Dawuda jwumpe nizanmpe
23
Dawuda jwumpe nizanmpe pʼà pyi mpe:
«Zhese jyaŋi Dawuda jwumpe,
shinbwoŋi jwumpe pu ɲyɛ mpe.
Yakuba u Kileŋi à sùpyaŋi ŋgemu cwɔɔnrɔ ke,
Izirayɛli shiinbii mɛceeŋi niɲcɛnŋi.
2 Kafooŋi Múnaani na yu mii cye kurugo,
u jwumpe na ɲyɛ mii ɲjini na.
3 Izirayɛli u Kileŋi à jwo,
Izirayɛli kafaagʼà mii pyi:
“Sùpyaŋi u ɲyɛ na fànhe pyi sùpyire ɲuŋʼi ná ntìiŋi i ke,
u maha sùpyire cwore ná Kile yyahafyagare e.
4 Urufoo na ɲyɛ mu à jwo ɲyɛ̀mugoɲwɔge bɛ̀ɛnmpe,
canŋaɲyiini tèefworoni i.
Urufoo na ɲyɛ mu à jwo ɲyɛ̀mugoɲwɔge ɲahaɲya bàa wogo.
U bɛ̀ɛnmpe maha ɲyɛge fyîn ɲìŋke na,
zànhe paŋkwooni kàntugo.”
5 Amuni bà mii pyɛnge ɲyɛ Kile yyahe táan mà?
Ɲaha kurugo yɛ,
u à ɲwɔmɛɛ niŋkwombaala lwɔ́ mii á,
li karigii punʼà sogolʼa ɲwɔ maa ntígile.
U sí mii shwɔ karigii puni na,
si mii ɲyii yaayi puni kan mii á.
6 Ŋka,
supyifahafahayi na ɲyɛ mu à jwo ŋguro,
ntemu ti maha wà tatɔɔngʼe ke,
wà ɲyɛ na ti cwôre ná cye e mɛ.
7 Ŋgemu la ku ɲyɛ si ti cû ke,
urufoo maha tɔɔnŋɔ lire ɲyɛ mɛ,
tàanŋi cyiinni lwɔ́,
ti maha súugo ti tanuge e.»
Dawuda kàshikwɔnmpiyi kani
8 Kàshikwɔnmpiyi yi mpyi na báare Dawuda á ke,
yire mɛyi yi ɲje:
Josebasɛti,
mà yîri Takemoni kànhe e.
Uru na mpyi saanŋi kàshicyɛge yyaha yyére shin nimbwo.
Urʼà shiin ŋkwuu baataanre (800) bò tɔɔgɔ niŋkin i ná u tàanŋi i.
9 Uru kà yîri wani,
Akoshi tùluge shinŋi Dodo jyaŋi Eliyazari u à taha.
Nàampii taanreŋi u mpyi a ntùŋke taha Filisi shiinbii nimbinnibii na ná Dawuda e,
mà Izirayɛli shiinbii yaha pi i fî na wà ɲaɲyi cyeyi i ke,
uru na mpyi uru wà.
10 Uru u à yîri maa Filisi shiinbii tùn fo ka cyeŋgaŋi si sà jyè u cyɛge e mà kàshikwɔnŋwɔɔni yaha u cye e.
Kafooŋi à sàa Izirayɛli shiinbii pyi pi à pyi javee kuru canŋke.
Ka sùpyire si núrʼa kàre Eliyazari fye e,
si sà kwùubii cyeyaayi kuu kanna.
11 Uru ka yîri wani,
Arari kànhe shinŋi Age jyaŋi Sama u à taha.
Filisi shiinbii mpyi a piye bínni Leyi kànhe e.
Lantiyia kɔɔgɔ na mpyi kuru cyage e,
ka Izirayɛli shiinbii si fê Filisi shiinbii yyaha na.
12 Ka Sama si yyére lantiyi kɔɔge niŋke e maa kakyaare sige ku na,
maa Filisi shiinbii kakyara.
Kafooŋi à u pyi u à sàa jà pi na.
13 Sùmakwɔɔngii tèni i,
ka shiin taanre si fworo kàshikwɔɔnbii yyaha yyére shiinbii beɲjaaga ná kɛŋi i mà kàre Dawuda yyére,
Adulamu ɲaŋgyige e.
Lirʼà Filisi shiinbii kàshikwɔɔnbii ta pi à sà ntɛ̀ɛn Erefayimu shiinbii bafage e.
14 Dawuda mpyi u taŋwɔhɔge e,
Filisi shiinbii kàsikwɔnkuruŋke kà si mpyi a Bɛtilɛhɛmu kànhe cû.
15 Lwɔhɔ kyalʼà pa Dawuda ta ka u u jwo:
«Jofoo u sí sà Bɛtilɛhɛmu kànhe tajyiɲwɔge bɛ̀ɛnŋke lwɔhe kà kwó si mpa ŋkan mii i bya yɛ?»
16 Ɲyɛ ka yire kàshikwɔnmpiyi taanreŋi si ŋkàrʼa sà Filisi shiinbii tatɛɛnge jyiilʼa sà Bɛtilɛhɛmu kànhe tajyiɲwɔge bɛ̀ɛnŋke lwɔhe kà kwó mà pa ŋkan Dawuda á.
