Katibwɔhe kani
21
Dawuda saanre tèni i,
katibwɔhʼà pyi yyee taanre funŋʼi.
Ka Dawuda si Kafooŋi yíbe,
ka Kafooŋi si u pyi:
«Soli ná u pyɛngɛ shiinbii sìshanwuni kurugo lʼà pyi,
ɲaha kurugo yɛ,
pi à Gabahɔn shiinbii bò.»
2 Ka saanŋi si Gabahɔn shiinbii yyere si jwo ná pi e.
Izirayɛli shiin bà pi mpyi Gabahɔn shiinbii mɛ,
ŋka,
Amori shiinbii paanra ti mpyi ti ti.
Kàaga ku mpyi a pi ná Izirayɛli shiinbii pwɔ piye na.
Lire ná li wuuni mú i,
Soli mpyi na ŋko si pi shi tò,
ɲaha kurugo yɛ,
u mpyi a uye pwɔ Izirayɛli shiinbii ná Zhuda shiinbii sʼa sì yyaha na.
3 Ka Dawuda si Gabahɔn shiinbii yíbe:
«Ɲaha shi mii à yaa mii i pyi yii á yɛ?
Ɲaha shi mii sí n-tɛ̀gɛ nde kani láha bà yii sí n-pyi si jwó le Kafooŋi shiinbilʼá yɛ?»
4 Ka Gabahɔn shiinbii si u ɲwɔ shwɔ:
«Wyɛ́rɛ ná sɛɛn wogo bà ku ɲyɛ wuu ná Soli ná u pyɛngɛ shiinbii shwɔhɔlʼe mɛ,
wuu mú ɲyɛ a yaa wuu sùpya bò Izirayɛli shiinbilʼe mɛ.»
Ka saanŋi si jwo:
«Ɲaha shi yii la ɲyɛ mii pyi yii á yɛ?
Mii sí kuru pyi yii á»
5 Ka pi i saanŋi ɲwɔ shwɔ:
«Ná Soli la si mpyi si wuu kakyara si wuu shi pînniŋɛ Izirayɛli kìni puni i,
6 lire e ke,
pi u ɲampyire nàmbaa baashuunni kan wuu á,
wuu pwɔ a dùrugo ciyi na Kafooŋi yyahe taan,
Kafooŋi shincwɔrɔŋi Soli kànhe Gibeya e.»
Ka saanŋi si jwo:
«Mii sí pi kan yii á.»
7 Saanŋi ɲyɛ ɲɛnʼa Soli jyaŋi Zhonatan jyaŋi Mefibosɛti kan mɛ.
Ɲaha kurugo yɛ,
saanŋi ná Soli jyaŋi Zhonatan mpyi a kâa piyʼá Kafooŋi na.
8 Ŋka,
Aja pworoŋi Irisipa mpyi a jyaabii shuunniŋi mpiimu ta Soli á ná pire pi mpyi Arimoni ná Mefibosɛti ke,
saanŋi à pire cû mà bâra Soli pworoŋi Merabu jyaabii kaŋkuroŋi na.
U mpyi a pire si Meyola kànhe shinŋi Barizilayi jyaŋi Adiriyɛli á.
9 Ka u u pire le Gabahɔn shiinbii cye e pi à pwɔ a dùrugo ciyi na ɲaŋke ɲuŋʼi Kafooŋi yyahe taan.
Ka pi baashuunniŋi puni si ŋkwû siɲcyan sùmakwɔɔngii tèni i.
Lʼà pyi orizhikwɔngigii canɲcyiiyi i.
10 Ɲyɛ ka Aja pworoŋi Irisipa si boro lwɔ́ a pìli kafaaga na maa ntɛ̀ɛn mà lwɔ́ sùmakwɔngigii tèni na mà sà yaa ná zàncyiiyi i yi i ɲcwo pi buwuubii na.
