Obhosarya ubhwa abhantö
6
Mbe,
hano abhantö bhaasimiri ukwaruha ko-kebhara na abhaana abha ekekari bhakeebhorwa,
2 abhaana abha Waryobhaa bhakamaaha abhaisëkë abha abhantö igha,
m-baiya,
ku bhuyö bhakaishaaghorra abhakari bhobhonswe igho bhano bhaatunanga,
bhakabhakora bhabhe bhakaabho.
3 Mbe,
YEHOBHA Waryobha akaghamba igha,
“Umwika uwaane taghëndërri okobha mö-möntö amakora ghonswe igho hë,
ko bhoora nkukwa arë.
Ku bhuyö,
imyoka ighyaye tegheheteerenga righana imwë na merongo ëbhërë hë.”
4 Ku-sinsikö siyö,
na seno syaaröbhëëyë-ko,
amantöb ngaarenga ku-kyaro.
Abhaana abha Waryobha mbo bhaataarre na abhaisëkë abha abhantö,
bhakeebhora nabho.
Na bhayö bhaaibhööywë,
m-mantö makarë ghaarë kora mbaamanyekaini ku-sinsikö isya kare siyö.
5 YEHOBHA Waryobha akamaaha igha obhosarya ubhwa abhantö bhwaarenga bhwaruhirë bhököngʼu ko-kebhara,
na kera engʼana eno bhaaitegherranga mo-metwe ighyabho,
ne-ngogho yaarenga sinsikö syonswe igho.
6 YEHOBHA Waryobha akaikanyakanya igha,
n-kwakë yaabhömbirë ömöntö ko-kebhara kono,
akabhaabhayera mo-nkoro iyaaye.
7 YEHOBHA Waryobha akaghamba igha,
“Nendaasiki abhantö bhano naabhömbirë ko-kebhara,
nendaasiki situgho,
sityënyi isya mwi-sisi,
na bheno bhikwingʼuura hansë,
kora na ibhinyönyi bhyonswe.
Ndaikanyakanya igha,
n-kwakë naabhëbhömbirë.”
8 Kasi Nuhu we,
yaatëghëëyi YEHOBHA Waryobha.
Waryobha aratëëbhya Nuhu akore esafina
9 Ghano ngo amangʼana agha Nuhu na urwebhoro urwaye.
Nuhu m-möntö uwa heene yaarë,
yaaikërrëribhwanga na abhantö bhonswe igho abha enkaagha iyaaye,
yaaighweranga bhököngʼu Waryobha.
10 Nuhu yaarë na abhaana bhatatö abha ikishaasha,
Shëëmu,
Haamu na Yafëëti.
11 Ko-nkaagha iyö,
ekebhara kekeeshora obhosarya,
kora Waryobha akamaaha igha,
kesarëkirë.
12 Waryobha akamaaha bhono ekebhara kyaarenga kesarëkirë,
ko bhoora kera ömöntö yaakoranga amangʼana amaghogho ghano yaatunanga.
13 Mbe,
Waryobha akatëëbhya Nuhu igha,
“Ndööshë igha,
tigha nsiki abhantö bhonswe igho,
ko bhoora obhosarya bhwishööyë ko-kebhara kyonswe igho.
Obhoheene nendaasiki abhantö na ëbhëntö bhyonswe igho!
14 Bhoono uwe kaghi ogheeshe ëmëtë ighya umubhinshe,
okore esafina.
Okore-mo ibhinyumba,
oghehake eraami mönsë na kebhara iyaako.
15 Obhotambë ubhwa esafina iyö,
bhobhe amataambokac righana imwë merongo etatö na kenda.
Na obhoghare ubhwako bhobhe amataamboka merongo ëbhërë na ataano,
na obhotambë ubhwa ukughya kighörö,
bhobhe amakubhad ikömi na ataano.
16 Okore esafina iyö ebhe na orosara.
Utighe umweya ughwa ritënë irya rikubha rimwë ukurwa ko-rosara.
Oghekorre ekesaku orobhaara örömwë,
oghekorre amarongo atatö,
irya nsë,
irya ghatëghatë,
na irya kighörö.
17 “Obhoheene,
nendaareete ëhöörö iya amanshë ko-kebhara,
okore nsiki kera ëkëntö keno kekoheeshera.
Ëbhëntö bhyonswe igho ko-kebhara kono,
mberaasikibhwi.
18 Kasi nendaakore imuuma na uwe.
Noraasohe mo-safina,
uwe na mokaaho,
abhaana abhaaho,
na bhakaabho.
19 Noraasöhi ëbhëntö bhyonswe igho bheno bhekoheeshera ko seteemo isyabhyo,
bhibhërë bhibhërë,
ibhishaasha na ebhekari,
obhenaghi hamwë na uwe.
20 Ösöhi muyö ibhinyönyi ibhya seteemo syonswe igho,
situgho na sityënyi isya seteemo syonswe igho,
ibhinyönyi,
na seteemo syonswe igho isya bheno bhikwingʼuura hansë,
öbhësöhi-mo bhibhërë bhibhërë,
obhenaghi.
21 Ogheghe ibhyakorya,
bhebhe emongo iyëënyu na iya sityënyi syonswe igho.”
22 Mbe,
Nuhu akakora kya igho Waryobha yaamötëëbhëri igha akore.