Ukuusha ukwa ëhöörö iya amanshë
7
Hano Nuhu yaamarrë okokora ghonswe igho ghayö,
YEHOBHA Waryobha akamötëëbhya igha,
“Soha mo-safina hamwë na abhantö abhaaho.
Ko bhoora mo-bhantö bhonswe igho abha enkaagha eno,
nu-uwe umwene igho ndööshë igha,
m-möntö uwa heene örë ku-öni.
2 Ogheghe situgho muhungatë muhungatë isya seteemo syonswe igho seno setarëngë sinyanku,
sinshaasha na senkari.
Kasi sinyanku,
siyö ösöhi ibhërë ibhërë inshaasha na enkari.
3 Ghwiki ni-igha,
ogheghe ibhinyönyi muhungatë muhungatë ibhya seteemo syonswe igho,
ibhishaasha na ebhekari,
okore ubhitughe bhëghëndërri okobha-ho ko-kebhara kono.
4 Nendaareete imbura ko-kebhara kono urusikö urwa muhungatë ukusimirya bhoono igho.
Neretwa sinsikö merongo ene ubhutikö na omobhasö,
na kera ëkëntö keno kekoheeshera keno naabhomba,
nendaakisiki ko-kebhara kono.”
5 Nuhu akakora ghonswe igho,
kya bhono YEHOBHA Waryobha yaamoraghërrëëyi.
6 Nuhu yaarenga na imyoka amaghana asansabha hano ëhöörö iya amanshë yaaishirë ko-kebhara kono.
7 Ku bhuyö Nuhu,
mokaaye,
abhaana abhaabho na bhakaabho,
bhakasoha mo-safina,
okore bhaibhashe ëhöörö iya amanshë.
8 Mbe,
sityënyi sinyanku na seno setarëngë sinyanku,
ibhinyönyi na bhyonswe igho bheno bhikwingʼuura hansë,
9 bhekaasha,
ebhekari na ibhishaasha,
bhekasoha bhibhërë bhibhërë mo-safina muyö Nuhu yaarë,
kya bhoora Waryobha yaaraghërrëëyi Nuhu.
10 Sinsikö muhungatë hano syaahööyë,
amanshë ghakaromaana ku-rirobha,
ghakabha ëhöörö.
11 Hano Nuhu yaarenga na imyoka amaghana asansabha,
ëhöörö iya amanshë ekahika,
ku-rusikö urwa ikömi na muhungatë urwa umwëri ughwa kabhërë.
Urusikö ruyö,
ebheseekaani bhyonswe igho ibhya mu-rirobha mönsë bhököngʼu,
bhekarwa amanshë kwa nguru.
Amasaarö ghakahaatërrya amanshë,
ekashoroosha imbura insharu bhököngʼu.
12 Imbura ekaghëndërrya okotwa sinsikö merongo ene,
ubhutikö na omobhasö.
13 Urusikö rono imbura yaasimiri okotwa,
ndwo Nuhu na mokaaye bhaasöhirë mo-safina,
hamwë na abhaana abhaabho,
Shëëmu,
Haamu,
Yafëëti,
na bhakaabho.
14 Mbaasöhirë hamwë na situgho isya seteemo syonswe igho,
sityënyi isya mwi-sisi,
ibhinyönyi na bheno bhikwingʼuura hansë,
ko eteemo iyaabhyo.
15 Nuhu yaasöhirë muyö na sityënyi syonswe igho seno sekoheeshera nsyaasöhirë ibhërë ibhërë.
16 Nsyaasöhirë-mo sityënyi sinshaasha na senkari,
kya bhono Waryobha yaaraghërrëëyi Nuhu.
Mbe,
YEHOBHA Waryobha umwene akamoseekera muyö.
17 Ëhöörö yaaghëndërrëëyi okobha ko-kebhara ku-ribhagha irya sinsikö merongo ene.
Amanshë ghakaghëndërrya ukwaruha,
esafina ekatoobhatoobha ko-manshë.
18 Amanshë ghayö ghakaghëndërrya ukweshora bhököngʼu,
na esafina ekabha erooroora ko-manshë.
19 Amanshë agha ëhöörö ghakaaruha bhököngʼu,
kora singuku sentambë syonswe igho isya ko-kebhara kono,
sekakundikiribhwa.
20 Amanshë ghakaaruha,
ghakaheteera obhotambë ubhwa ebhesonga ibhya singuku,
kya simiita muhungatë.
21 Kera ëkëntö keno kyaaghendanga ko-kebhara,
nkyaasikirë,
ibhinyönyi,
situgho,
sityënyi isya mwi-sisi,
bheno bhikwingʼuura hansë,
kora na abhantö bhonswe igho.
22 Kera ëkëntö ikya umwika keno kyaaheesheranga ko-kebhara,
kekakwa.
23 Waryobha yaasikiri kera ëkëntö keno kekoheeshera ko-kebhara kono,
abhantö,
situgho,
bheno bhikwingʼuura hansë na ibhinyönyi.
Kasi Nuhu na bheno yaasöhirë nabhyo mo-safina mbyo ibhyene igho bhyaatighaayë.
24 Amanshë agha ëhöörö ghayö,
ghakakundirya ekebhara kyonswe igho,
ku-sinsikö ighana imwë na merongo etaano.