Canŋke e,
u mpyi maha saɲcyɛɛnre kɔ̀re pi buwuubii na,
maa sige yaare kɔ̀re pi na numpilage e.
11 Soli bilicwoŋi nindeŋɛŋi Irizipa u mpyi Aja pworo ke,
nde uru mpyi a pyi ke,
ka pi i sà lire jwo Dawuda á.
12 Ɲyɛ ka Dawuda si ŋkàrʼa sà Soli ná u jyaŋi Zhonatan kaciiyi shwɔ Yabɛsi kànhe shiinbilʼá Galadi kùluni i.
Pire mpyi a sà yire kuu Bɛti-Sehan e,
cyage e Filisi shiinbii mpyi a pi pwɔ a dùrugo pi tèejani i Soli na Giliboha e ke.
13 Dawuda à sà Soli ná u jyaŋi Zhonatan kaciiyi lwɔ́ wani.
U mú à nimpwɔndurugubii sanmpii wuyi lwɔ́.
14 U à yire bâra Soli ná u jyaŋi Zhonatan kaciiyi na mà sà ntò Soli tuŋi Kisi fanŋke e,
Sela kànhe e,
Bezhamɛ kùluni i.
Ɲje saanŋi mpyi a jwo ke,
ka pi i yire puni pyi.
Lire kàntugo,
ka Kile lùuni si ntɛ̀ɛn,
ka kìni si yyeɲiŋɛ ta.
Filisi shiinbii kàshige
15 Filisi shiinbilʼà kàshige kwɔ̀n Izirayɛli shiinbii na sahaŋki.
Dawuda à kàre ná u kàshikwɔɔnbilʼe mà sà Filisi shiinbii tùn.
Dawuda mpyi a sàa kànha.
16 Arafa tùluge shinŋi mɛge ku mpyi Yisibinɔbu ke,
uru la mpyi si Dawuda bò.
Tàan na mpyi u á ŋgemu u mpyi a dàɲyɛtɔɔnnte cúlii taanre kwɔ̀ ke.
U mpyi a uye cyîbi ná kàshikwɔnŋwɔɔ nivɔnnʼi.
17 Ka Seruya jyaŋi Abisayi si Dawuda tɛ̀gɛ maa Filisi shinŋi bwɔ̀n a bò.
Ɲyɛ ka Dawuda shiinbii si ŋkâa u á maa jwo:
«Mu saha sì zhà ná wuu e kàshigʼá mɛ,
ma hà ŋkwɔ̀ Izirayɛli fùkinaŋi yaha u fùgo mɛ.»
18 Lire kàntugo,
kàshige kà saha a kwɔ̀n Filisi shiinbii na Gɔbu kànhe e.
Kuru kàshige cyage e,
Usa kànhe shinŋi Sibekayi à Arafa tùluge shinŋi Safu bò.
19 Kàshige kà saha a kwɔ̀n Filisi shiinbii na Gɔbu kànhe e.
Ka Bɛtilɛhɛmu kànhe shinŋi Jare-Oregimu jyaŋi Elana si Gati kànhe shinŋi Goliyati bò.
Goliyati tàanŋi cinŋke mpyi soocinŋi vàanmyigile cinŋke fiige.
20 Kàshige kà à mú à kwɔ̀n Gati i.
Nàntɔɔnŋi wà na mpyi kuru cyage e ná kampyɛhii baani baani i cyeyi na,
ná nupyɛhii baani baani i tooyi na.
Cyire puni mpyi beɲjaaga ná sicyɛɛre.
Arafa tùluge shin u mpyi u wi.
21 Uru nàŋi mpyi a Izirayɛli shiinbii ɲwɔ cû,
ka Dawuda cìnmpworonaŋi Shimeya jyaŋi Zhonatan si u bò.
22 Pire nàmbaa sicyɛɛreŋi na mpyi Gati kànhe shinŋi Arafa tùluge shiin.
Dawuda ná u kàshikwɔɔnbilʼà pire bò.