Seba ɲùŋkyaanre Dawuda na
20
Supyifahafahage kà na mpyi wani,
ku mɛgɛ mpyi Seba.
Bezhamɛ tùluge shinŋi Bikiri jya u mpyi u wi.
Ka kuru si mpuruge wyì maa jwo:
«Wuu nàzhan ɲyɛ a sìi Dawuda e mɛ.
Wuu là nta ɲyɛ Zhese jyaŋi i mɛ.
Izirayɛli shiinbii puni pi a sì pi pyɛnyi i.»
2 Ɲyɛ ka Izirayɛli suumɔ kùlu yyére shiinbii puni si yîri Dawuda taan mà taha Bikiri jyaŋi Seba fye e.
Ŋka,
Zhuda shiinbilʼà pyi ɲwɔmɛfee ná pi saanŋi i,
maa u tùugo mà lwɔ́ Zhurudɛn baŋi na,
mà sà nɔ fo Zheruzalɛmu i.
3 Ka Dawuda si ŋkàre u pyɛnge e Zheruzalɛmu i.
Bilicyeebii kɛŋi u mpyi a lèŋɛ ná u mpyi a pire yaha pi a pyɛnge kàanmucaa ke,
ka u u pire yaha pi mɛgɛ bagʼe,
yaaga maha yaaga kyaa li mpyi pi na ke,
maa yire puni kaan pi á.
Ŋka,
u ɲyɛ a mpyi na jyè pi kurugo mɛ.
Pire mpyi a tò a yaha mà sà yaa ná pi kwùŋi i.
Ka pi i mpyi leŋkwucyee fiige.
Amasa mbòŋi
4 Ka saanŋi si Amasa pyi:
«Zhuda shiinbii yyere naha mii yyére naha ná canmpyaa taanre shwɔhɔlʼe,
mu yabiliŋi,
maa mpyi naha.»
5 Ka Amasa si ŋkàrʼa sà Zhuda shiinbii yyere.
Ŋka,
tèni li mpyi a cyêe ke,
lirʼà tòro mà uru yabiliŋi yaha.
6 Ka Dawuda si Abisayi pyi:
«Nde Bikiri jyaŋi Seba ɲyɛ na ŋko si mpyi wuu na numɛ ke,
lirʼà pi mà tòro Abisalɔn wuuni na.
Mu yabiliŋi u yîri ná ma ɲùŋufooŋi kàshikwɔɔnbilʼe ma a u fyè tɔ̀re,
u àha ŋkwɔ̀ n-jyè kàshisulukaaŋke kànhe kʼe si mpînni wuu na mɛ.»
7 Ka Abisayi si yîri ná Yohabu shiinbii ná Kerɛti shiinbii ná Pelɛti shiinbii ná kàshikwɔnmpiyi puni i mà kàre.
Ka pi i fworo Zheruzalɛmu i na Bikiri jyaŋi Seba fyè tɔ̀re.
8 Pi à sà nɔ Gabahɔn kànhe kafabwɔhe taan ke,
ka Amasa si sà pi ɲùŋɔ bɛ̂.
Lire mpyi a Yohabu ta u à kàshikwɔnŋwɔɔ tɛ̀gʼa u vàandeyi cyîbi.
Lire mpyi li fwuuni i mà pwɔ u ninugumpe e.
Mà Yohabu yaha u u filili Amasa na,
lʼà pa fworʼa cwo.
9 Ka Yohabu si Amasa pyi:
«Mu à cùuŋɔ la na cìnmpworo?»
maa u kàniŋɛ cyɛge tɛ̀gʼa Amasa cû u mahajwoŋi na si u pûru ɲcû.
10 Amasa ɲyɛ a mpyi a ŋwɔɔni kàanmucya Yohabu cye e mɛ,
ka Yohabu si ŋwɔɔni cûru u yaceni i mà u laare yigʼa wu ɲìŋke na,
mà ta u bá ɲyɛ a tozhwɔnwogo pyi mɛ.
Ka Amasa si ŋkwû.
Ka Yohabu ná u sìɲɛɛŋi Abisayi si wá na Bikiri jyaŋi Seba fyè tɔ̀re.
11 Kàshikwɔɔnbii pi mpyi Yohabu á ke,
pire wà mpyi a tɛ̀ɛn Amasa taan maa jwo:
Yohabu kyalʼà táan ŋgemu á ná ŋgemu u ɲyɛ na ɲcáa Dawuda na ke,
urufoo u taha Yohabu fye e.
