Dawuda mɛɛni
22
Tèni i Kafooŋi à Dawuda shwɔ u zàmpɛɛnbii puni ná Soli na ke,
lire tèni i u à nde mɛɛn cêe Kafooŋi á.
2 U à jwo:
«Kafooŋi u ɲyɛ mii kafaage,
mii kàshisulu káaŋke ná mii shwofooŋi.
3 Kile u ɲyɛ mii taŋwɔhɔge kafaage,
mii à naye tíiŋɛ u na.
Uru u ɲyɛ mii tɔɔnnte yabeŋke,
mii fànhe tatage ná mii shwofooŋi wi.
Mii kàsɔɔge ná mii taŋwɔhɔge,
mu u maha mii shwuu shinkyanyi na.
4 Kafooŋi u kêe,
mii à u yyere,
ka u u mii yige na zàmpɛɛnbii cye e.»
5 Kwùŋi lufoompe mpyi a mii ɲùŋu jò,
lufoompe kakyaare mpyi a mii pyi mii à sàa fyá.
6 Sèe,
kwùŋi yapwɔyi mpyi a mii pwɔ,
kwùŋi kànhaŋke mpyi a mii cû.
7 Mà mii yaha nàvunŋke e,
mii à Kafooŋi yyere.
Mii à mɛɛ wà Kileŋi á,
Mà u yaha u bage e,
u à lógo mii ɲwɔ na.
Yirigii mii à pyi ke,
cyirʼà jyè u niŋgyigilʼe.
8 Ka ɲìŋke si ɲcúnŋɔ maa ɲcɛ̂ɛnnɛ,
nìɲyiŋi núcyanyʼà cúnŋɔ,
yi punʼà ɲyaha ɲyaha,
Kafooŋi lùyirini cye kurugo.
9 Ŋguruge mpyi na dùru na fwore u múnawyigilʼe,
nage mpyi na fwore u ɲwɔge e zògoŋi mɛɛ na.
Naŋkyanhigii mpyi na ɲarage na fwore u ɲwɔge e.
10 U à nìɲyiŋi fɛ̂ɛn maa ntîge,
ɲahaɲya niŋgwoyo mpyi u tooyi ɲwɔhʼi.
11 U à dùgo sherubɛnŋi na mà yîri,
u mpyi na ntîri kafɛɛge fukanyi ɲuŋʼi.
12 U mpyi a numpini tɛ̀gʼa uye tò vàanŋa baga fiige.
Ɲahaŋa lwɔhɔ wogo mpyi a u tò.
13 Bɛ̀ɛnge ku mpyi u yyaha na ke,
nasimɔmpii mpyi na fwore kure e.
14 Kafooŋi à tîn nìɲyiŋi i,
Kile nìɲyi wuŋi tùnmpʼà fworo.
15 U à tàanbii ŋwɔ,
maa mii zàmpɛɛnbii caala,
u maha kileɲiiŋkii tɛ̀gʼa pi tîn a caala.
16 Kafooŋi à pi fùguro ná u lùyirini kafɛɛge e ke,
lirʼà suumpe lwɔhe nafyiini yige cyíinŋi na,
ka ɲìŋke nintaani si ɲya.
17 U à u cyɛge yige nìɲyiŋi i
maa mii cû,
u à mii dìrʼa yige lùbwɔhe e.
18 U à mii shwɔ mii zàmpɛɛnbii fànhaɲyahaga wuubii na,
pire yukwɔnɲɛɛbii pi mpyi a fànha tò mii na ke.
19 Mii cwɔ̀nrɔmpe canŋke,
pi à pa ɲcwo mii na,
ŋka,
Kafooŋi à mii tɛ̀gɛ.
20 U à mii yige cwɔ̀nrɔmpe e maa mii shwɔ,
ɲaha kurugo yɛ,
mii kyalʼà táan u á.
21 Kafooŋi à mii cû a tàanna ná mii ntìiŋi i,
u à mii sârʼa tàanna ná mii fyìnmɛ cyempyige e.
22 Ɲaha na yɛ,
mii à Kafooŋi kurigii ɲaara.
Mii ɲyɛ a cyé na Kileŋi na,
maa naye yaha kapiini mpyiŋi na mɛ.
23 Mii ɲyii na ɲya u toŋi kurigii puni na.
U à kyaa maha kyaa jwo ke,
mii ɲyɛ a lire là wílʼa cwô mɛ.
24 Mii tìgire cyaga bàa wu u ɲyɛ u yyahe taan,
mii à jà naye na kapegigii kàmpanŋke na.
25 Lire e,
Kafooŋi à mii sârʼa tàanna ná mii ntìiŋi i,
u à mii sârʼa tàanna ná mii fyìnmpe e.
26 Mu maha ɲwɔge shincɛnŋi na,
mu maha ntìiŋi pyi shintíinŋʼá.
