2
Ni-igho Waryobha yaamarrë okobhomba ighörö iyö,
ekebhara,
na ëbhëntö bhyonswe igho bheno bheemo.
2 Urusikö urwa muhungatë,
waanyöörrë amarrë emeremo ighya okobhomba,
ku bhuyö akamuunya urusikö ruyö.
3 Waryobha akangʼoora urusikö urwa muhungatë,
akarosaabhuura.
Yaamuunyirë urusikö ruyö na okorosaabhuura,
ko bhoora yaarenga amarrë emeremo ighya okobhomba ëbhëntö bhyonswe igho.
4 Ni-igho ighörö iyö na ekebhara bhyaabhömbirwë.
Ibhusitaani iya Ëdëëni
Hano YEHOBHA Waryobhaa yaabhömbirë ekebhara na ighörö iyö,
5 tighyare-ho ëmëröngö ghyoghyonswe igho hë,
handë sinyënyi seno syaamërrë ko-kebhara,
ko bhoora ku-sinsikö siyö,
YEHOBHA Waryobha tiyaarenga araareeta imbura hë,
na ömöntö uwa okorema tiyaare-ho hë.
6 Kasi örömë rokabha ko-marobha,
rokashöshya ikyaro kyonswe igho.
7 Mbe,
YEHOBHA Waryobha akabhomba ömöntö ukurwa ku-rutu urwa rirobha,
akamohootera umwika ughwa öbhöhöru mo-manyëërö,
ömöntö uyö,
akabha na öbhöhöru.
8 YEHOBHA Waryobha akatoora ibhusitaani orobhareka urwa röghörö urwa Ëdëëni.
Akatoora mu-bhusitaani muyö,
ömöntö oora yaabhömbirë.
9 YEHOBHA Waryobha,
akamërya ëmëtë ighya seteemo syonswe igho isya ökötëghërya amaiso,
na ëmëtë ighya sehagho seno sekoreebhwa.
Ghatëghatë iya ibhusitaani iyö,
ghwaare-ho ömötë ughwa okohaana abhantö öbhöhöru,
na ömötë ughwa okomanya amangʼana amaiya na amaghogho.
10 Ghwaare-ho omooro Ëdëëni hayö,
ghono ghwaaghërërryanga amanshë mu-bhusitaani.
Ukusimirya hayö,
ghokaahokana ghokabha imyoro ene.
11 Omoghera ughwa mbere ni-igha Pishoni,
ngo ghwinarrë ikyaro kyonswe igho ikya Havira.
Ikyaro kiyö,
kyaarenga na ebheghera ibhya esahaabhu.
12 Ebheghera ibhya esahaabhu bhiyö,
m-biiya bhyaarë.
Kora na amaghuta ghano ghaabherekerwanga igha bhedora,
agha ikirumba ikiiya,
na ekeghera ikya shohamu,
ni-iyö bhyaatookanga.
13 Omoghera ughwa kabhërë ghorabherekerwa igha Ghiihöni,
ngo ghukwinarya ikyaro kyonswe igho ikya Kuushi.
14 Omoghera ughwa katatö ni-igha Tighiriisi,
ngo ghokoheta röghörö iya ikyaro ikya Ashuuru.
Na omooro ughwa kane ghorabherekerwa igha Furati.
15 Mbe,
YEHOBHA Waryobha yaatöörrë ömöntö uyö mu-bhusitaani iya Ëdëëni,
igha aremenga-mo na okonaghya ibhusitaani iyö.
16 YEHOBHA Waryobha akatëëbhya ömöntö uyö igha,
“Nkwikërërribhwa örë okorya sehagho isya ëmëtë ghonswe igho gheno ghërëngë mu-bhusitaani mono.
17 Kasi otakaashakorya sehagho isya ömötë ughwa okomanya amangʼana amaiya na amaghogho,
ko bhoora urusikö rono orerya sehagho isya ömötë ghuyö,
obhoheene nurikwa.”
18 Mbe,
YEHOBHA Waryobha akaghamba igha,
“Ömöntö ono ti-bhuuya aikare umwene igho,
ku bhuyö nendaabhombe ömöntö uwa ökömötöörrya ono amwingʼarëëyi.”
19 Mbe,
YEHOBHA Waryobha,
akabhomba ukurwa ku-rirobha sityënyi syonswe igho isya mwi-sisi,
na ibhinyönyi bhyonswe igho.
Akabhereeta ko-Adamu okore amaahe bhono araabheroke amariina.
Na iriina reno yaarökirë kera ëkëntö keno kyabhombwa,
ndyo ryaabhaayë iriina iryakyo.
20 Mbe,
Adamu akaroka amariina situgho syonswe igho,
na sityënyi isya mwi-sisi,
na ibhinyönyi bhyonswe igho.
Kasi tiyaamaahekaini uwa ökömötöörrya ono amwingʼarëëyi hë.
21 Ku bhuyö YEHOBHA Waryobha,
akareetera Adamu seetero sindito.
YEHOBHA Waryobha akamwiha orobharu örömwë,
na ahasë hayö yaaruusiri orobharu,
akamërrya-ho inyama.
22 Orobharu rono YEHOBHA Waryobha yaaruusiri ko-Adamu,
akarokora rokabha omokari.
Hano akomara,
akamoreetera.
23 Mbe,
Adamu akaghamba igha,
“Bhoono ono n-dighuha reno riruurë ko-maghuha aghaane,
na ni-nyama eno iruurë ku-nyama iyaane!
Naraabherekerwe igha ‘Omokari,’
ko bhoora nku-mushaasha aruurë.”
24 Ku bhuyö,
umushaasha naraatighe suwaabho na nyakuwaabho,
aghootane na mokaaye.
Abhantö abhabhërë bhayö,
nkobha bharë kya ömöbhërë öghömwë.
25 Adamu na mokaaye n-kengʼaabhi bhaarë,
kasi tebhaarööshë sënsöni hë.