12 Lirʼà Amasa ta u u kùuŋkuu sìshange e kuni i.
Uru nàŋʼà sùpyire puni ɲya ti i yyéreli ke,
maa Amasa fililʼa lwɔ́ kuni i mà sà yaha kɛrɛge kʼe,
maa vàanŋa tò u na.
Ɲaha kurugo yɛ,
u mpyi a sùpyire ɲya ti i ma na yyéreli.
13 U à dìrʼa lwɔ́ kuni i ke,
ka sùpyire puni si ntaha Yohabu fye e na Bikiri jyaŋi Seba fyè tɔ̀re.
Seba mbòŋi
14 Yohabu à Izirayɛli tùluyi kùlugii puni jyiile na wà Abɛli-Bɛti-Maka kàmpanŋke na.
Ka kàshikwɔɔnbii niɲcwɔɔnrɔbii puni si piye bínni maa ntaha u fye e.
15 Ka pi i ŋkàrʼa sà Seba ɲwɔ tò Abɛli-Bɛti-Maka kànhe,
maa tadugugo faanrʼa sogo kànhe káaŋke na,
mà nɔ ku yyerempe pɛ̀rɛge na.
Ka Yohabu fyèɲwɔhɔ shiinbii puni si ɲcwo káaŋke na,
na lógoli si ɲcyán.
16 Ka ceewe sìɲcyiimɛfooŋi wà si yîri na ŋkwúuli kànhe e:
«Yii lógo!
Yii lógo!
Yii náaŋi yii i yi jwo Yohabu á na mii à jwo na u file naha,
mii la ɲyɛ si jwo ná u e.»
17 Ka Yohabu si shà,
ka ceeŋi si jwo:
«Mu u ɲyɛ Yohabu la?»
Ka Yohabu si jwo:
«Ɔɔn,
mii wi.»
Ka ceeŋi si jwo:
«Lógo ma báarapyicwoŋi ɲwɔ na.»
Ka u u jwo:
«Mii na núru.»
18 Ka ceeŋi si jwo:
«Nde na mpyi kalyee,
maha jwo:
“Shà yɛrɛgɛ cya Abɛli kànhe shiinbilʼá.”
Lire kani mpyi maha ɲcwɔɔnrɔ.
19 Wuu kànhe na ɲyɛ Izirayɛli yyeɲiŋɛ kànha ná sèe kànha.
Kànha niɲcɛnŋɛ,
kànbwɔhɔ mu si na ŋko raa ŋkɛ̀ɛgɛ amɛ Izirayɛli i.
Ɲaha kurugo mu la ɲyɛ si Kafooŋi kìni kɛ̀ɛgɛ yɛ?»
20 Ka Yohabu si jwo:
«Kile u ti laaga tɔɔn na na!
Kile u ŋke cyage ŋkɛ̀ɛgɛŋi sɔ̀nŋɔre laaga tɔɔn na na!
21 Lire bà li ɲyɛ li li mɛ.
Ŋka,
nàŋi wà u à yîri Efirayimu ɲaŋkuluni i,
u mɛgɛ na ɲyɛ Seba,
maa mpyi Bikiri jya,
uru u à ɲùŋɔ kyán saanŋi Dawuda na.
Yii uru kanni kan na á,
lire ká mpyi,
mii sí laaga tɔɔn kànhe na.»
Ka ceeŋi si Yohabu pyi:
«Ɲyɛ,
wuu sí u ɲùŋke wà mu á kàsɔɔge kàntugo.»
22 Ka ceeŋi si ŋkàrʼa sà u sìɲciimɛ jwumpe jwo sùpyire punʼá.
Ka pi i Bikiri jyaŋi Seba ɲùŋke kwɔ̀n mà wà Yohabu á.
Ka Yohabu si mpuruge wyì,
ka kàshikwɔɔnbii si ɲcaala a laaga tɔɔn kànhe na,
ka shin maha shin si ŋkàre u pyɛnge e.
Ka Yohabu si núrʼa kàre Zheruzalɛmu i saanŋi yyére.
Ɲùŋufeebii kani
23 Yohabu u mpyi Izirayɛli kàshikwɔɔnbii puni ɲùŋɔ na.
Yoyada jyaŋi Benazha u mpyi Kɛrɛti shiinbii ná Pelɛti shiinbii kàshicyɛge ɲùŋɔ na.
24 Adoramu u mpyi báarawayi pyifeebii ɲùŋɔ na.
Ayiludi jyaŋi Zhozafati u mpyi saanŋi sémɛmaraŋi.
25 Sewa u mpyi sémɛsemɛŋi.
Zadɔki ná Abiyatari,
pire pi mpyi sáragawwuubii.
26 Yayiri tùluge shinŋi Ira mú na mpyi Dawuda sáragawwu.