Okosemoka
Okobhombwa ukwa ighörö iyö na ekebhara
1
Bhosemoka hayö,
Waryobha yaabhömbirë bhyonswe igho ibhya ighörö iyö na ibhya ko-kebhara.
2 Ko-nkaagha iyö,
ekebhara m-bosa kyaarë tikyaarë na ëkëntö hë,
kora tikyarenga na ituubho yoyonswe igho hë.
Ikisuntë kyaarenga bhuribha ko-manshë,
na Umwika uwa Waryobha yaaghendaghendanga ko-manshë kuyö.
3 Mbe,
Waryobha akaghamba igha,
“Bhobhe-ho obhorabhu.”
Obhorabhu bhokabha-ho.
4 Waryobha akamaaha igha obhorabhu bhuyö m-buuya,
akaahokania obhorabhu na ikisuntë.
5 Waryobha akaroka obhorabhu bhuyö igha,
“Omobhasö,”
na ikisuntë akakeroka igha,
“Ubhutikö.”
Ubhutikö bhokahika,
nyinkyo yonswe ekahika,
urusikö urwa mbere rokahwa.
6 Ghwiki Waryobha akaghamba igha,
“Ghobhe-ho umweya ghatëghatë iya amanshë,
ghwahokani amanshë agha kighörö na agha hansë.”
7 Ni-igho Waryobha yaabhömbirë umweya ghuyö,
akaahokania amanshë agha kighörö na agha hansë.
Ekabha kya igho Waryobha yaaghambirë.
8 Waryobha akaroka umweya ghuyö igha,
“Ighörö iyö.”
Ubhutikö bhokahika,
nyinkyo yonswe ekahika,
urusikö urwa kabhërë rokahwa.
9 Ghwiki Waryobha akaghamba igha,
“Amanshë ghano gharëngë ko-kebhara,
ghaikomani hamwë,
okore ahasë ahöömö hamaahekane.”
Ekabha kya igho Waryobha yaaghambirë.
10 Akaroka ahasë ahöömö hayö igha,
“Ikyaro.”
Na ahasë hano amanshë ghaikomaini,
akaharoka igha,
“Inyansha.”
Waryobha akamaaha igha m-buuya akörrë.
11 Ghwiki Waryobha akaghamba igha,
“Ëmëröngö ighya simbusiro isya seteemo syonswe igho ghebhe ku-kyaro,
na ikyaro kebhe na ëmëtë ighya sehagho gheno gheena simbusiro.”
Ni-igho amangʼana ghaabhaayë.
12 Ëmëröngö ighya simbusiro isya teemo syonswe igho,
na ëmëtë ighya sehagho gheno gheena simbusiro isya seteemo syonswe igho,
bhekamera ku-kyaro.
Waryobha akamaaha igha m-buuya akörrë.
13 Ubhutikö bhokahika,
nyinkyo yonswe ekahika,
urusikö urwa katatö rokahwa.
14 Ghwiki Waryobha akaghamba igha,
“Ghebhe-ho emerengaari ighörö iyö,
emerengaari ghiyö,
ghyahokani ubhutikö na omobhasö,
ghebhe ekemanyërryö ikya senkaagha,
sinsikö na imyoka.
15 Emerengaari ghiyö ghebhe ighörö iyö,
ghëmërëkinga ko-kebhara.”
Ekabha kya igho Waryobha yaaghambirë.
16 Ku bhuyö,
yaabhömbirë emerengaari ighya seteemo senene ibhërë,
iryobha rëmërëkinga enkaagha iya omobhasö,
na umwëri ghömërëkinga enkaagha iya ubhutikö,
akabhomba na sinyota.
17 Akabhetoora ighörö iyö,
bhëmërëkinga ko-kebhara,
18 bhëmërëkinga ubhutikö na omobhasö kora bhyaahokaninga ikisuntë na obhorabhu.
Waryobha akamaaha igha m-buuya akörrë.
19 Ubhutikö bhokahika,
nyinkyo yonswe ekahika,
urusikö urwa kane rokahwa.
20 Ghwiki Waryobha akaghamba igha,
“Ëbhëntö bheno bhekoheeshera,
bhyeshore mo-manshë,
na ibhinyönyi bhebhenga bheraibhurruka ighörö iyö.”
21 Waryobha akabhomba amaswë amanene,
ghakabha gharahooya mo-manshë muyö,
ko seteemo isyako,
akabhomba na sityënyi syonswe igho seno sekoheeshera ko seteemo isyako,
Akabhomba kora na ibhinyönyi,
ko okorengʼaana na seteemo isyabhyo.
Waryobha akamaaha igha m-buuya akörrë.
22 Waryobha akabhengʼoora,
akaghamba igha,
“Mwebhore igho mwaruhe,
mweshore mu-nyansha,
na ibhinyönyi bhyaruhe ko-kebhara.”
23 Ubhutikö bhokahika,
nyinkyo yonswe ekahika,
urusikö urwa kataano rokahwa.
24 Mbe,
Waryobha akaghamba igha,
“Ikyaro kebhe na ëbhëntö bheno bhekoheeshera,
ibhya seteemo syonswe igho,
situgho,
bheno bhikwingʼuura hansë,
na sityënyi isya mwi-sisi.”
Ekabha kya igho Waryobha yaaghambirë.
25 Ku bhuyö,
Waryobha yaabhömbirë sityënyi syonswe igho,
ko okorengʼaana na seteemo isyasyo,
situgho na sityënyi isya mwi-sisi,
na bheno bhikwingʼuura hansë.
Waryobha akamaaha igha m-buuya akörrë.
26 Ghwiki Waryobha akaghamba igha,
“Tobhombe ömöntö ku tuubhö iyëëtö,
atuubhane na bhëëtö.
Abhaahe sinswë,
ibhinyönyi,
situgho,
ekebhara kyonswe igho,
na bhyonswe igho bheno bhikwingʼuura hansë.”
27 Mbe,
Waryobha akabhomba ömöntö ono amutuubhirë.
Waryobha yaabhömbirë omokari na umushaasha bhano bhamutuubhirë.
28 Akabhangʼoora na okobhatëëbhya igha,
“Mwebhore igho mwaruhe,
mwishöri ekebhara na okokeharya.
Mobhaahe sinswë,
ibhinyönyi,
na kera ëkëntö keno kekoheeshera,
keno kërëngë ko-kebhara kono.”
29 Ghwiki Waryobha akaghamba igha,
“Maaha,
mbahaayë ëmëröngö ghyonswe igho ighya simbusiro ko-kebhara kono,
hamwë na ëmëtë ighya sehagho isya simbusiro,
ghiyö ngyo gheraabhe ibhyakorya ibhyënyu.
30 Sityënyi syonswe igho,
na ibhinyönyi bhyonswe igho bheno bhikwibhurruka ighörö iyö,
na ëbhëntö bhyonswe igho bheno bhikwingʼuura hansë,
mbehaaye ëmëröngö ghyonswe igho ighya urunyënyi,
bhebhe ibhyakorya ibhyabho.”
Ekabha kya igho Waryobha yaaghambirë.
31 Waryobha akamaaha kera ëkëntö keno yaabhömbirë igha n-kiiya bhököngʼu.
Ubhutikö bhokahika,
nyinkyo yonswe ekahika,
urusikö urwa kasansabha rokahwa.