Izirayɛli shiinbii ntɔ̀rɔŋi
24
Kafooŋi lùunʼà yîri Izirayɛli shiinbii taan sahaŋki.
Ka u u Dawuda sɔ̀n a yaha pi na maa jwo:
«Ta sì ma a sà Izirayɛli shiinbii ná Zhuda shiinbii tɔ̀rɔ.»
2 Ɲyɛ,
kàshikwɔɔnbii yyaha yyére shinŋi Yohabu u mpyi saanŋi ŋkère na ke,
ka u u uru pyi:
«Shà Izirayɛli tùluyi puni i,
mà lwɔ́ Dan kànhe na,
mà sà nɔ fo Bɛrisheba kànhe na,
yii i sùpyire tɔ̀rɔ,
bà mii si mpyi si ti pɛ̀rɛge cè mɛ.»
3 Ka Yohabu si saanŋi pyi:
«Kafooŋi ,
mu Kileŋi u sùpyire yaha ti púgʼa nɔ tooyo ŋkuu (100) na mà tòro mpe taan,
saanŋi mii kàfooŋi u lire ɲya u ɲyiigii na.
Ŋka,
ɲaha na saanŋi mii kàfooŋi la ɲyɛ si nde pyi yɛ?»
4 Ka saanŋi si ŋkwôro u ɲwɔjwumpe ɲuŋʼi,
u mpyi a puru mpemu jwo Yohabu ná kàshikwɔɔnbii yyaha yyére shiinbilʼá ke.
Ka Yohabu ná kàshikwɔɔnbii yyaha yyére shiinbii si yîri saanŋi taan mà kàre si sà Izirayɛli shiinbii tɔ̀rɔ.
5 Ka pi i ŋkàrʼa sà Zhurudɛn baŋi jyiile,
maa sà pi tatɛɛnge yaa Arowɛri i,
kànhe ku ɲyɛ Gadi bafage niŋke e,
Yazɛri taan ke,
kuru kàniŋɛ yyéreŋi i.
6 Pi à yîri wani,
maa ŋkàre Galadi kùluni i,
maa yîri wani mà kàre Tatimi-Odisi kùluni i.
Pi à yîri wani,
maa ŋkàre Dan-Yani ná Sidɔn kwùumpe e.
7 Pi à yîri wani,
maa ŋkàre kàshisulukaaŋke kànhe Tiri i,
maa yîri wani mà kàre Ɛvi shiinbii kànyi puni ná Kana shiinbii kànyi puni i,
maa sà ku ɲùŋɔ kuu Zhuda kùluni wwòro kùlu yyéreŋi i Bɛrisheba e.
8 Lire pyiŋkanni na pi à kìni puni ɲaara yiɲyɛ baacyɛɛre ná canmpyaa beɲjaaga funŋʼi,
maa núrʼa kàre Zheruzalɛmu i.
9 Ka Yohabu si sùpyire ntɔ̀rɔŋi ɲwɔshwɔɔre kan saanŋʼá.
Nàmbaabii pi mpyi a nɔ kàshikwɔnŋwɔɔni lwómɔ Izirayɛli i ke,
pire mpyi shiin kampwɔhii ŋkwuu baataanre (800.000),
Zhuda wuubii sí ɲyɛ shiin kampwɔhii ŋkwuu kaŋkuro (500.000).
Kile à Dawuda kapiini ŋkooŋi wwû u na
10 Sùpyire tɔrɔŋkwooni kàntugo,
ka Dawuda zòmbilini si wá na ŋkwôre.
Ka u u Kafooŋi pyi:
«Kafooŋi ,
kapii nimbwoo mii à pyi nde.
Kafooŋi ,
numɛ,
náaŋi ma a ma báarapyiŋi kapyiini yàfa u na,
ɲaha kurugo yɛ,
mii à sìɲcomɔ pyi.»
11 Kuru canŋa nùmpanŋa,
Dawuda à yîri ke,
tùnntunŋi Gadi u ɲyɛ u yɛrɛfooŋi ke,
ka Kafooŋi si u jwumpe nɔ uru na,
maa u pyi:
12 «Sà yi jwo Dawuda á na Kafooŋi à jwo:
“Mii sí yyefuyo taanre cyêe mu na,
ma a niŋkin lwɔ́ yʼe,
mii sí kuru nɔ mu na.”»
13 Ɲyɛ ka Gadi si ŋkàre Dawuda yyére maa sà yi yyaha jwo u á.