Ŋka,
u ɲyɛ a ɲɛnʼa ku bya mɛ,
maa ku wu mà pyi sáraga Kafooŋi yyahe taan,
17 maa jwo:
«Kafooŋi u nde mpyiŋi sɔ̀nŋɔre laaga tɔɔn na na.
Mpii nàmbaabii pi à pi múnahigii yaha mpuŋɔ na maa ŋkàre ke,
pire sìshange mii sí n-bya la?»
U ɲyɛ a ɲɛnʼa ku bya mɛ.
Nde yire kàshikwɔnmpiyi taanreŋʼà pyi ke,
lire lʼà pyi lire.
18 Seruya jyaŋi Yohabu sìɲɛɛŋi Abisayi u mpyi yire kàshikɔnmpiyi shiin taanreŋi ɲùŋufooŋi.
Ka u u sà shiin ŋkuu taanre (300) bò ná u tàanŋi i.
Ka u mɛtange si fworo mpii nàambaabii taanreŋi shwɔhɔlʼe.
19 Mpii shiin taanreŋi i,
u mɛge mpyi a fworo mà tòro pi sanmpii na.
Uru u mpyi pi ɲùŋufooŋi,
ŋka u ɲyɛ a mpyi a pi kwɔ̀ nànte e mɛ.
20 Kabisɛli kànhe shinŋi Yoyada jyaŋi Benazha na mpyi kàshikwɔnmpege.
U à kabwɔhii niɲyagii pyi.
Uru u à Muwabu shiinbii kàshikwɔnmpiyi shuunniŋi bò.
Uru u mpyi a tîge wyige e mà cànrage bò wyeere canmpege kʼe.
21 Uru mú u ná mpyi a Misira nàntɔɔnge bò mà tàanŋi yaha ku cye e.
U à kàre uru Misira shinŋi mɛɛ na ná kàbilʼe,
maa u tàanŋi shwɔ u na mà tɛ̀gʼa u bò.
22 Lire Yehoyada jyaŋi Banazha à pyi,
ka lire si u mɛge pyi kʼà fworo sèlʼe pire kàshikwɔnmpiyi taanreŋi shwɔhɔlʼe.
23 Kàshikwɔnmpiyi beɲjaaga ná kɛŋi i,
u mɛge mpyi a fworʼa tòro pi sanmpii wuyi na,
ŋka u ɲyɛ a mpyi a niɲcyiibii taanreŋi kwɔ̀ nànte e mɛ.
Ka Dawuda si u pyi u saɲcwɔnsigibii yyaha yyére shinŋi.
24 Yohabu sìɲɛɛŋi Azayɛli na mpyi mpii shiin beɲjaaga ná kɛŋi wà.
Bɛtilɛhɛmu kànhe shinŋi Dodo jyaŋi Elana mú na mpyi pi wà,
25 ná Sama,
mà yîri Arodi kànhe e,
ná Elika,
mà yîri Arodi kànhe e,
26 ná Elɛzi,
mà yîri Pelɛti kànhe e,
ná Ikesi jyaŋi Ira,
mà yîri Tekuwa e,
27 ná Abiyezɛri,
mà yîri Anatɔti i.
Ná Mebunayi,
mà yîri Usa e,
28 ná Zalimɔ,
mà yîri Awoyi i,
ná Maarayi,
mà yîri Netofa e,
29 ná Baana jyaŋi Elɛbu,
mà yîri Netofa e,
ná Iribayi jyaŋi Itayi,
mà yîri Gibeya e,
Bezhamɛ kùluni i.
30 Ná Benazha,
mà yîri Piratɔn kànhe e,
ná Idayi,
mà yîri Nahale-Gasi i,
31 ná Abaliboni,
mà yîri Bɛti-Araba e,
ná Azimavɛti,
mà yîri Bahurimu i.
32 Ná Eliyaba,
mà yîri Salibɔn e,
ná Yasɛni jyaabii Zhonatan,
33 ná Sama,
mà yîri Arari i.
Ná Sarari jyaŋi Akiyamu,
mà yîri Arari i,
34 ná Maka kànhe shinŋi Asibayi jyaŋi Elifelɛti,
ná Ayitofɛli jyaŋi Eliyamu,
mà yîri Gilo e,
35 ná Ezirayi,
mà yîri Karimɛli i,
ná Parayi,
mà yîri Arabu i,
36 ná Natan jyaŋi Igali,
mà yîri Soba e.
Ná Bani,
mà yîri Gadi i,
37 ná Amɔ shinŋi Zelɛki,
ná Narayi,
mà yîri Berɔti i.
Uru u mpyi maha Seruya jyaŋi Yohabu kàshikwɔnyaayi lwúu,
38 ná Ira,
mà yîri Yetɛri i,
ná Garɛbu,
mà yîri Yetɛri i,
39 ná Ɛti tùluge shinŋi Uri.
Pi punʼà pyi kàshikwɔnmpiye beɲjaaga ná kɛ ná baashuunni (37).