Waryobha arakora imuuma na Nuhu
9
Mbe,
Waryobha akangʼoora Nuhu na abhaana abhaaye,
akabhatëëbhya igha,
“Mwebhore igho mwaruhe,
mwishöri ekebhara.
2 Sityënyi syonswe igho isya ko-kebhara,
ibhinyönyi,
sinswë syonswe igho,
na bheno bhikwingʼuura hansë,
mberaabhoobhohenga,
ko bhoora mbëtöörrë mo-mabhoko aghëënyu.
3 Bhoono sityënyi syonswe igho,
nseraabhe ibhyakorya ibhyënyu.
Nkobhahaana ndë ëbhëntö bhyonswe igho bhebhe ibhyakorya ibhëënyu,
kya bhoora naabhahaayë sinyënyi.
4 Kasi motakaarya inyama eno eena amaanyinga,
ko bhoora amaanyinga ngo öbhöhöru ubhwa ëkëntö.
5 Ömöntö ono araaite ömöntö,
nendaatune öbhöhöru ubhwa ömöntö uyö aitirë.
Hano ityënyi eraaite ömöntö,
ni-igha yiitwe,
na kera ömöntö ono akwita murikyaye,
ni-igha umwene wonswe aitwe.
6 Ko bhoora öni naabhömbirë abhantö ku ituubho iyaane,
ku bhuyö hano ömöntö wowonswe igho araaite ömöntö,
umwene wonswe ni-igha aitwe.
7 Mbe,
bhoono bhëënyu mwebhore igho,
mwaruhe,
mwishöri ekebhara,
mwaruhe bhököngʼu.”
8 Waryobha akatëëbhya Nuhu na abhaana abhaaye igha,
9 “Bhoono maaha,
nendaakore imuuma na bhëënyu na abheebhorwa abhëënyu,
10 na bheno bhyaabhombwa bhyonswe igho bheno bhekoheeshera,
ibhinyönyi,
situgho na sityënyi isya mwi-sisi syonswe igho,
bhyonswe igho bheno bhyaaruurë mo-safina,
kera ëkëntö keno kërëngë ko-kebhara kono.
11 Ndakora imuuma na bhëënyu igha,
tindisikya ghwiki ëbhëntö bhyonswe igho na ëhöörö iya amanshë.
Terebha-ho ghwiki ëhöörö iya amanshë iya ukusikya ekebhara keno.”
12 Ho Waryobha yaamarrë akaghamba igha,
“Keno nkyo ekemanyërryö ikya imuuma eno nkokora na bhëënyu,
na kera ëkëntö keno kekoheeshera,
keno kërëngë hamwë na bhëënyu.
Imuuma iyö neraaghëndërri kobhaho igho kughya iyö.
13 Ntöörrë-ho riitë irya abhaasi,
riyö ndyo reraabhe ekemanyërryö ikya imuuma iyaane na ëbhëntö bhyonswe igho ko-kebhara.
14 Hano ndaareetenga amasaarö agha imbura ko-kebhara,
na riitë irya abhaasi remaahekane,
15 hayö ho ndaaheetoke imuuma iyaane na bhëënyu,
na ëbhëntö bheno bhyaabhombwa bhyonswe igho bheno bhekoheeshera.
Ëhöörö iya amanshë tiishe ghwiki ukusikya ëbhëntö bhyonswe ibhya öbhöhöru.
16 Mbe,
hano riitë irya abhaasi riyö reraamaahekanenga,
hayö ho na öni wonswe ndaahiitenga imuuma iya amakora ghonswe igho,
eno naakora na bheno bhyaabhombwa bhyonswe igho,
ibhya seteemo syonswe igho,
ko-kebhara kono.”
17 Mbe,
Waryobha akatëëbhya Nuhu igha,
“Keno nkyo ekemanyërryö ikya imuuma eno ntöörrë-ho na bheno bhyaabhombwa bhyonswe igho ko-kebhara.”
Abhaana abha Nuhu
18 Abhaana abha Nuhu bhano bhaaruurë mo-safina n-Shëëmu,
Haamu na Yafëëti.
Mbe,
Haamu uyö we yaarë umwibhöri wa Kaanaani.
19 Abhaana abhatatö bhayö,
mbo bhaarë abhaana abha Nuhu,
na ekebhara kekeeshora abhantö okohetera ko abhaana abha Nuhu bhayö.
20 Nuhu m-mörëmi yaarë,
we yaarë uwa mbere ukwëmya emezabhibhu.
21 Urusikö öröndë Nuhu akanywa amarwa agha sezabhibhu,
ghakamoghoota.
Akaraara kengʼaabhi mu-righutu iryaye.
22 Haamu,
suwaabho Kaanaani,
akamaaha ekengʼaabhi ikya suwaabho,
akarishoka kebhara,
akaghya ökötëëbhya bhamura abhaabho,
Shëëmu na Yafëëti igha suwaabho n-kengʼaabhi arë.
23 Ho Shëëmu na Yafëëti bhaaghëghirë ingibho ko-mareko,
bhakaghya kinyumenyume,
bhakakundikirya suwaabho,
eno bhamaahërrëëyë mbareka,
okore bhatakaamaaha ekengʼaabhi ikya suwaabho.
24 Hano amarwa agha sezabhibhu ghaamwamökirë,
Nuhu akamanya bhono omoona uwaaye omoke yaamökörëëyë.
25 Akaghamba igha,
“Kaanaani aihiimwe!
Abhe omoghorwa ono ataana ubhwera ko bhawamwabho.”
26 Nuhu akaghëndërrya okoghamba igha,
“Atöönibhwi YEHOBHA,
Waryobha uwa Shëëmu!
Kaanaani abhe omoghorwa uwa Shëëmu.
27 Waryobha yëngëri urwebhoro ku Yafëëti,
abhe na omorembe mo-maghutu agha Shëëmu.
Kaanaani abhe omoghorwa uwa Yafëëti.”