U à u pyi:
«Yyee baashuunni katege mu kìni i,
lire ɲyɛ mɛ,
na fî ma zàmpɛɛnbii yyaha na,
pi raa ma kɔ̀re yiɲyɛ taanre funŋʼi,
lire ɲyɛ mɛ,
canmpyaa taanre kafɛɛgɛ yampimɛ mu kìni i.
Cyire kapyaagii taanreŋi i,
niŋkin lwɔ́,
si sà lire jwo na tunvooŋʼá.»
14 Ka Dawuda si Gadi pyi:
«Mii funŋke naha a sàa pɛn.
Wuu wuye yaha Kafooŋi cye e,
ɲaha kurugo yɛ,
uru ɲùŋkʼà sàa pi,
ŋka,
mii àha n-yaha sùpyire cye e mɛ.»
15 Ka Kafooŋi si kafɛɛgɛ yampimɛ wà Izirayɛli kìni na,
mà lwɔ́ ɲyɛ̀ge na,
mà sà nɔ tèni niɲcyeeni na.
Mà lwɔ́ Dan kànhe na,
mà sà nɔ Bɛrisheba kànhe na,
ka shiin kampwɔhii beetaanre ná kɛ (70.000) si ŋkwû sùpyire e.
16 Tèni i mɛ̀lɛkɛŋʼà u cyɛge yîrige Zheruzalɛmu kàmpanŋke na si ku kakyara ke,
ka Kafooŋi si sɔ̀nŋɔŋkanni kɛ̂ɛnŋɛ tire kakyaare yyaha na,
maa mɛ̀lɛkɛŋi pyi:
«Ti yaha amuni,
ma cyɛge núruŋɔ numɛ.»
Lire mpyi a Kafooŋi mɛ̀lɛkɛŋi ta u à byanhara Yebusi kànhe shinŋi Aravana sùmaŋi fyiini na.
17 Dawuda à mɛ̀lɛkɛŋi ɲya u u sùpyire bùu ke,
maa Kafooŋi pyi:
«Mii u à kapiini pyi,
mii u à wurugo,
nte sùpyire ɲyɛ a yafyin pyi mɛ.
Mii ná na tuŋi pyɛngɛ shiinbii na mu à yaa mu u kyaa pyi.»
18 Kuru canŋke,
ka Gadi si ŋkàre Dawuda yyére maa sà u pyi:
«Fyiini na Yebusi shinŋi Aravana maha u sùmaŋi bwùun ke,
shà lire na,
ma a sà sàraya tawwugo faanra Kafooŋi á.»
19 Ka Dawuda si yîrʼa kàre bà Gadi à yi jwo u á mɛ,
mà tàanna ná Kafooŋi yi jwuŋkanni i urʼá.
20 Aravana à pa wílʼa saanŋi ná u báarapyiibii ɲya pi i ma u yyére ke,
maa fworo,
maa sà niŋkure sín saanŋi fere e maa yyahe cyígile ɲíŋke na,
21 maa jwo:
«Ɲaha kurugo saanŋi mii kàfooŋi à pa u báarapyiŋi yyére yɛ?»
Ka Dawuda si u pyi:
«Mii à pa si mpa mu fyiini shwɔ,
si sáraya tawwugo faanra Kafooŋi á,
bà nde kawaani sí n-pyi si láha sùpyire ɲuŋʼi mɛ.»
22 Ka Aravana si Dawuda pyi:
«Saanŋi,
mii kàfooŋi u fyiini lwɔ́,
sárayi yʼà u táan ke,
u raa yire wwû li na.
Wíi,
nìiyi yi ɲje sárage nizogoge mɛɛ na.
Wòtoroyi ná zhúubii sí n-pyi kàɲciiyi.»
23 Ka Aravana si yire puni kan saanŋʼá,
maa saanŋi pyi:
«Kafooŋi ,
mu Kileŋi u ɲɛɛ ma sárage na.»
24 Ka saanŋi si Aravana pyi:
«Ɔnhɔ!
Mii la na ɲyɛ si yi shwɔ mu á yi lwɔɔre na.
Mii ɲyɛ a yaage ŋkemu shwɔ mɛ,
mii la ɲyɛ a sìi si kuru pyi sáraga nizogogo Kafooŋi ,
mii Kileŋi á mɛ.»
Ka Dawuda si fyiini ná nìiyi shwɔ wyɛ́rɛfyinŋi tɔɔnɲwɔ beeshuunni ná kɛ.
25 Ka Dawuda si sáraya tawwugo faanra Kafooŋi á wani,
maa sáraya nizogoyo ná funntanga sáraya wwû.
Ka Kafooŋi lùuni si ntɛ̀ɛn mà yyaha tíi ná kìni i.
Ka kafɛɛge yampimpe si yyére Izirayɛli kìni i.