Ruuti
Ërimërëki na eka iyaaye bharangʼaanyera Mowabhu
1
1-2 Kare hayö,
enkaagha eno abhaahokania bhaatangatanga ikyaro ikya Isiraëri,
inshara yaabhaayë ku-kyaro kiyö.
Mbe,
yaare-ho ömöntö uwöndë ono yaabherekerwanga igha Ërimërëki.
Ömöntö uyö nu-uwa Bhëtërëhëëmu iya Yuuda yaarë.
Mbe,
akatanora na mokaaye,
hamwë na abhamura abhaaye bhabhërë,
akangʼaanyera ku-kyaro ikya Mowabhu,
okore bhaikare-yo akabhagha akake igho.
Mokaa Ërimërëki yaabherekerwanga igha Naömi.
Abhaana abhaabho bhaabherekerwanga igha Maaröni na uwöndë igha,
Kiriöni.
Ömöntö uyö na eka iyaaye,
bhaarë abha ekesaku ikya Efurati uwa Bhëtërëhëëmu iya Yuuda.
Mbe,
bhakamenya Mowabhu iyö.
3 Enkaagha eno waanyöörrë bhakëërëngë iyö,
Ërimërëki mushaasha uwa Naömi akakwa.
Naömi akatighara umusinö,
na abhaana abhaaye abhabhërë bhayö.
4 Abhamura abha Naömi bhayö,
bhakateta iyö abhakari abha Ekemowabhu.
Amariina agha abhakari bhayö ni-igha Oripa,
na uwöndë igha Ruuti.
Hano imyoka ikömi ghyaahööyë,
5 Maaröni na Kiriöni bhonswe bhakakwa.
Mbe,
Naömi akabha akwërëëywë mushaasha uwaaye,
na abhaana abhaaye bhonswe igho abhabhërë.
Naömi arakyora Bhëtërëhëëmu
6 Mbe,
Naömi akanyoora amangʼana igha,
YEHOBHA Waryobha angʼöörrë abhantö abhaaye abha Isiraëri,
bhoono mbaana ibhyakorya.
Akasëëmya oroghendo urwa ukurwa Mowabhu bhakyore Yuuda hamwë na abhakaamoona abhaaye.
7 Akarwa hayö yaamënyirë na abhakaamoona abhaaye abhabhërë bhayö,
bhakaghoota enshera iya ukukyora Yuuda.
8 Enkaagha eno waanyöörrë bhakëërëngë ko-roghendo,
Naömi akatëëbhya bhakaamoona abhaaye igha,
“Bhoono bhëënyu ni-igha,
kera ömöntö akyore ku-nyakuwaabho.
YEHOBHA Waryobha abhakorre ubhwa heene kya bhono mwankorranga ubhwa heene öni na abhantö abhaane bhano bhaakwa.
9 YEHOBHA Waryobha abhangʼoore munyoore abhashaasha abha okobhateta kora mwikare bhuuya mu-mighi ighyënyu.”
Mbe,
akabhaibhaara,
akabharagha.
Kasi abheene bhakakuura bhököngʼu,
10 bhakamötëëbhya igha,
“Ti-igho hë,
ntoraahinane na uwe ko-bhawëënyu.”
11 Kasi Naömi akabhasaasaama bhököngʼu igha,
“Bhëënyu motakyora bhakaamoona abhaane.
N-kwakë monsoorane?
Nkokanya mörë igha,
öni ndatora ukwebhora abhaana abhandë bhano bharaabhe bhashaasha abhëënyu ghwiki?
12 Mukyore wëënyu bhakaamoona abhaane,
ko bhoora öni naaghötirë,
tentetwe ghwiki hë.
Nenkaanyoora umushaasha ubhutikö ubhwa reero,
neebhore na we abhaana abha ikishaasha,
13 m-boheene igha mobhaghanya bhakiine igho bhahere?
Mmotora ököghömërrya mwange okotetwa na abhashaasha abhandë?
Teebhe igho hë bhakaamoona abhaane!
Amangʼana ghano ghaannyoora,
m-marito okokera aghëënyu,
ko bhoora YEHOBHA Waryobha antëmirë na inyimbo.”
14 Mbe,
ghwiki bhakaamoona abhaaye,
bhakakuura bhököngʼu.
Oripa akaibhaara nyakubhyara uwaabho,
akamara akakyora waabho ka.
Kasi Ruuti akasingʼirrya ukuhinana na nyakubhyara uwaabho.
15 Naömi akatëëbhya Ruuti igha,
“Maaha moharekwa uwaaho akyörrë ko-bhawaabho,
na ko-kawaryobha akaaye,
uwe wonswe kyora uhinane na murikyaho.”
16 Kasi Ruuti akamohonshora igha,
“Otakaansaasaama igha nkutighe,
handë igha ntakaahinana na uwe!
Ko bhoora ahasë honswe igho hano oraaghi,
ho öni wonswe ndaaghi,
na hano oraamenye,
ho na öni wonswe ndaamenye.
Abhantö abhaaho mbo bharaabhe abhantö abhaane,
na Waryobha uwaaho we araabhe Waryobha uwaane.
17 Hano urikwera,
ho öni wonswe ndikwera.
Hano orebheekwa,
ho na öni wonswe ndebheekwa.
YEHOBHA Waryobha anshibhi,
hano ndaatighane na uwe,
hano oraanyoore etarëngë igha nu-ruku.”
18 Mbe,
hano Naömi yaarööshë igha Ruuti akararrëëyë ukuhinana na we,
akatigha okomosaasaama.
19 Ho bhonswe igho bhabhërë,
bhaaghëndërrëëyi na oroghendo urwabho urwa ukughya Bhëtërëhëëmu.
Hano bhaahikirë iyö,
abhantö bhonswe igho bhakaroghoora,
abhakari bhakabhoorania igha,
“M-maheene igha ono n-Naömi?”
20 Naömi akabhatëëbhya igha,
“Motakaamberekera igha Naömi,
a momberekerenga igha Mara,
b ko bhoora Waryobha uwa obhotoro bhwonswe igho,
yaammara-yo.
21 Naaruurë hano ntahatëëyi,
kasi bhoono YEHOBHA Waryobha ankyörri mabhoko masa.
N-kwakë momberekere igha Naömi na eno Waryobha uwa obhotoro bhwonswe igho,
antëësirë na okonkorra amangʼana amarito?”
22 Mbe,
ni-igho Naömi yaakyörrë Bhëtërëhëëmu na Ruuti Nyabhamowabhu mokaamoona uwaaye.
Mbaahikirë Bhëtërëhëëmu enkaagha iya ukusimya okoghesa ishayiri.c