Yadayi puni yi Kafooŋi kêe
148
Yii Kafooŋi kêe!
Nìɲyiiŋi yaayi yi Kafooŋi Kile kêe,
yii u kêe nìɲyiiŋi cyeyi puni i.
2 U mɛ̀lɛkɛɛbii puni pi u kêe,
u kàshicyeyi puni yi u kêe.
3 Canŋaɲyiini ná yiŋke,
ku u kêe,
wɔrigii niɲiŋkii puni cyi u kêe.
4 Nìɲyiiŋi tɛgɛni li u kêe,
nìɲyiiŋi ɲuŋɔ lwɔhe mú ku u kêe.
5 Yire yaayi puni yi Kafooŋi kêe,
ɲaha kurugo yɛ,
u à jwo,
ka yire puni si dá.
6 U à yi tìŋɛ yi tatɛɛnyi i tèrigii mɛɛ na,
fo tèekwombaa,
maa sàliya kan yʼá,
uru sì n-kɛ̂ɛnŋɛ mɛ.
7 Ɲìŋke yaayi puni yʼa Kafooŋi kêre,
mà bâra suumpe lwɔhe yabwoyi ná tacuguyi,
8 ná kileɲini ná zànhafuɲcɛɛnɲyi ná lùŋɔɔge ná kàkuraŋke,
ná zànhe kafeebwɔhe ku maha u ɲwɔmɛɛni cû ke,
9 ná ɲaɲyi ná mpògigii puni
ná cisente ná sɛdiri cire puni,
10 ná sige yaare ná kànha yatɔɔre
ná ɲìŋke yafiliyi ná saɲcyɛɛnre ti maha yîri ke,
11 ná ɲìŋke saanbii ná supyishiŋi puni,
ná fànhafeebii ná ɲìŋke yukyaabii puni,
12 ná nàɲjiibii ná pùcyaabii,
ná shinlyeebii ná nàŋkopyire.
13 Pire puni pi Kafooŋi kêe,
ɲaha kurugo yɛ,
uru kanni mɛge kʼà pêe,
u sìnampʼà fànha tò ɲìŋke ná nìɲyiiŋi wumpe na.
14 U à u shiinbii fànhe ɲyaha,
lire na ɲyɛ pèenɛ kyaa u yyahafyagarefeebii punʼá,
Izirayɛli shiinbii kyaa li,
pire kyaa lʼà táan u á.
Yii Kafooŋi kêe!