Adamu na Hawa bharakerwa ukwighwera Waryobha
3
Ku-sityënyi syonswe igho seno YEHOBHA Waryobha yaabhömbirë,
inshoka yo yaarë engʼaini okokera bhyonswe igho.
Mbe,
inshoka ekabhöörya omokari igha,
“Kana,
m-boheene igha Waryobha yaabhatëëbhëri igha,
motakaarya sehagho isya ëmëtë ghyonswe igho gheno ghërëngë mu-bhusitaani mono?”
2 Omokari akahonshora inshoka iyö igha,
“Ti-igho hë,
nkwikërërribhwa törë okorya sehagho isya ëmëtë ighya mu-bhusitaani mono.
3 Kasi Waryobha yaaghamba igha,
‘Motakaashaashya okorya sehagho isya ömötë ughwa ghatëghatë iya ibhusitaani,
handë ukusikunia.
Hano moraare handë musikuni-ko,
mmoraakwe!’ ”
4 Mbe,
inshoka ekatëëbhya omokari uyö igha,
“Obhoheene timuukwe hë!
5 Waryobha yaaghambirë igho,
ko bhoora namanyirë igha,
hano moraare sehagho isya ömötë ghuyö,
moraanyoore obhongʼaini kora moraabhe kya we,
ko okomanya amangʼana amaiya na amaghogho.”
6 Hano omokari uyö yaarööshë igha sehagho isya ömötë ghuyö ni-nshiiya isya okorya,
nkötëghërya sërë mo-maiso,
kora nsekaamohaayë obhongʼaini,
akasitwa akaserya.
Hano akomara,
akahaana-ko mushaasha uwaaye,
wonswe akarya.
7 Mbe,
bhakanyoora obhongʼaini ubhwa okomanya amangʼana amaiya na amaghogho,
bhakamanya igha,
n-kengʼaabhi bharë.
Ku bhuyö,
bhakatwa amatö agha umutiini,
bhakaghaghootania hamwë,
bhakaibhoha mo-bhokende.
8 Hano omoghoroobha ghwaahikirë,
kuhuutirë,
Adamu uyö na mokaaye bhakaighwa imitingiro ighya YEHOBHA Waryobha araghenda mu-bhusitaani muyö,
bhakaghya ukwibhisa mö-mëtë ighya mu-bhusitaani muyö,
okore atakaabhamaaha.
9 Kasi YEHOBHA Waryobha akabherekera Adamu igha,
“Adamu,
hai örëngë?”
10 Adamu akamohonshora igha,
“Ninighuurë oraghenda mu-bhusitaani,
nkoobhoha,
nkaibhisa,
ko bhoora n-kengʼaabhi ndë.”
11 YEHOBHA Waryobha akamöbhöörya igha,
“N-nawë akötëëbhëri igha n-kengʼaabhi örë?
Kasi nörëëyë sehagho isya ömötë ghoora naakokaanëri igha otakaarya?”
12 Adamu akamohonshora igha,
“Omokari uyö waangʼaana igha abhe hamwë na öni,
we angʼaayë sehagho isya ömötë ghuyö,
nkarya.”
13 Mbe,
YEHOBHA Waryobha akabhöörya omokari uyö igha,
“Uwe,
ne-ngʼana kë iyö ökörrë?”
Omokari uyö akamohonshora igha,
“Inshoka yo engʼainirë,
naarya.”
Ëkëbhë kyaarëëtirë amaragha
14 Mbe,
YEHOBHA Waryobha akatëëbhya inshoka igha,
“Ko bhono ökörrë igho,
nu-uwe umwene nihiimirë
mu-sityënyi syonswe igho seno sikutughwa,
na isya mwi-sisi.
Noraaghenderenga enda,
noraaingʼuurenga mu-rutu,
ku-sinsikö syonswe igho,
isya öbhöhöru ubhwaho.
15 Ku bhuyö ubhubhisa mboraabhe-ho,
ghatë iya uwe na omokari uyö,
ghatë iya urwebhoro urwaho na urwaye.
Urwebhoro urwaye,
ndorekoghosha omotwe,
na uwe noreroroma ëkësöghörö.”
16 Waryobha akatëëbhya omokari uyö igha,
“Nendaakwëngëri na öbhörrö ubhwa ebhesa,
enkaagha iya ukwebhora.
Noreebhorenga ko okoromwa öbhörrö ubhwa ebhesa.
Kora ëghööryö iyaaho,
nku-mushaasha uwaaho eraabhenga,
uyö we araakobhaahenga.”
17 Mbe,
akatëëbhya na Adamu igha,
“Ko bhono wikërëëyi amangʼana agha mokaaho,
örëëyë sehagho isya ömötë ghono naakokaanëri igha otakaarya,
rirobha riihiimirwë ko okoghera iya uwe.
Noraakorenga emeremo ëmëköngʼu,
okore unyoore ibhyakorya,
ni-igho eraabhe ku-sinsikö syonswe igho isya öbhöhöru ubhwaho.
18 Rirobha nderaabhe na amahwa na imishongoma,
noraaragherenga sinyënyi.
19 Noraanyoorenga ibhyakorya,
ku ukurwa ëbhëghëri,
okohekera hano urikyora mu-rirobha,
ko bhoora mu-rirobha muyö,
mo waaruurë.
Uwe nu-rutu örë,
na mu-rutu muyö mo urikyora.”
20 Mbe,
Adamu akaroka mokaaye iriina igha,
Hawa,
a ko bhoora Hawa,
we umwibhöri uwa abhantö bhonswe igho.
21 YEHOBHA Waryobha akakorra Adamu na mokaaye singibho isya riseero,
akabhaibhöhya.
Adamu na Hawa bhararughibhwa bharwe mu-bhusitaani
22 Hano ghayö ghaahööyë,
YEHOBHA Waryobha akaghamba igha,
“Bhoono ömöntö ono,
abhaayë kya murikyëtö,
amanyirë amangʼana amaiya na amaghogho.
Bhoono ni-igha mmorebherre okore atakaasha okorya sehagho isya ömötë ghono ghokohaana abhantö öbhöhöru,
ko bhoora hano araaraaghere sehagho isya ömötë ghuyö,
naraabheho amakora ghonswe igho,
taakwe hë.”
23 Ku bhuyö YEHOBHA Waryobha akabharughya mu-bhusitaani iya Ëdëëni,
okore Adamu aghende okorema ku-rirobha reno yaaruusiibhwi-mo.
24 Hano yaamarrë okobharughya ukurwa mu-bhusitaani muyö,
akatoora-ho abhamaraika orobhareka urwa röghörö urwa ibhusitaani iya Ëdëëni,
na umushonge ughwa omorro,
ghono ghwaaisyöryanga mbaara syonswe igho.
Umushonge ghuyö,
ghwaarendanga enshera eno yaahetanga ukughya kö-mötë ghono ghokohaana abhantö öbhöhöru.