Urwebhoro urwa Adamu
5
Rono ndo urwebhoro urwa Adamu.
Waryobha hano yaabhömbirë abhantö,
yaabhabhömbirë ko ekesosa ikyaye.
2 Yaabhömbirë omokari na umushaasha,
hano yaamarrë,
akabhangʼoora,
akabharoka iriina igha “Abhantö.”
3 Hano Adamu yaahikiri imyoka righana imwë na merongo etatö,
akeebhora omoona amutuubhirë ekesosa.
Akamoroka igha,
Sëëti.
4 Hano Adamu yaaibhööyë Sëëti,
akaikara imyoka amaghana monaane.
Yaaibhööyë abhaana abha ikishaasha na abha ekekari,
ku imyoka ghiyö.
5 Adamu yaakuurë aana imyoka amaghana kenda na merongo etatö.
6 Hano Sëëti yaahikiri imyoka righana imwë na etaano,
akeebhora Enoshi.
7 Hano Sëëti yaaibhööyë Enoshi,
akaikara imyoka amaghana monaane na muhungatë.
Yaaibhööyë abhaana abha ikishaasha na abha ekekari,
ku imyoka ghiyö.
8 Sëëti yaakuurë aana imyoka amaghana kenda na ikömi na ibhërë.
9 Hano Enoshi yaahikiri imyoka merongo kenda,
akeebhora Kenani.
10 Hano Enoshi yaaibhööyë Kenani,
akaikara imyoka amaghana monaane na ikömi na etaano.
Yaaibhööyë abhaana abha ikishaasha na abha ekekari,
ku imyoka ghiyö.
11 Enoshi yaakuurë aana imyoka amaghana kenda na etaano.
12 Hano Kenani yaahikiri imyoka merongo muhungatë,
akeebhora Mahararëri.
13 Hano Kenani yaaibhööyë Mahararëri,
akaikara imyoka amaghana monaane na merongo ene.
Yaaibhööyë abhaana abha ikishaasha na abha ekekari,
ku imyoka ghiyö.
14 Kenani yaakuurë aana imyoka amaghana kenda na ikömi.
15 Hano Mahararëri yaahikiri imyoka merongo esansabha na etaano,
akeebhora Yaarëëdi.
16 Hano Mahararëri yaaibhööyë Yaarëëdi,
akaikara imyoka amaghana monaane na merongo etatö.
Yaaibhööyë abhaana abha ikishaasha na abha ekekari,
ku imyoka ghiyö.
17 Mahararëri yaakuurë aana imyoka amaghana monaane merongo kenda na etaano.
18 Hano Yaarëëdi yaahikiri imyoka righana imwë na merongo esansabha na ëbhërë,
akeebhora Henooko.
19 Hano Yaarëëdi yaaibhööyë Henooko,
akaikara imyoka amaghana monaane.
Yaaibhööyë abhaana abha ikishaasha na abha ekekari,
ku imyoka ghiyö.
20 Yaarëëdi yaakuurë aana imyoka amaghana kenda merongo esansabha na ibhërë.
21 Hano Henooko yaahikiri imyoka merongo esansabha na etaano,
akeebhora Metusera.
22 Hano Henooko yaaibhööyë Metusera,
akaikara imyoka amaghana atatö,
yaaighweranga bhököngʼu Waryobha.
Yaaibhööyë abhaana abha ikishaasha na abha ekekari,
ku imyoka ghiyö.
23 Imyoka ighya Henooko gheno yaamënyirë ko-kebhara kono,
m-maghana atatö na merongo esansabha na etaano.
24 Henooko yaaighweranga bhököngʼu Waryobha,
ku bhuyö akasira,
ko bhoora Waryobha yaamöghëghirë.
25 Hano Metusera yaahikiri imyoka righana ëmwë merongo monaane na muhungatë,
akeebhora Ramëëki.
26 Hano Metusera yaaibhööyë Ramëëki,
akaikara imyoka amaghana muhungatë merongo monaane na ibhërë.
Yaaibhööyë abhaana abha ikishaasha na abha ekekari,
ku imyoka ghiyö.
27 Metusera yaakuurë aana imyoka amaghana kenda merongo esansabha na kenda.
28 Hano Ramëëki yaahikiri imyoka righana imwë na merongo monaane na ibhërë,
akeebhora omoona uwa ikishaasha,
29 akamoroka igha,
Nuhu.
Akaghamba igha,
“Omoona ono,
we araatöröörësi ko-meremo ighyëtö,
na mu-nyanko iya emeremo gheno tokokora na amabhoko aghëëtö ku-kyaro keno kyaaihiimwa na YEHOBHA Waryobha.”
30 Hano Ramëëki yaaibhööyë Nuhu,
akaikara imyoka amaghana ataano merongo kenda na etaano.
Yaaibhööyë abhaana abha ikishaasha na abha ekekari,
ku imyoka ghiyö.
31 Ramëëki yaakuurë aana imyoka amaghana muhungatë merongo muhungatë na muhungatë.
32 Hano Nuhu yaahikiri imyoka amaghana ataano,
akeebhora Shëëmu,
Haamu na Yafëëti.