Okohwa ukwa ëhöörö iya amanshë
8
Mbe,
Waryobha akahiitoka Nuhu,
situgho,
sityënyi syonswe igho isya mwi-sisi,
seno yaarë nasyo mo-safina.
Ku bhuyö,
akareeta rikama,
amanshë ghakasuuha ko-kebhara.
2 Ebheseekaani bhekaribhwa,
na imbura ekahwa.
3 Amanshë ghakaghëndërrya ukusuuha ngʼorangʼora ko-kebhara ku-sinsikö righana imwë na merongo etaano.
4 Hano rwaahikirë urusikö urwa ikömi na muhungatë urwa umwëri ughwa muhungatë,
esafina ekahoreera ku-nguku iya ikyaro ikya Ararati.
5 Amanshë ghakaghëndërrya ukusuuha.
Hano ghwaahikirë umwëri ughwa ikömi,
ku-rusikö urwa mbere urwa umwëri ghuyö,
ebhesonga ibhya singuku bhekamaahekana.
6 Hano sinsikö merongo ene syaahëtirë,
Nuhu akeeghora ridirisha irya esafina reno yaarenga akörrë.
7 Nuhu akarishökya nyamoko kebhara.
Nyamoko uyö,
akabha araibhurruka ukughya iyö,
akamara akakyora.
Kasi hano amanshë ghaahööyë ko-kebhara,
tiyamara akyore hë.
8 Ho yaamarrë,
akarishökya ikighuuti,
okore amanye nyoore amanshë ghasuuhirë ko-kebhara.
9 Kasi ko bhoora waanyöörrë amanshë ghakërëngë ko-kebhara,
ikighuuti kekabhorwa ahasë aha ukwikara,
kekakyora ku-Nuhu.
Nuhu akarambëkërrya okobhoko akakeghoota,
akakikyörya mo-safina.
10 Nuhu akaghanya sekaheta sinsikö muhungatë,
akarishökya ghwiki ikighuuti kiyö.
11 Hano omoghoroobha ghwaahikirë,
ikighuuti kiyö kekakyora ku-Nuhu,
kërömërrëëyë riitö ribhësë irya ömözëituuni.
Hayö Nuhu akamanya igha,
amanshë ghasuuhirë ko-kebhara.
12 Nuhu akaghanya ghwiki sinsikö muhungatë isyëndë,
akarishökya ghwiki ikighuuti kiyö.
Kasi ikighuuti tikyakyörrë hë.
13 Urusikö urwa mbere urwa umwëri ughwa mbere,
hano Nuhu yaarë na imyoka amaghana asansabha na öghömwë,
amanshë ngaakamokanga ku-kyaro.
Nuhu akaruusya-ho ikikundikiryö ko-safina,
akasyömërrya,
akamaaha ikyaro kyonswe igho nkokamoka kërë.
14 Hano urusikö urwa merongo ëbhërë na muhungatë urwa umwëri ughwa kabhërë rwaahikirë,
okanyoora ikyaro kekamökirë këmwë.
15 Mbe,
Waryobha akatëëbhya Nuhu igha,
16 “Karwe mo-safina,
uwe hamwë na mokaaho,
abhaana abhaaho na bhakaabho.
17 Rishoka urwe muyö,
uwe hamwë na sityënyi syonswe igho seno onasyo.
Rishökya bhyonswe igho bheno bhekoheeshera,
ibhinyönyi,
situgho na bheno bhikwingʼuura hansë.
Bhyebhore,
bhinyaraghane,
bhyaruhe ko-kebhara.”
18 Mbe,
Nuhu akarishoka ukurwa mo-safina,
hamwë na mokaaye,
abhaana abhaaye na bhakaabho.
19 Sityënyi na situgho syonswe igho sekarishoka ukurwa mo-safina setongoteraini,
ibhinyönyi,
na bheno bhikwingʼuura hansë,
na bhyonswe igho bheno bhekoghenda ko-kebhara kono.
Nuhu aramwensera Waryobha
20 Hano Nuhu yaaruurë mo-safina muyö,
akahaghaasha riighyö irya amaghena,
okore amwensere YEHOBHA Waryobha.
Akaghegha sityënyi nyabhorebhe mu-sityënyi seno setarëngë sinyanku,
na ibhinyönyi bheno bhetarëngë ibhinyanku,
akabhekora ikimwenso ikya ukusikibhwa.
21 Hano YEHOBHA Waryobha yaaighuurë ikirumba ikiiya,
kekamötëghërya,
akaighambera mo-motwe ughwaye igha,
“Tindihiima ghwiki ekebhara keno ko okoghera iya abhantö,
nokaanyoora amaitegherro aghaabho m-maghogho ukurwa bhakëërëngë bhake.
Tindisikya ghwiki ëbhëntö bheno bhekoheeshera,
kya bhono naakörrë ekembere.
22 Enkaagha eno ekebhara këkëghëndërrya okobha-ho,
neraabhenga-ho enkaagha iya ukwëmya na iya okoghesa,
neraabhenga-ho enkaagha iya embeho na iya orooha,
neraabhenga-ho enkaagha iya emaaho na iya imbura,
neraabhenga-ho enkaagha iya ubhutikö na iya omobhasö.
Senkaagha siyö,
tesebhore-ho hë.”