Ruuti arasikana na Bhowazi
2
Mbe,
Bhëtërëhëëmu hayö yaare-ho umuhiiri uwa Ërimërëki mushaasha uwa Naömi.
Ömöntö uyö yaabherekerwanga igha Bhowazi.
Bhowazi uyö,
yaarë na ëbhëntö,
kora yaamanyekaini.
2 Mbe,
urusikö urwöndë,
Ruuti Nyabhamowabhu yaatëëbhëri nyakubhyara uwaabho igha,
“Ndasabha reero ngende okobhooshabhoosha ishayiri,
ndamanya nendaanyoore ömöntö ono araaikërri mbooshenga bheno bhitighaayë.”
Naömi akaikërrya,
akamötëëbhya igha,
“Uwe otaghya mokaamoona uwaane.”a
3 Ruuti akaghya kö-möghöndö nyabhorebhe,
akasimya okobhoosha nyuma iya abhaghësi.
Akabha arabhoosha ebheghara bheno bhakutigha.
Bhahati nshiiya ömöghöndö ghuyö yaabhooshanga-mo,
nu-ghwa Bhowazi muhiiri uwa Ërimërëki ghwaarë.
4 Hake igho,
Bhowazi akahika hayö,
ararwera Bhëtërëhëëmu.
Akakëërya abhaghësi bhayö igha,
“YEHOBHA Waryobha abhe hamwë na bhëënyu.”
Abheene bhonswe bhakamohonshora igha,
“Uwe wonswe YEHOBHA Waryobha akongʼoore.”
5 Mbe,
Bhowazi akabhöörya umwimërërri uwa abhaghësi bhayö igha,
“Umwisëkë uyö nu-uwa wë?”
6 Umwimërërri uyö akamohonshora igha,
“Umwisëkë uyö n-Nyabhamowabhu ono yaasha hamwë na Naömi ukurwa mu-kyaro ikya Mowabhu.
7 Nansabhirë igha,
arwenga nyuma abhaghësi arabhooshabhoosha ekeraaghero kö-möghöndö kono.
N-hano ahööyëëyë ukurwa nyinkyo nanyabhoono,
n-hake igho yaarë amuunyirë mu-kighutu haara.”
8 Ho Bhowazi yaatëëbhëri Ruuti igha,
“Mwisëkë uwaane itegherra nkötëëbhi,
otakaaghya okobhoosha kö-möghöndö ughwa uwöndë,
kasi bhooshanga kö-möghöndö ughwane kono.
Obhe hamwë na abhaisëkë bhano bhakonkorra emeremo.
9 Omaahenga ahasë hano bhakoghesa,
obharwenga nyuma.
Nkaanëri abhamura bhayö okore bhatakaakunyankya.
Hano oraaighwe inyonta,
ughi ko-sensengo haara unywe amanshë ghano abhamura bhayö bhatahirë.”
10 Mbe,
Ruuti akaihiinya ko-maghörö agha Bhowazi,
akamötëëbhya igha,
“Nkë këghërrë unyikërrëëyi?
Ndarra unyabhëëyë igho,
na öni mbe m-möghëni ndë ku-kyaro keno?”
11 Bhowazi akamohonshora igha,
“Naatëëbhibhwa amangʼana ghonswe igho ghano waakorra nyakubhyara uwëënyu,
ukurwa umushaasha uwaaho yaakwa.
Na kya igho waatigha suwëënyu na nyakuwëënyu na ikyaro ikyaho,
waasha ukwikarana na abhantö bhano otamanyirë.
12 YEHOBHA Waryobha akongʼoore ko-ghonswe igho ghano waakora.
YEHOBHA Waryobha uwa Isiraëri ono öngʼösëëyë-ko,
akukundikiri mo-mabhabha aghaaye,
akokorre ubhwa heene.”
13 Ruuti akamohonshora igha,
“Omonene uwaane,
önkörëëyë amangʼana amaiya bhököngʼu,
nokaanyoora igha öni tëndëngë ömököri uwa emeremo uwaaho hë.
Kasi önsërëënëri,
kora m-buuya ushumaashirë na öni.”
14 Hano enkaagha iya okorya yaahikirë,
Bhowazi akatëëbhya Ruuti igha,
“Nshö hano ogheghe omokaate,
ötöngëri mu-divai oraaghere.”
Ruuti akaikara okorya hamwë na abhaghësi bhayö.
Bhowazi akamohaana ibhyakorya ibhya seheke seno sekarangirwë,
akarya akeeghota,
bhekatama.
15 Hano Ruuti yaaimökirë okore aghëndërri okobhoosha ishayiri,
Bhowazi akaraghërrya abhaghësi abhaaye igha,
“Mutighenga abhooshe mu-bhiyö möbhömbirë hamwë hayö,
motakaamohamera.
16 Kora murute ebheghara ukurwa mu-bhiyö möbhömbirë hamwë,
mumutighe abhooshenga,
motakaamokaania.”
17 Mbe,
Ruuti akaghëndërrya okobhoosha ishayiri omoghoroobha ghokahika.
Akahoora ishayiri iyö yaabhööshirë,
akaishörya ekekapo ekenene na omoharrökyö umwaru.
Ruuti arakyora ku-nyakubhyara uwaabho
18 Mbe,
Ruuti akaiteeka ishayiri,
akakyora ka.
Hano yaahikirë ka,
aköörökya nyakubhyara uwaabho ibhyakorya bheno yaabhööshirë.
Akahaana nyakubhyara uwaabho amabhamboro agha ibhyakorya bheno yaarëëyë bhekatama.
19 Mbe,
nyakubhyara uwaabho akamöbhöörya igha,
“Hai öbhööshirë bheno bhyonswe igho?
N-kwa wë waarë?
Waryobha angʼoore ömöntö uyö akösërëënëri.”
Ruuti akatëëbhya nyakubhyara uwaabho igha,
“Ömöntö ono mbööshirë kö-möghöndö ughwaye,
arabherekerwa igha Bhowazi.”
20 Naömi akatëëbhya mokaamoona uwaaye igha,
“YEHOBHA Waryobha angʼoore Bhowazi,
ko bhoora YEHOBHA Waryobha,
nköghëndërrya arë ukwörökya öbhöntö ubhwa heene ubhwaye ko abhahöru na abhaku!”
Ghwiki akaghëndërrya okoghamba igha,
“Bhowazi uyö m-muhiiri uwëëtö uwa haangʼë uwa mo-bhano ingʼarëëyë ukututugha.”
21 Mbe,
Ruuti akaghamba ghwiki igha,
“Kora yaarë antëëbhëri igha ngootane na abhaköri abha emeremo abhaaye,
kohekera hano bharaamare okoghesa ibhyakorya bhyonswe igho.”
22 Ho Naömi yaatëëbhëri mokaamoona uwaaye igha,
“Mwisëkë uwaane,
m-buuya okore hamwë na abhaköri abhaaye abha emeremo abha ekekari.
Hano oraaghi kö-möghöndö ughwa ömöntö uwöndë,
abhantö bharatora ukukunyankya.”
23 Ku bhuyö Ruuti akabha araghendania na abhaköri abha emeremo abha ekekari abha Bhowazi,
arabhooshabhoosha ishayiri na engano,
okohekera hano righesa ryaahööyë.
Ribhagha riyö ryonswe igho,
Ruuti yaaikaranga hamwë na nyakubhyara uwaabho.