Yaakobho arangʼoora abhaana abha Yusufu
48
Hano ghayö ghaahööyë,
Yusufu akatëëbhibhwa igha,
“Suwëënyu m-mörööyë.”
Akaghegha abhaana abhaaye bhabhërë,
Manase na Efurahimu,
akahinana nabho ku-suwaabho.
2 Hano Yaakobho yaatëëbhiibhwi igha,
“Omoona uwaaho Yusufu aishirë kökökëërya,”
akaiköngʼërrya,
akaikara kö-bhörrë.
3 Yaakobho akatëëbhya Yusufu igha,
“Waryobha uwa obhotoro bhwonswe igho,
yaamböshökëëyë akangʼoora,
ekaagha eno naarë Ruzu,
mu-kyaro ikya Kaanaani.
4 Akantëëbhya igha,
‘Maaha,
nendaaruhi urwebhoro urwaho,
robhe urwa abhantö abhaaru.
Nendaahaane urwebhoro urwaho ikyaro keno,
kebhe umwandö ughwabho makora ghonswe igho.’”a
5 Mbe,
ho Yaakobho yaatëëbhëri Yusufu igha,
“Abhaana abhaaho abhabhërë bhano weebhorra Miisiri hano ntaraasha,
Efurahimu na Manase,
bhayö na-bhaane bharaabhe,
kya Ruubhëëni na Simeoni.
6 Abhaana bhano ghwiki oreebhore,
bhayö mbo bharaabhe abhaaho.
Mbarerya ikyaro umwandö,
okohetera ko amariina agha bhamura abhaabho.
7 “Nkörrë igho,
ko bhoora igha,
Raahëëri umwibhöri uwaaho,
yaakwërëëyë mo-nshera enkaagha eno naakyoranga ukurwa Padani,
ku-kyaro ikya Kaanaani,
twaarenga tuhikirë haangʼë na Efurati,
nkabhaabhayera ko-nshera kuyö.
Naamöbhëëkirë haangʼë na enshera iya ukughya Efurati,
iyö yo ekobherekerwa igha Bhëtërëhëëmu.”
8 Hano Yaakobho yaarööshë abhaana abha Yusufu,
akabhöörya igha,
“Kana bhano m-baabho wë?”
9 Yusufu akahonshora suwaabho igha,
“Bhano na-bhaana bhaane bhano Waryobha yaangʼaana ku-kyaro kono.”
Yaakobho akatëëbhya Yusufu igha,
“Bhasuntari hano mbangʼoore.”
10 Enkaagha iyö waanyoora Yaakobho yaghota,
kora amaiso aghaaye teghamaahanga bhuuya hë.
Yusufu akasuntarya abhaana abhaaye ku-suwaabho,
Yaakobho akabhamumunta na okobhaibhaara.
11 Yaakobho akatëëbhya Yusufu igha,
“Moona uwaane,
tenamanyanga igha,
nenkaamaahaini na uwe hë,
kasi bhoono Waryobha ankörrë kora mmaahe abhaana abhaaho.”
12 Mbe,
Yusufu akaghegha abhaana abhaaye ukurwa ko-maghörö agha Yaakobho,
akaihenyerra ubhusyö ubhwaye bhokaihika hansë,
ukwörökya igha,
nasöökirë suwaabho.
13 Yusufu akainyökya ghwiki abhaana abhaaye,
Efurahimu mo-kobhoko ukwaye ukwa bhoryo,
akamobhatya orobhareka urwa bhömösi urwa Yaakobho.
Manase ono yaarë mo-kobhoko ukwaye ukwa bhömösi,
akamobhatya bhoryo ubhwa Yaakobho.
Akabhatoora haangʼë na ghuuka uwaabho.
14 Kasi Yaakobho akasyörya amabhoko aghaaye,
okobhoko ukwa bhoryo,
akakotoora ko-motwe ughwa Efurahimu,
uyö we yaarë omoke.
Okobhoko ukwaye ukwa bhömösi,
akakotoora ko-motwe ughwa Manase ono yaarë omotangi.
15 Mbe,
akangʼoora Yusufu,
araghamba igha,
“Waryobha ono abhaibhöri abhaane Ibhurahimu na Isaaka bhaasookanga,
Waryobha ono yaandenda sinsikö syonswe igho,
16 Maraika ono yaantöörya ntakaanyoorwa na amaghogho ghonswe igho,
angʼoore abhamura bhano.
Bhabherekerrwenga iriina iryane,
na iriina irya Ibhurahimu na Isaaka,
bhaaruhe bhököngʼu ku-kyaro.”
17 Hano Yusufu yaarööshë suwaabho atöörrë okobhoko ukwaye ukwa bhoryo ku-Efurahimu,
tiyashömëëywë hë.
Ku bhuyö akaghoota okobhoko ukwa bhoryo ukwa suwaabho okore akuruusi ku-Efurahimu,
akotoore ko-Manase.
18 Yusufu akatëëbhya suwaabho igha,
“Ti-igho hë taata,
ono we omotangi uwaane,
ndakosabha otoore okobhoko ukwaho ukwa bhoryo ko-motwe ughwaye.”
19 Kasi suwaabho akaanga,
akamötëëbhya igha,
“Nemanyirë moona uwaane nemanyirë.
Kora na abhaana abha Manase mbarebha abhanene.
Kasi omoke uwaaye ono,
narebha omonene komokera.
Urwebhoro urwaye,
ndorebha ibhyaro ibhyaru.”
20 Akabhangʼoora urusikö ruyö araghamba igha,
“Abhaisiraëri mbaraangʼoorwenga okohetera ko-mariina aghëënyu.
Mbareghambanga igha,
‘Waryobha akokorre kya Efurahimu na Manase.’”
Mbe,
Yaakobho akatoora Efurahimu mbere iya Manase.
21 Hano Yaakobho yaamarrë,
akatëëbhya Yusufu igha,
“Moona uwaane,
öni n-haangʼë ndë kukwa,
kasi Waryobha naraabhe hamwë na bhëënyu,
narebhakyörya ku-kyaro ikya abhaibhöri abhëënyu.
22 Nkohaayë ahasë ahanene okokera bhamura bhëënyu,
ikyaro keno naakinyöörrë ukurwa ko-Bhaamööri okohetera ku umushonge ughwane na obhota bhwane.”