27 Mu maha funŋke fínniŋɛ funvyinge fooŋʼá,
mu maha funŋkyange fooŋi sârʼa tàanna ná u funŋkyange e.
28 Pi à mpiimu sílige ke,
mu à pire ɲùɲyi yîrige,
ŋka mpii pi à piye pêe ke,
mu maha pire ɲùɲyi sôgo.
29 Sèeŋi na,
Kafooŋi ,
mu u ɲyɛ mii bɛ̀ɛnmpe,
Kafooŋi maha mii numpini pyi bɛ̀ɛnmɛ.
30 Mu cye kurugo,
mii maha ŋkà a tò kàshicyɛge na.
Mu cye kurugo,
mii Kileŋi,
mii maha jà a yi kàsɔɔge na.
31 Kile kurigilʼà tíi,
Kafooŋi jwumpʼà tàra.
Mpii pi à piye tíiŋɛ u na ke,
u na ɲyɛ pirʼá tɔɔnnɔ yabeŋɛ.
32 Ɲaha kurugo yɛ,
jo u ɲyɛ Kile,
ná Kafooŋi bàlʼa yɛ?
Jo u ɲyɛ kafaaga ná wuu Kileŋi bàlʼa yɛ?
33 Kile u ɲyɛ mii fànhaɲyahaga kàshisulu káaŋke,
u maha mii le kuntiini i.
34 U maha mii tooyi pyi cèŋke wuyi fiige,
u maha mii pyi mii à yyére tùnmpuɲuɲyi ɲuŋʼi.
35 U maha mii cyeyi taanni kàshige pyiŋkanni na,
fo maha fànhe kan mii cyeyʼá,
yʼà jà na dàɲyɛŋi sìntaage dìrili.
36 Mu à ma tɔɔnnte yabeŋke kan mii á,
maa mii shwɔ,
mu maha mii pyi shinbwo ma ntɛ̀gɛŋi kurugo.
37 Mu à kuni múgo mii tooyʼá,
mii tooyi sì n-sìi ntɛ̂rɛlɛ mɛ.
38 Mii maha na zàmpɛɛnbii fyè tɔ̀rɔ fo maha cye taha pi na,
mii si ɲyɛ na núruli ná pi ɲyɛ a kwɔ̀ mɛ.
39 Mii maha pi bwɔ̀n fo pi wà saha ɲyɛ na jà a yîri mɛ,
pi sí n-cwo zànhana mii tooyʼe.
40 Mu à fànhe kan mii á kàshige mɛɛ na,
mu à mii zàmpɛɛnbii kûrulo mii tooyʼe.
41 Mu à mii zàmpɛɛnbii pyi pi à fê mii yyaha na,
mii màpɛnge ɲyɛ mpiimu i ke,
mii sí pire puni shi tò.
42 Pi à mɛɛ wà ntɛ̀gɛŋi kurugo,
ŋka wà ɲyɛ a pa pi tɛ̀gɛ mɛ.
Pi à Kafooŋi yyere,
ŋka u ɲyɛ a pi ɲwɔ shwɔ mɛ.
43 Mii à pi mbyimɛ wwû ɲìŋke nticyɛnŋi fiige,
mii à pi cwɔ̀nhɔnɔ maa pi murulo keekuuŋi yɔ̀ɔge fiige.
44 Mu à mii shwɔ mii shiinbii supyikyanyi na,
maa mii tìŋɛ supyishiŋi ɲùŋɔ na,
mii ɲyɛ a mpyi a uru ŋgemu cè mɛ,
ka u u ŋkúu mii á.
45 Nàmpwuunbii na mii báami,
mii aha kyaa jwo,
pi maha ntílʼa li pyi.
46 Sàagʼà jyè supyshiŋi sanŋi i,
pi nivworobii pi kàshisulu bayi i,
pi na ɲcyɛ̂ɛnni.
47 Kafooŋi na ɲyɛ ɲyii na,
mii à u kêe,
uru u ɲyɛ mii kafaage.
Mii shwofooŋi à pêe.
48 Kile u maha mii ŋkooŋi wwû,
uru u maha supyishiŋi sanŋi pyi u à kúu mii á.
49 Uru u à mii shwɔ na zàmpɛɛnbii na,
mpii pi à ntùŋke taha mii na ke,
maa mii pyi mii à sí ta pire na.
Mu à mii shwɔ supyikyanyi na.
50 Lire kurugo,
Kafooŋi ,
mii sí fwù kan mu á supyishiŋi shwɔhɔlʼe,
mii sí raa mu mɛtange yiri na myahigilʼe.
51 Saanŋi Kafooŋi à cwɔɔnrɔ ke,
u maha zhwoŋi kabwɔhigii pyi urʼá,
u maha u cɛ̀nmpe cyêre Dawuda
ná u tùluge shiinbii na fo tèekwombaa.