
bhokanagha,
amabhoko aghaaye,
ghaköngëribhwa singuru,
ko obhotoro ubhwa Waryobha uwa obhotoro bhwonswe igho,
Waryobha uwa Yaakobho,
Waryobha Omokaraabhërri na Ritare irya Isiraëri.
25 Waryobha uwa suwëënyu narëkötörrya,
Waryobha uwa obhotoro bhwonswe igho,
akongʼoore
unyoore obhongʼoore ubhwa imbura ukurwa ighörö iyö,
obhongʼoore ubhwa amanshë agha bhuribha,
ukurwa hansë
obhongʼoore ubhwa mo-sembeere na urwebhoro.
26 Obhongʼoore ubhwa suwëënyu,
nkokera bhörë ubhwa singuku isya kare.
Obhongʼoore bhuyö,
bhobhe ko-motwe ughwa Yusufu,
kighörö iya ono yaashaaghorwa abhe ömötöngi mo-bhawamwabho.
27 Bhenjamini uwe,
ni-shuushe ëmbë örë,
nyinkyo nkorya ërë bheno ighwëmirë,
omoghoroobha itwenania bheno inyöörrë.”
28 Ghayö ngo amakabhira ikömi na abhërë,
agha Isiraëri.
Amangʼana ghayö,
ngo Yaakobho yaatëëbhëri bhamura abhaaye enkaagha eno yaabhangʼooranga.
Akabhatëëbhya amangʼana ko okorengʼaana na kera ömöntö bhono yaaingʼarëëyi.
Uruku urwa Yaakobho
29 Mbe,
Yaakobho akatëëbhya abhaana abhaaye igha,
“Öni n-haangʼë ndë kukwa,
ngende ko-bhakörö bhaane.
Mombeeke mu-risana reno rërëngë kö-möghöndö ughwa Efurööni Umuhiti.
30 Ömöghöndö ghuyö ghörëngë Makipeera,
orobhareka urwa röghörö urwa Mamure ku-kyaro ikya Kaanaani.
Risana riyö,
n-deera Ibhurahimu yaaghörrë ukurwa ko Efurööni Umuhiti,
okore rebhe ahasë aha okobheeka abhantö abhaaye.
31 Mwi-sana muyö,
mo Ibhurahimu na mokaaye Saara bhaabhëëkirwë,
Isaaka na mokaaye Rebheka,
kora na Rea wonswe m-muyö yaabhëëkirwë.
32 Ömöghöndö ghuyö na risana irya-ko,
m-beno bhyaaghörrwë ukurwa ko Abhahiti.”
33 Hano Yaakobho yaamarrë okoraghërrya bhamura abhaaye,
akakyörya amaghörö aghaaye kö-bhörrë,
akakwa,
akaghya ko-bhakörö abhaaye.