Kaini bhaana Abhëëri
4
Adamu akaraara na Hawa mokaaye.
Hawa akaimökya enda,
akeebhora Kaini.
Akaghamba igha,
“Niibhööyë omoona uwa ikishaasha ko obhotoro ubhwa YEHOBHA Waryobha.”
2 Hawa akaimökya ghwiki enda,
akeebhora Abhëëri.
Abhëëri uyö m-mtughi uwa amangʼöndi yaarë,
na Kaini we akabha ömörëmi.
3 Mbe,
ribhagha ryaahëtirë-ho,
Kaini akaruusirya YEHOBHA Waryobha ikimwenso ikya ibhyakorya bheno yaarenga aghësirë.
4 Abhëëri wonswe,
akareeta situgho isyaye sentangi,
na sinyama sënöru.
YEHOBHA Waryobha akatëghëribhwa na Abhëëri,
na ikimwenso ikyaye.
5 Kasi tiyaatëghëriibhwi na Kaini,
na ikimwenso ikyaye.
Kaini akarerra bhököngʼu,
kora ubhusyö ubhwaye bhokaikunya.
6 YEHOBHA Waryobha akabhöörya Kaini igha,
“N-kwakë örëërëëyë igho?
N-kwakë ubhusyö ubhwaho bhwikunyirë igho?
7 Hano okaakora bhuuya,
uwe wonswe noraaikërërribhwi.
Hano oraakerwe,
ëkëbhë n-haangʼë hayö këköghönyëëyë,
nkukwighomba kërë bhököngʼu.
Kasi ni-igha okebhaahe.”
8 Hano ghayö ghaahööyë,
Kaini akatëëbhya omoke uwaaye Abhëëri igha,
[“Toghende kö-möghöndö.”]
a Enkaagha eno bhaarenga kö-möghöndö,
Kaini akatema omoke uwaaye,
akamwita.
9 Mbe,
YEHOBHA Waryobha akabhöörya Kaini igha,
“Omoke uwaaho Abhëëri hai arëngë?”
Kaini akamohonshora igha,
“Temanyirë hë!
Öni te-monaghya uwaaye ndë hë.”
10 YEHOBHA Waryobha akamöbhöörya igha,
“Ne-ngʼana kë iyö ökörrë?
Amaanyinga agha omoke uwaaho,
gharankoorra ukurwa mu-rirobha.
11 Bhoono uwe,
wihiimirwë!
Toreme rirobha reno rinyööyë amaanyinga agha omoke uwaaho,
rekohaane ibhyakorya,
na mbe nu-uwe umwitirë!
12 Hano oraaremenga rirobha riyö,
tunyoorenga ibhyakorya hë.
Noraabhe ömöntö uwa ukwereera,
tunyoore ahasë aha okomenya ko-kebhara kono.”
13 Kaini akatëëbhya YEHOBHA Waryobha igha,
“Ubhushibhu bhuyö unshibhiri,
m-burito bhököngʼu tembotore hë!
14 Tamaaha,
undughiri reero ukurwa ku-kyaro keno,
nihëëni ukurwa mo-maiso aghaaho.
Bhoono nendaabhe ömöntö uwa ukwereera ko-kebhara,
ömöntö wowonswe ono araasikane na öni,
naraanyite.”
15 YEHOBHA Waryobha akamohonshora igha,
“A a,
ti-igho hë,
ömöntö wowonswe ono araakwite,
naraahakibhwi ikisiiyomba hare muhungatë.”
Mbe,
YEHOBHA Waryobha akatoorra Kaini omobhaaso,
okore wowonswe igho ono araasikane nawe,
atakaamwita.
16 Hano ghayö ghaahööyë,
Kaini akarwa mbere iya YEHOBHA Waryobha,
akaghya ukwikara ku-kyaro ikya Nödi,
b orobhareka urwa röghörö iya Ëdëëni.
Urwebhoro urwa Kaini
17 Kaini akaraara na mokaaye,
akaimökya enda,
akeebhora Henooko.
Kaini akahaghaasha umughi,
akaghobherekera iriina irya omoona uwaaye uyö Henooko.
18 Henooko akeebhora Iraadi,
Iraadi akeebhora Mëhuyaëri.
Mëhuyaëri akeebhora Mëtushaëri,
Mëtushaëri akeebhora Ramëëki.
19 Ramëëki akateta abhakari bhabhërë,
uwöndë yaabherekerwanga igha,
Ada na uwöndë igha Sira.
20 Ada akeebhora Yabhari,
Yabhari uyö,
we umwibhöri uwa abhantö abhaniibhi abha situgho bhano bhaamenyanga mo-maghutu.
21 Mura uwaabho yaabherekerwanga igha,
Yubhaari,
we yaarë umwibhöri uwa abhahuuti abha ebherongwe na abhatëmi abha amatungu.
22 Sira wonswe akeebhorra Kaini omoona,
ono yaarökirwë igha,
Tubhaari wa Kaini,
uyö we yaarenga umuturi uwa ëbhëntö ibhya okobhotorra ibhyoma,
na ebheghera ibhya ishabha.
Tubhaari uyö,
yaarë na umwisëkë waabho ono yaabherekerwanga igha,
Naama.
23 Ramëëki akatëëbhya bhakaaye igha,
“Bhëënyu Ada na Sira,
mwitegherre mwighwe keno ndaabhatëëbhi!
Abhakari abhaane,
mwitegherre,
mwighwe obhoghambi ubhwane.
Naaitirë ömöntö,
ko okoghera iya ukunshamaara,
umumura uyö naamwitirë,
ko bhoora yaannyahaarrë.
24 Hano ömöntö araaite Kaini,
naraahakibhwi ikisiiyomba hare muhungatë,
kasi hano ömöntö araanyite,
naraahakibhwi ikisiiyomba hare merongo muhungatë na muhungatë!”
Ukwebhorwa ukwa Sëëti na Enoshi
25 Adamu akaraara na mokaaye Hawa,
akeebhora ghwiki omoona uwa ikishaasha,
akamoroka igha Sëëti.
c Akaghamba igha,
“Waryobha anngʼöörrë,
ko okongʼaana omoona uwöndë,
ono aribhirë umweya ughwa Abhëëri,
ono Kaini yaaita.”
26 Sëëti wonswe akeebhora omoona uwa ikishaasha,
akamoroka igha Enoshi.
Ukusimirya hayö,
ho abhantö bhaasimiri okobherekera Waryobha iriina igha YEHOBHA Waryobha na okomosengerra.