Ɛsitɛri Sémɛŋi
Sémɛŋi tasiige
Yahutucwoŋi wà kyaa li ɲyɛ ŋge sémɛŋi i, uru ŋgemu u à u munaani wà mpuŋu na si u shiŋi shiinbii shwɔ ke. Uru Yahutucwoŋi mɛge ku mpyi Ɛsitɛri. Uru ceeŋi mɛge kʼà le ŋge sémeŋi na.
Tèni i u à sémɛ ke, mà lwɔ́ Inde kìni na mà sà nɔ Misira wuuni na, Pɛrisi kìni shiinbii pi mpyi cyire kìrigii puni ɲuŋu na. Lire mpyi a Yahutuu niɲyahamii ta pi à yîri Babilɔni kìni i mà pa pi kìni i. Kàshige ku mpyi a pi pyi pi à fê kàre Babilɔni kìni i. Lire kìni sàliyaŋi nà li làda kàrigii mpyi a waha Yahutuubii na.
Ɛsitɛri lemɛ mpyi a sàa ɲwɔ. Ɲyɛ, Pɛrisi kìni saanŋi cwoŋʼà pa u mùmpɛnmɛ pyi, ka saanŋi si u nàmbage kwɔ̀ maa Ɛsitɛri lèŋʼa pyi u cwɔ. Lire kàntugo, ka saanŋi kacwɔnrɔŋi wà si mpa cwɔɔrɔ pyi, ɲaha kurugo yɛ, u la mpyi si Yahutuubii puni bò. Ɛsitɛri tubileeni jyaŋi Maridose à pa yire cè ke, maa jwo a ɲwɔ ná Ɛsitɛri e bà pire nà pi Yahutuɲɛɛbii si mpyi si shwɔ mɛ.
Kile mɛge ɲyɛ ŋge sémɛŋi i mɛ, ŋka pyiŋkanni na Kile na u wuubii shwuu ke, lire na ɲaa u e.
Canŋka, Maridose sà Ɛsitɛri pyi: «Ɛsitɛri, mu u ɲyɛ saanŋi cwoŋi, lirʼà pyi bà mu si mpyi si nde kani ɲùŋu bɛ̂ yoo jofoo u à cè yɛ?» (4:14).
Yahutuubii kataanni pi maha mpyi Purimu ke, lire kataanni sìiŋkanni ná li ɲwɔhʼà jwo ŋge sémɛŋi i.
Sémɛŋi cɛɛnnɛŋkanni:
Ɛsitɛri à pyi saanŋi cwoŋi: 1-2.
Ama vùnmpwɔɔre kani: 3.
Maridose à jwo a ɲwɔ ná Ɛsitɛri e: 4.
Saanŋi à ɲɛɛ Maridose á: 5-6.
Ama mbòŋi: 7.
Yahutuubii zàmpɛɛnbii mbòŋi: 8-9.
Purimu kataanni: 9.
Saanŋi ná Maridose à fànha ta: 10.